«Taksist vysadziŭ z-za taho, što ja źmianiła sposab apłaty». Transpartnaja inśpiekcyja pastaviła kropku ŭ kanflikcie

Usio zdaryłasia ŭnačy 23 krasavika. Jak raskazvaje dziaŭčyna, kala 03:00 jana prylacieła z Maskvy ŭ Minsk i vyklikała mašynu praz prahramu «Jandeks Go». Pa darozie jana źmianiła sposab apłaty. Heta nie spadabałasia kiroŭcu, piša Onliner.by.

— Ja vas nie paviazu. Ja jechaŭ za najaŭnyja. Mnie najaŭnyja patrebny byli, — kaža mužčyna na videa, źniatym pasažyrkaj. — Čamu ja pavinien vam sastupać? (…) Vam usio možna, ci što? Daravać? (…) Ja prosta skazaŭ, što nie paviazu vas. (…) Potym vy łajki stavicie niejkija niezrazumiełyja, mnie heta nie treba. (…) Ja dyrektar, ja sam budu vyrašać, kudy mnie iści pracavać i što mnie rabić. Budziecie svajmu mužu, chłopcu ci kamu chočacie ŭkazvać, ale nie mnie. (…) Ja vas daviazu da Minska — i vychodźcie.

Dalej na zapisie bačna, jak mužčyna dastaje z bahažnika čamadan pasažyrki. Jana zastajecca na ŭjeździe ŭ Minsk «kala trasy na abočynie».

Kamientar servisu

Svoj kamientar dała pres-słužba «Jandeks.Taksi».

— Takija pavodziny kiroŭcy absalutna niedapuščalnyja, nam ščyra škada, što pasažyrka sutyknułasia z takoj situacyjaj. My ŭžo praviali ŭnutranuju pravierku i pryniali miery pa jaje vynikach. Pa zapycie ad pravaachoŭnych orhanaŭ zmožam dać im usiu nieabchodnuju infarmacyju pa zamovie. My pastajanna pracujem nad palapšeńniem jakaści servisu, kab takija situacyi nie paŭtaralisia. Zvarotnaja suviaź pasažyraŭ u hetym vielmi dapamahaje, dziakuj, što raskazali pra toje, što zdaryłasia.

Kamientaryj kiroŭcy

Viersija padziej ad kiroŭcy, jaki admoviŭsia praciahvać pajezdku.

— Ja ŭziaŭ klijentku ŭ aeraporcie. Zahruziŭ valizku, jana sieła, spakojna jedziem, — raskazvaje mužčyna. — Ja viedaju, što ŭ mianie staić taryf «Najaŭnyja». Ja śpiecyjalna pastaviŭ taki taryf, tamu što mnie treba byli hrošy. Zapravicca tam… Nu, nie važna, pravilna?

Jedu spakojna, dziaŭčyna razmaŭlaje pa telefonie. Amal dajazdžaju da kropki B, nie chapaje 3—4 kiłamietraŭ. I tut u mianie vyskokvaje: «Apłata zroblena za bieznajaŭnyja». Ja ŭ dziaŭčyny pytajusia: «Dziaŭčyna, a čamu vy pieraklučylisia na bieznajaŭnyja, kali ja praktyčna vas davioz? Mnie treba hatoŭka». Jana adkazvaje: «U mianie niama hrošaj». Ja pytajusia: «Jak u vas niama hrošaj? Vy ž siadali ŭ taksi. Vydatna bačyli, što kiroŭca vas paviazie za najaŭnyja. Navošta vy tak sa mnoj robicie? (…) Moža, u vas niama hetych hrošaj na bieznale?». (…) Ja kažu: «Tady dajazdžajem voś tudy, ja vas vysadžvaju, i ŭsio».

