«Navošta heta mnie?» Tramp vyklučyŭ jadzierny ŭdar pa Iranie i abviaściŭ ab padaŭžeńni pieramirja pamiž Izrailem i Livanam
Kiraŭnik Biełaha doma taksama zahadaŭ adkryvać ahoń pa karablach, jakija staviać miny ŭ Armuzskim pralivie.
Prezident ZŠA Donald Tramp zajaviŭ, što nie maje namieru ŭžyvać suprać Irana jadziernuju zbroju, bo amierykanskija vajskoŭcy, pavodle jaho śćviardžeńnia, i tak źniščyli vajenny patencyjał iranskaj armii. Kiraŭnik Biełaha doma taksama zahadaŭ adkryvać ahoń pa karablach, jakija ŭstanaŭlivajuć miny ŭ Armuzskim pralivie, i paviedamiŭ, što Izrail i Livan padoŭžyli pieramirje na try tydni, piša Bi-bi-si.
U čaćvier uviečary Tramp zrabiŭ niekalki zajaŭ ab kryzisie na Blizkim Uschodzie padčas pres-kanfierencyi ŭ Biełym domie.
Adzin z žurnalistaŭ spytaŭ jaho, ci moža jon užyć suprać Irana jadziernuju zbroju, i prezident ZŠA nazvaŭ hetaje pytańnie durnym.
«Navošta mnie heta treba? — spytaŭ jon u adkaz. — Navošta mnie vykarystoŭvać jadziernuju zbroju, kali my poŭnaściu źniščyli ich zvyčajnymi srodkami, bieź jaje prymianieńnia? Nikomu nielha dazvalać vykarystoŭvać jadziernuju zbroju».
Niezadoŭha da abjaŭleńnia ab pieramirji ŭ vajnie suprać Irana Tramp pahražaŭ uładam hetaj krainy «hibiellu cełaj cyvilizacyi», što niekatoryja kamientatary rascanili jak abmierkavańnie mahčymaści prymianieńnia zbroi masavaha paražeńnia. U pryvatnaści, Tramp abiacaŭ źniščyć iranskuju infrastrukturu, u tym liku elektrastancyi i masty.
Tym časam pa-raniejšamu niezrazumieła, ci majuć namier ZŠA i Iran adnavić mirnyja pieramovy. Jany pavinny byli adbycca na hetym tydni ŭ Pakistanie, adnak iranskija lidary admovilisia pryniać u ich udzieł, patłumačyŭšy heta tym, što ZŠA praciahvajuć błakadu Armuzskaha praliva.
Raniej Tramp paabiacaŭ, što da kanca tydnia mohuć źjavicca «dobryja naviny» ab pieramovach, ale pakul nijakaj novaj infarmacyi pra heta nie pastupała. U aŭtorak prezident ZŠA abviaściŭ, što pieramirje ź Iranam praciahvajecca na niavyznačany termin i što jon čakaje ad Tehierana kankretnych prapanoŭ.
U čaćvier uviečary Tramp abvierh paviedamleńni niekatorych ŚMI ab tym, što jon chacieŭ by jak maha chutčej skončyć vajnu.
«U mianie jość praktyčna nieabmiežavany čas, ale ŭ Irana jaho niama — hadzińnik cikaje! — napisaŭ kiraŭnik Biełaha doma ŭ svajoj sietcy Truth Social. — Ździełka moža być zaklučana, tolki kali jana budzie prydatnaj i dobraj dla ZŠA, našych sajuźnikaŭ, dy i dla ŭsiaho astatniaha śvietu».
Što adbyvajecca ŭ Armuzskim pralivie
Pakul Iran i ZŠA nie nabližajucca da praviadzieńnia mirnych pieramoŭ, Armuzski praliŭ zastajecca praktyčna całkam zabłakavanym.
Tehieran nie prapuskaje praź jaho sudny, jakija jon ličyć źviazanymi z sajuźnikami ZŠA, a amierykanskija vajennyja karabli padtrymlivajuć marskuju błakadu Irana.
