Tramp pryhraziŭ vyvieści častku vojskaŭ z Hiermanii paśla krytyki Miercam vajny ŭ Iranie
ZŠA vyvučajuć mahčymaść skaračeńnia kolkaści svajho vajennaha kantynhientu ŭ Hiermanii, zajaviŭ Donald Tramp. «Adpaviednaje rašeńnie budzie pryniata ŭ bližejšy čas», — napisaŭ kiraŭnik Biełaha doma ŭ sacsietcy Truth Social.
U Hiermanii raźmieščany najbujniejšy kantynhient amierykanskich vojskaŭ u Jeŭropie — bolš za 36 tysiač čałaviek. Usiaho ž na jeŭrapiejskich bazach znachodzicca krychu bolš za 68 tysiač vajskoŭcaŭ ZŠA.
Raniej vysokapastaŭleny čynoŭnik Biełaha doma paviedamlaŭ Reuters, što Tramp abmiarkoŭvaŭ mahčymaść vyvadu častki amierykanskich vojskaŭ ź Jeŭropy, ale kankretnyja krainy nie nazyvalisia.
Zajava Trampa pra mahčymy vyvad amierykanskaha kantynhientu z Hiermanii źjaviłasia paśla krytyki Frydrycha Mierca vajny suprać Irana. Pavodle jaho słoŭ, vajenny kanflikt maje «maštabnyja nastupstvy dla ekanamičnaj dziejazdolnaści» Hiermanii. Pry hetym u Vašynhtona niama «stratehii vychadu» ź jaho, a padčas pieramovaŭ z Tehieranam amierykanski bok «źnievažajecca».
U adkaz Tramp napisaŭ, što kancler Hiermanii «nie razumieje, pra što havoryć», kali ličyć dapuščalnym źjaŭleńnie jadziernaj zbroi ŭ Irana.
«Ja zaraz rablu ŭ dačynieńni da Irana toje, što inšyja krainy abo prezidenty pavinny byli zrabić užo daŭno. Niadziŭna, što Hiermanija tak drenna spraŭlajecca ŭ ekanomicy i ŭ cełym», — adznačyŭ kiraŭnik Biełaha doma.
Ciapier čytajuć
Chto z palitviaźniaŭ vyjšaŭ na svabodu 16 vieraśnia POŬNY ŚPIS18
Kamientary