Byłaja palitźniavolenaja žurnalistka Łarysa Ščyrakova zaprašaje na etnafotasety ŭ strojach sa stohadovaj historyjaj FOTY
Łarysa Ščyrakova pravodzić etnafotasety ŭ Biełastoku. Dziakujučy jaje ŭłasnaj kalekcyi nacyjanalnych strojaŭ, vyviezienych ź Biełarusi, kožny maje mahčymaść prymieryć na sabie historyju.
Etnafotasety Łarysa pačała arhanizoŭvać jašče ŭ Biełarusi. Stvaryła śpiecyjalnuju zdymačnuju zonu na svaim padvorku ŭ Homieli, zarehistravałasia ŭ jakaści indyvidualnaj pradprymalnicy. U 2021‑m žančyna publična abjaviła, što sychodzić z žurnalistyki (krok byŭ vymušany z ulikam raspačataha palavańnia na niezaležnych karespandentaŭ). Apošnimi jaje klijentami na radzimie stali supracoŭniki HUBAZiKa — jana zamovili ŭ Łarysy fotasiesiju, kab u pracesie zatrymać.
U vyniku Łarysu Ščyrakovu asudzili na 3 hady i 6 miesiacaŭ kałonii pa artykułach ab sadziejničańni ekstremisckaj dziejnaści i dyskredytacyi Biełarusi. A ŭ vieraśni 2025-ha, amal praz try hady źniavoleńnia, departavali z krainy razam ź jašče 50 palitviaźniami.
Ciapier žurnalistka žyvie ŭ Biełastoku i tam ža prapanoŭvaje pasłuhu praviadzieńnia etnafotasetaŭ — heta mohuć być jak partretnyja zdymki, tak i siamiejnyja z love story.
Va ŭłasnaści ŭ fatohrafki — bahataja kalekcyja narodnych vyšyvanak, namitak, ručnikoŭ, abrusaŭ, pościłak, staradaŭnich pobytavych rečaŭ z Homielščyny, jakija jana źbirała pa vioskach i barachołkach. Rečy pastupova davoziać da jaje ź Biełarusi, ale ŭžo ciapier siarod usich hetych skarbaŭ kožny znojdzie niejki stroj dla siabie, kab nadzieć jaho i, mahčyma, adčuć toje, što adčuvali našy prodki.
«U mianie kala 20 žanočych saročak i jašče 10 mužčynskich. Jość try šarścianyja andaraki i kałyški, fartuchi. Heta ŭsio aŭtentyčnyja rečy, jakim pa 80‑100 hadoŭ», — raskazvaje Łarysa.
Zaraz Łarysa čakaje dakumienty razam z aficyjnym dazvołam na pracu, i kali atrymaje jaho, płanuje startavać u fotasiesijach z koštam 50 jeŭra, što vielmi dastupna pa polskich mierkach.
Pakul ža kožny žadajučy moža damovicca z Łarysaj na etnafotaset za danat. Źviazacca ź joj možna ŭ instahramie.
Stała viadomaja asoba rabočaha «Biełaruśkalija», jaki zahinuŭ pry abrušeńni hornaj parody1
Kamientary