Čatyrochrazovaja alimpijskaja čempijonka pa bijatłonie Darja Domračava viadzie biznes u Biełarusi jak indyvidualny pradprymalnik. Spartsmienka adkryła IP adzinaccać hadoŭ tamu, vosieńniu 2014 hoda. Akurat paśla Alimpijady ŭ Sočy, dzie jana zavajavała try załatyja miedali, piša vydańnie «Lusterka».
Asnoŭny vid dziejnaści IP Domračavaj — zdača ŭ najom ułasnaj i arandavanaj nieruchomaj majomaści. Z dapamohaj Belpol «Lusterka» daviedałasia, što spartsmienka vałodaje ofisnymi pamiaškańniami ŭ 33‑paviarchovym biznes-centry Royal Plaza, što na praśpiekcie Pieramožcaŭ, 7A. Budynak znachodzicca niedaloka ad handlovaha centra Galleria Minsk.
Cikava, što Royal Plaza ŭviali ŭ ekspłuatacyju ŭ mai 2014 hoda, u červieni bijatłanistka pierastała słužyć u KDB, a ŭ vieraśni adkryła IP.
Va ŭłasnaści ŭ Domračavaj — čatyry pamiaškańni na 16‑m paviersie. Ahulnaja płošča składaje 474 kvadratnyja mietry. Kali jana ich kupiła i jakuju sumu vydatkavała, nieviadoma.
Zaraz ofis na čaćviortym paviersie Royal Plaza pradajuć pa canie ŭ 8,5 tysiačy rubloŭ za kvadratny mietr (krychu bolš za 3000 dalaraŭ — tut i dalej pieravod pa kursie Nacbanka na 12 maja). Kali zychodzić z hetaj cany, to košt 474 kvadrataŭ u hetym biznes-centry moža składać 1,44 miljona dalaraŭ.
Košt arendy takoj nieruchomaści varjirujecca ad 48 da 59 rubloŭ za kvadrat. Kali b Domračava zdavała svaje mietry pa takoj canie, to štomiesiac atrymlivała b ad 22,8 da 28 tysiač rubloŭ (ad 8150 da 8500 dalaraŭ).
Heta nie ŭsia nieruchomaść spartsmienki ŭ Minsku. Jak udałosia vyśvietlić «Lusterku», bijatłanistcy naležać jašče dźvie kvatery. Adna — płoščaj 250 kvadratnych mietraŭ — raźmieščanaja praz raku ad biznes-centra Royal Plaza ŭ tak zvanym «domie Čyža» na vulicy Staražoŭskaj. Druhaja — mienšaja, 57 kvadratnych mietraŭ — na Kamiennahorskaj.
Akramia hetaha, u Darji jość dom u statusnym pasiołku Łaparavičy, što pad Minskam. U 2020 hodzie ŚMI paviedamlali, što ŭčastak niedaloka ad doma Domračavaj atrymaŭ u arendu na 99 hadoŭ i francuzski akcior Žerar Depardźjo.
Miž tym zdača nieruchomaści — nie adziny biznes Darji Domračavaj. U jaje jość imianny mahazin adzieńnia i inšych spartyŭnych tavaraŭ. Adnak jurydyčna jon joj nie naležyć, a zarehistravany na IP jaje mamy — Łarysy Mininaj.
Bjorndalen pryznaŭsia, što jamu prapanoŭvali ŭznačalić Mižnarodnuju fiederacyju bijatłonu
U elitnaj vioscy Łaparavičy pad Minskam pradajuć dom za $2,1 miljona. Bonusam zornyja susiedzi — Domračava i Hleb
9‑hadovaja dačka Domračavaj zaniała druhoje miesca ŭ «Śniežnym snajpiery» ŭ Raŭbičach
Domračava hatovaja ŭznačalić zbornuju Biełarusi. Ale pry adnoj umovie
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty23
Kamientary