Džon Retklif sustreŭsia ź ministram unutranych spraŭ Kuby, kiraŭnikom kubinskaj śpiecsłužby i ŭnukam Raula Kastra. Centralnaje raźviedvalnaje ŭpraŭleńnie ZŠA apublikavała fota spatkańnia, jakoje havorać samo za siabie.
Dyrektar Centralnaha raźviedvalnaha ŭpraŭleńnia Džon Retklif prylacieŭ u Havanu ŭ čaćvier dla sustrečy ź ministram unutranych spraŭ Kuby i kiraŭnikom raźviedsłužby astraŭnoj krainy na fonie vostraha deficytu paliva i pieršych za doŭhija hady vuličnych pratestaŭ tam. Vizity kiraŭnika CRU zaŭsiody majuć vyklučny charaktar. Hety — zusim asablivy, bo kubinski režym siem dziasiatkaŭ hadoŭ hruntavaŭsia na procistajańni z ZŠA.
Fota z sustrečy, raspaŭsiudžvanaje Centralnym raźviedupraŭleńniem ZŠA, havoryć samo za siabie. Retklif hladzić na surazmoŭcaŭ, tyja ž, jak adzin — advioŭšy vočy.
Adnak vonkavyja farmalnaści vykananyja: haspadary navat u čornych kaściumach zamiest zvyčajna pryniatych u čynoŭnikaŭ na Kubie biełych kašul-huajavier. Doŭhi stoł nakryty biełym abrusam i ŭpryhožany bukietami čyrvonych ruž i hipsafiły. Haryć śviatło — što niemałavažna ŭ krainie, dzie apošnim časam elektryčnaść uklučajuć tolki na dźvie-try hadziny za dzień.
Kuba apynułasia ŭ poŭnym pravale paśla taho jak ZŠA ŭ vyniku małankavaj apieracyi atrymali kantrol nad Vieniesuełaj. Vieniesueła była hałoŭnaj krynicaj nafty dla Kuby. Uzamien Havana zabiaśpiečvała Karakas siłavikami i ciełaachoŭnikami, jakija, jak vyjaviłasia, byli niazdatnyja abaranić prezidenta Madura. Kali Vieniesueła i Mieksika vymušana spynili pastaŭki nafty na Kubu, kryzis ułady ŭ Havanie staŭ tolki pytańniem času. Rasija dapamahčy svajmu byłomu klijentu taksama akazałasia niazdolnaja. Na Kubu pryjšoŭ tolki adzin tankier z rasijskim palivam, a dla zabieśpiačeńnia vostrava takich treba vosiem na miesiac. Zapasaŭ paliva na vostravie chapiła na adzin kvartał. Sama Kuba pakryvaje z ułasnaj zdabyčy tolki 40% enierhapatreb — samy minimum dla pracy asnoŭnych słužbaŭ i pradpryjemstvaŭ.
Urad Kuby zajaviŭ, što sustreča z kiraŭnikom CRU adbyłasia pa zapycie ZŠA. Retklif adznačyŭ, što Kubie nieabchodna karenna źmianicca dla supracoŭnictva z ZŠA ŭ pytańniach ekanomiki i biaśpieki, paviedamiŭ pradstaŭnik CRU. Retklif skazaŭ kubinskim čynoŭnikam, što ŭ ich jość abmiežavanaje časovaje akno, kab stabilizavać ekanomiku vostrava i pačać uzajemadziejańnie z administracyjaj Trampa, pierakazvaje słovy čynoŭnika vydańnie The Wall Street Journal.
Retklif papiaredziŭ svaich kubinskich kaleh, što prezident Tramp słoŭ na viecier nie kidaje. Kab padmacavać hetuju dumku, jon akurat i nahadaŭ pra vajskovy rejd ZŠA ŭ Vieniesuele.
U studzieni Tramp abviaściŭ Kubu «niezvyčajnaj i nadzvyčajnaj pahrozaj» nacyjanalnaj biaśpiecy ZŠA, skarystaŭšysia nadzvyčajnymi paŭnamoctvami dla ŭzmacnieńnia cisku na Havanu. Z taho času Tramp časta papiaredžvaŭ, što Kuba «budzie nastupnaj» u jaho kampanii suprać varožych režymaŭ u zachodnim paŭšarji.
