Chto pradaŭ kvateru ŭ «Majaku Minska» źnikłaj Mielnikavaj? Takoha čałavieka nie isnuje
Niadaŭna stała viadoma, što źnikłaja sa 150 tysiačami dalaraŭ eks-śpikierka Kaardynacyjnaj rady Anžalika Mielnikava ŭžo paśla źniknieńnia kupiła dźvie kvatery ŭ Minsku. Z dapamohaj inicyjatyvy «Kibierpartyzany» «Lusterka» vyśvietliła niekatoryja detali pra pradaŭca adnaho z hetych abjektaŭ.
Kvateru ŭ ŽK «Majak Minska» na vulicy Piatra Mścisłaŭca Mielnikava nabyła ŭ hramadzianina Biełarusi na imia Alaksieja Vitaljeviča Čałajeva.
Uładalnikam jon pabyŭ niadoŭha — kala 4,5 miesiaca. Žurnalisty sprabavali ź im źviazacca, adnak ni ŭ sacsietkach, ni ŭ inšych krynicach nie znajšłosia nijakaj infarmacyi pra hetuju piersonu.
Pradstaŭniki inicyjatyvy «Kibierpartyzany» pravieryli pašpartnyja źviestki Čałajeva — i pryjšli da vysnovy, što takoha čałavieka nie isnuje.
— Na padstavie najaŭnych u «Kibierpartyzan» bazaŭ źviestak jość padstavy mierkavać, što heta pašpart prykryćcia Alaksieja Łabiejeva — ahienta kontrraźviedki KDB, jaki nieadnarazova sustrakaŭsia ź Mielnikavaj, — pišuć aktyvisty.
Da Čałajeva kvateraj vałodała Radzivonava Anhielina Alaksiejeŭna, 2 lutaha 1990 hoda naradžeńnia. Jana nabyła kvateru 16 maja 2025 hoda.
Takoha čałavieka siarod hramadzian Biełarusi nasamreč nie isnuje. A pašpart, jaki fihuruje ŭ dakumientach, aformleny 13 maja 2025 h., to bok za 3 dni da ździełki kupli-prodažu kvatery.
Taksama, pavodle infarmacyi «Kibierpartyzan», u niekatorych dziaržaŭnych dakumientach pašpart na imia Alaksieja Čałajeva fihuruje razam ź inšym pašpartam prykryćcia na imia Vasil Kajčanka (VASILI KAICHANKA).
Raniej pradstaŭniki inicyjatyvy vyśvietlili, što «Vasil» — ahient kontrraźviedki Biełarusi, jaki ŭ studzieni 2024 hoda prybyŭ na Šry-Łanku sumiesna z Łabiejevym. Tudy ž u hety čas prylatała Mielnikava.
Takim čynam, robiać vysnovu «Kibierpartyzany», kvateru Anžalicy Mielnikavaj na vulicy Piatra Mścisłaŭca pa padstaŭnych dakumientach pieraaformiŭ sam Alaksiej Łabiejeŭ. A raniej jon, u svaju čarhu, atrymaŭ jaje ad inšaj padstaŭnoj asoby.
Byłaja śpikierka Kaardynacyjnaj rady Anžalika Mielnikava źnikła ŭ sakaviku 2025 hoda. Apošni raz jaje bačyli na Šry-Łancy, kudy ŭ toj ža čas pryjazdžaŭ Alaksiej Łabiejeŭ — 32‑hadovy mužčyna, ź jakim u Mielnikavaj byli adnosiny i jaki, jak vyśvietlili žurnalisty, pracuje va Upraŭleńni vajskovaj kontrraźviedki KDB.
Paśla jaje źniknieńnia ŭ Polščy zaviali kryminalnuju spravu, ale što adbyłosia z Anžalikaj, dahetul niezrazumieła.
Praz hod u sacsietkach źjavilisia jaje fatahrafii ź minskaj spartzały, a baćka pryznaŭsia «Našaj Nivie», što jana ŭžo «daŭnavata» ŭ Biełarusi. «Lusterka» vyśvietliła, što ŭžo paśla źniknieńnia Mielnikava nabyła dźvie kvatery ŭ Minsku. Z treciaj jaje kvatery byŭ źniaty aryšt i aformleny padzieł majomaści z byłym mužam.
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam11
Kamientary