A jana mnie kaža, maŭlaŭ, viazicie ŭ horad, na prypynku vysadzicie, i ŭsio. Ja adkazvaju: «Dobra». Zaviaršaju hetuju zamovu, vysadžvaju jaje na prypynku, addaju čamadan. Usio, ja pajechaŭ. Jana mnie pažadała, naturalna, dobraj darohi. Jedu, baču, što mnie pryjšli hetyja hrošy. A potym raptam niama hrošaj u mianie na rachunku. Dumaju: «Što heta za łuchta takaja?» Pačaŭ zvanić u padtrymku. U mianie pytajucca: «Raskažycie, kali łaska, jak u vas adbyŭsia hety incydent». Ja ŭsio pierakazvaju — voś i ŭsio.

Kiroŭca śćviardžaje: jon vysadziŭ dziaŭčynu ŭžo ŭ miežach horada (minuŭšy znak «Minsk» na ŭjeździe), va Uruččy, na prypynku.

— Kali vy praktyčna davieźli dziaŭčynu da adrasu (zastavałasia 3—4 kiłamietry), čamu ŭsio-taki nie zaviaršyli pajezdku ŭ punkcie B?

— Mnie prosta treba byli najaŭnyja, razumiejecie? Ja śpiecyjalna pastaviŭ hatoŭku. I klijent — luby čałaviek — heta bačyć. Možna było skazać: «Pavažany, u mianie niama hrošaj, možna niejak pa-inšamu razabracca?» Ale jana ž ničoha nie skazała. A mianie jašče i «Jandeks» zabłakiravaŭ dla vyśviatleńnia abstavin.

Poŭnaje videa kanfliktu

Dziaŭčyna, jakuju vysadziŭ kiroŭca, apublikavała poŭnaje videa kanfliktu z taksistam. Jana ŭdakładniła: pieršapačatkova kiroŭca spyniŭsia na trasie. Paśla nievialikaj słoŭnaj pierapałki i pytańnia, ci sapraŭdy kiroŭca hatovy kinuć maładuju dziaŭčynu na aŭtadarozie, jon usio ž advioz jaje da prypynku.

Dziaŭčyna na videa patłumačyła: u jaje sapraŭdy nie było najaŭnych, adnak jana dumała pieravieści nieabchodnuju sumu kiroŭcu na kartku. Ale paśla źmieny apłaty ŭ dadatku ŭžo nie mahła «adkacić» usio nazad, bo servis nie dazvalaje pravodzić takija manipulacyi.

U momancie dziaŭčyna prapanuje znajści kampramis, adnak baki ni da čaho nie prychodziać.

«Navuču choć paru razoŭ: bolš rabić tak nie budziecie, budziecie pytacca. Treba było zahadzia dumać hałavoj», — kaža kiroŭca na videa. U niejki momant dziaŭčyna pačynaje płakać: «Što ja vam zrabiła?» U adkaz kiroŭca nastojvaje na svaim: «Mnie patrebnyja najaŭnyja».

Jak pakarali kiroŭcu?

Da razboru padklučyłasia i Transpartnaja inśpiekcyja. Kiroŭca razam z dyrektaram aŭtaparka (choć na videa mužčyna śćviardžaje, što jon «sam dyrektar») byli vyklikanyja ŭ TI na nastupny dzień paśla incydentu. Na sustrečy kiroŭca vinu nie pryznaŭ. Na nastupny tydzień jamu ŭručyli pozvu dla pryciahnieńnia da adkaznaści.

Jak raskazali, jaho znachodžańnie ŭ Rejestry aŭtamabilnych pieravozak pasažyraŭ u nierehularnych znosinach budzie prypyniena z-za adsutnaści videazapisu z sałona, to-bok jon časova nie zmoža lehalna pracavać.

U Transpartnaj inśpiekcyi padkreślili: pasažyru nie zabaroniena źmianiać sposab apłaty. U hetym vypadku kiroŭca budzie pryciahnuty da adkaznaści za nieabhruntavanuju admovu ŭ pieravozcy.

• 3
• 1
• 1
• 1
• 0
• 0
• 0
• 0