Havana zajaviła, što nadała amierykanskaj delehacyi infarmacyju, jakaja «adnaznačna demanstruje, što Kuba nie niasie pahrozy nacyjanalnaj biaśpiecy ZŠA. Niama nijakich padstaŭ dla ŭklučeńnia Kuby ŭ amierykanski śpis krain-sponsarak teraryzmu».
Kubinskija čynoŭniki paviedamili kamandzie ZŠA, što na vostravie niama zamiežnych vajskovych baz. Kuba «nie padtrymlivaje, nie finansuje i nie dapuskaje dziejnaści terarystyčnych abo ekstremisckich arhanizacyj», zajaviŭ urad.
Maskva zakryła svaju vajskovuju bazu na Kubie ŭ 2002 hodzie. U apošniaje dziesiacihodździe Rasija sprabavała adnavić svaju prysutnaść na Kubie, ale ciažkaja vajna va Ukrainie adciahnuła ŭsie najaŭnyja ŭ Rasii siły.
Vizit Retklifa adbyŭsia praź dzień paśla taho, jak urad Kuby paviedamiŭ, što ŭ krainie skončylisia mazuta i dyzpaliva, nieabchodnyja dla padtrymańnia elektrazabieśpiačeńnia. Maštabnyja adklučeńni śviatła vyklikali pratesty ŭ Havanie. Jany stali pieršymi paśla doŭhich hadoŭ žorstkich represij: ludzi zakipajuć z-za šmatdzionnych błekaŭtaŭ i paharšeńnia ŭmoŭ žyćcia.
Kuba doŭhija hady prezientavała siabie jak «vostraŭ svabody», adnak unutry krainy byŭ stvorany žorstki tatalitarny režym. Žyćcio čałavieka na kamunistyčnaj Kubie bliskuča apisała biełaruskaja piśmieńnica Alena Brava, jakaja praviała na vostravie pačatak 1990-ch. Jaje kniha nazyvajecca «Kamiendancki čas dla łastavak».
U paviedamleńni ŭ sieradu ŭ sacyjalnaj sietcy X prezident Kuby Mihiel Dyjas-Kanel zajaviŭ, što adklučeńnie elektrasietak vostrava maje adzinuju pryčynu: «hienacydnuju enierhietyčnuju błakadu, uviedzienuju suprać našaj krainy z boku ZŠA».
Siarod kubinskich asob na sustrečy ŭ čaćvier prysutničali ministr unutranych spraŭ Kuby Łasara Alvares i Raul Radryhies Kastra, viadomy jak «Krab» — upłyvovy ŭnuk 90‑hadovaha lidara kubinskaj revalucyi Raula Kastra.
Radryhies Kastra atrymaŭ mianušku «Kraba» (El Cangrejo), bo naradziŭsia z šaściu palcami na adnoj ruce. Mienavita jon u apošnija miesiacy staŭ adnym z hałoŭnych pieramoŭnikaŭ z vysokapastaŭlenymi amierykanskimi čynoŭnikami. Raniej jon byŭ ciełaachoŭnikam i hałoŭnym pamočnikam svajho dzieda.
ZŠA nastojvajuć na vyzvaleńni palitviaźniaŭ i rynkavych reformach na Kubie. Jany chočuć taksama vyklučyć vykarystańnie Kuby Rasijaj i Kitajem u vajskovych metach.
Patrabavańni Vašynhtona aznačajuć źmienu sistemy dla Kuby. Jak pakazvaje dośvied Vieniesueły, ciapierašniaja amierykanskaja administracyja nie nastojvaje na źmienie fihur va ŭładzie i navat na chutkim pierachodzie da demakratyi. Jana hatovaja pracavać z tym samym kiraŭnictvam, pry ŭmovie što toje pierastaje pravodzić antyamierykanskuju palityku i addaje pad kantrol ZŠA važnyja dla amierykancaŭ haliny ekanomiki.
Kamientary