U čaćvier ZŠA paviedamili, što ich Vajenna-marskija siły pierachapili ŭ Indyjskim akijanie padsankcyjny tankier M/T Majestic X, na borcie jakoha znachodziłasia iranskaja nafta.
Amierykanskaje vajennaje kamandavańnie paviedamlaje, što ŭ ramkach błakady Irana zahadała 33 sudnam viarnucca ŭ party i paabiacała i dalej spyniać tych, chto «akazvaje Iranu padtrymku — u jakim by rajonie jany ni znachodzilisia».
Iran nazyvaje takija dziejańni ZŠA «piractvam».
U aŭtorak iranskija vajenna-marskija siły paviedamili, što zachapili dva hruzavych sudna i pieranakiravali ich da svaich bierahoŭ. Da hetaha Korpus vartavych Isłamskaj revalucyi (KVIR) taksama zajaviŭ, što abstralaŭ u Armuzskim pralivie try sudny.
Słužba vieryfikacyi Bi-bi-si BBC Verify vyvučyła apublikavanyja KVIR kadry z zachopam dvuch sudnaŭ — MSC Francesca i Epaminondas — i paćvierdziła, što na videa mienavita jany. Ułady Hrecyi admaŭlajuć, što sudna Epaminondas było zachoplena, pa ich śćviardžeńniach jaho pa-raniejšamu kantraluje kapitan. Adnak transprondary abodvuch sudnaŭ adklučany.
Pa źviestkach haziety Financial Times, adno z zachoplenych sudnaŭ supravadžajuć u iranski port Biender-Abas, druhoje staić na jakary kala porta Bandar-Siryk.
Ceny na naftu rastuć
U čaćvier Tramp taksama addaŭ zahad «stralać na paražeńnie» pa karablach, jakija ŭstanaŭlivajuć miny ŭ Armuzskim pralivie. «Pramarudžvańnia nie budzie», — napisaŭ jon u sacsietcy Truth Social, dadaŭšy, što amierykanskija vajennyja karabli «prosta ciapier» ačyščajuć praliŭ.
Pientahon admaŭlaje paviedamleńni, jakija źjavilisia, ab tym, što VMS ZŠA moža spatrebicca da paŭhoda, kab vyzvalić handlovy šlach ad min. «Šaścimiesiačnaje zakryćcio Armuzskaha praliva — niemahčymy scenaryj i jon całkam nieprymalny dla ministra abarony», — skazaŭ Bi-bi-si aficyjny pradstaŭnik Pientahona Šon Parneł.
Jak adznačaje Financial Times, mižnarodnaja kampanija Hapag-Lloyd zrabiła vysnovu, što zachop sudnaŭ vymusiŭ hruzavyja sudny pakul admovicca ad namieru pakinuć Piersidski zaliŭ.
«Usie znachodziacca ŭ režymie čakańnia, — cytuje FT kiraŭnika kampanii Rolfa Chabiena Jansiena padčas sazvonu z klijentami. — U dadzieny momant my nie bačym varyjantaŭ, jak vyjści».
Bloomberg piša, što na fonie navin ab zakryćci Armuzskaha praliva cana nafty praciahvaje raści piaty dzień zapar. Da kanca čaćviarha barel hatunku Brent kaštavaŭ kala 105 dołaraŭ, a za hety tydzień jaho košt padniaŭsia prykładna na 16%.
Padčas pres-kanfierencyi ŭ čaćvier Trampa spytali, ci pavinny amierykancy pryvyknuć da taho, što bienzin u ahladnaj pierśpiektyvie budzie kaštavać daražej.
Prezident ZŠA prama nie adkazaŭ, ale skazaŭ: «A viedajecie, što jany atrymajuć uzamien? Viedajecie, što atrymajuć? Iran bieź jadziernaj zbroi, z dapamohaj jakoj jany pasprabujuć padarvać adzin z našych haradoŭ, abo padarvać uvieś Blizki Uschod».
Kamientary