Paśla kavidu ludzi hadami mohuć nie adčuvać smak ježy. Navukoŭcy znajšli mahčymuju pryčynu

Strata smaku i niuchu stała adnym z najbolš viadomych simptomaŭ karanavirusnaj infiekcyi. Zvyčajna hetyja adčuvańni pastupova viartajucca paśla vyzdaraŭleńnia, ale ŭ častki ludziej prablemy zachoŭvajucca bolš za hod, navat kali sama chvaroba praciakała ŭ lohkaj formie.

Daśledčyki ź miedycynskaha kampusa Kałaradskaha ŭniviersiteta Anšuc i dvuch šviedskich univiersitetaŭ pasprabavali vyśvietlić, jakija bijałahičnyja pracesy mohuć stajać za praciahłaj strataj adčuvańnia smaku. Na vyniki ich pracy źviartaje ŭvahu Science Daily.

U daśledavańni ŭziali ŭdzieł 28 čałaviek, jakija bolš za hod paśla karanavirusnaj infiekcyi skardzilisia na parušeńni smaku. Pry hetym nichto ź ich nie byŭ špitalizavany z COVID-19.

Śpiecyjalnyja testy pakazali, što ŭ vaśmi ŭdzielnikaŭ byli vidavočnyja adchileńni ŭ adčuvańni smakaŭ. Adzinaccać čałaviek paviedamili pra ciažkaści z raspaznavańniem asobnych smakaŭ, najpierš sałodkaha, horkaha i umami. Apošni možna adčuć, naprykład, u hrybach abo miasnym bulonie. A voś zdolnaść raspaznavać salonaje i kisłaje va ŭdzielnikaŭ daśledavańnia zachavałasia.

Kab vyśvietlić pryčynu takoj roźnicy, navukoŭcy ŭziali ŭ 20 udzielnikaŭ nievialikija ŭzory tkanak z hrybapadobnych sasočkaŭ jazyka. U ich raźmiaščajucca smakavyja cybuliny — mikraskapičnyja struktury, jakija źmiaščajuć kletki, adkaznyja za ŭsprymańnie smaku.

Dźvie pryčyny straty smaku i niuchu paśla COVID-19

Analiz pakazaŭ, što ŭ daśledavanych tkankach byŭ panižany ŭzrovień matryčnaj RNK, nieabchodnaj dla vypracoŭki białku PLCβ2. Hety białok adyhryvaje važnuju rolu ŭ miechaniźmie raspaznavańnia sałodkaha, horkaha i umami.

Kali čałaviek jeść niešta z adnym z hetych smakaŭ, adpaviednyja receptary zapuskajuć u kletkach łancužok bijachimičnych reakcyj. Białok PLCβ2 dapamahaje ŭzmacnić sihnał, nieabchodny dla pieradačy infarmacyi pra smak u mozh.

Panižeńnie ŭzroŭniu matryčnaj RNK moža pryvodzić da niedachopu hetaha białku i, adpaviedna, asłableńnia smakavych sihnałaŭ. Dla raspaznavańnia salonaha i kisłaha arhanizm vykarystoŭvaje inšyja miechanizmy, jakija nie zaležać ad PLCβ2. Heta moža tłumačyć, čamu paśla kavidu ŭ niekatorych ludziej parušajecca ŭsprymańnie tolki peŭnych smakaŭ.

Adnak malekularnymi źmienami tema nie abmiežavałasia. Kali navukoŭcy vyvučyli ŭzory tkanak pad mikraskopam, vyśvietliłasia, što ŭ adnych udzielnikaŭ smakavyja cybuliny vyhladali narmalna, a ŭ inšych była parušanaja ich struktura, a taksama źmianiłasia raźmiaščeńnie smakavych kletak.

Takim čynam, praciahłyja prablemy sa smakam paśla COVID-19 mohuć być źviazanyja jak z parušeńniami pieradačy sihnałaŭ, tak i sa źmienami ŭ budovie smakavych cybulin.

Ale čamu hetyja parušeńni mohuć zachoŭvacca nastolki doŭha? U normie smakavyja kletki abnaŭlajucca prykładna kožnyja dva-čatyry tydni. Ale ž u niekatorych ludziej prablemy sa smakam praciahvajucca bolš za hod paśla infiekcyi. Heta śviedčyć, što naturalnaha abnaŭleńnia kletak nie zaŭsiody dastatkova dla adnaŭleńnia ich narmalnaj pracy.

Daśledavańnie dapamahło vyjavić mahčymyja bijałahičnyja pryčyny praciahłaj straty smaku, ale pakul nieviadoma, ci mohuć vyjaŭlenyja malekularnyja źmieny z časam źniknuć. Navukoŭcam taksama treba vyśvietlić, ci mahčyma adnavić narmalnuju pracu smakavych kletak z dapamohaj lačeńnia.

• 0
• 0
• 0
• 0
• 0
• 0
• 0
• 0