Biełarusy iranizujuć ź intervju byłoha kiraŭnika polskaj raźviedki

Pałkoŭnik Piotr Kraŭčyk, jaki z 2016 da 2022 hoda ŭznačalvaŭ polskaje Ahienctva raźviedki (Agencja Wywiadu, AW), niadaŭna zapuściŭ na adnym z polskich jutub-kanałaŭ ułasny błoh «Siomy pavierch». Pieršy vypusk byŭ pryśviečany Biełarusi.

U samym pačatku Kraŭčyk zajaviŭ, što vyzvaleńnie Andžeja Pačobuta «ŭpisvajecca ŭ vielmi doŭhuju, užo bolš čym dziesiacihadovuju historyju namahańniaŭ, jakija Polšča razam sa svaimi sajuźnikami prykładała dla taho, kab pavialičyć pole manieŭru Minska ŭ adnosinach da Rasii».

Były kiraŭnik polskaj raźviedki davodzić, što pačatak pracesu siahaje ŭ 2010 hod, kali były ministr zamiežnych spraŭ Radasłaŭ Sikorski razam z tahačasnym kiraŭnikom polskaj raźviedki hienierałam Maciejem Huniaj «ažyćciaŭlali roznyja dziejańni, jakija pavinny byli pryvieści da pašyreńnia biełaruskaj suvierennaści, kab jana choć u niejkaj stupieni stała krychu bolšaj u adnosinach da Rasii».

Praŭda, namahańni «nie prynieśli poŭnaha pośpiechu» ŭ pieršyja hady. Situacyja, pavodle pałkoŭnika, źmianiłasia paśla 2016 hoda, kali Rasija ŭviała padatkovy manieŭr, što pryviało da rostu cen na vuhlevadarody dla Biełarusi.

Pa jaho słovach, z 2017 hoda kiraŭnictva Biełarusi «pačało ŭsio bolš adkryvacca na kantakty z Zachadam, u tym liku taksama z Polščaj». Da dyjałohu ŭ 2017—2018 hadach udałosia dałučyć i ZŠA.

«Biełaruś — heta suvierennaja dziaržava, niezaležna ad taho, što prezident Łukašenka, jaki ciapier harantuje hetuju suvierennaść, vykarystoŭvaje jaje dla ŭmacavańnia svajoj ułasnaj pazicyi i, viadoma, dla ŭzbahačeńnia ludziej vakoł siabie. Ale ŭsio ž mienavita prezident Łukašenka, niezaležna ad taho, što my pra jaho dumajem i jak da jaho stavimsia, jość harantam biełaruskaj suvierennaści ŭ tym vyhladzie, u jakim jana isnuje ciapier», —

vykazvaje svajo mierkavańnie pałkoŭnik i pieraličvaje fakty, jakija, na jaho dumku, śviedčać pra toje, što Biełaruś niekalki hadoŭ da vybaraŭ 2020 hoda realna ruchałasia na Zachad.

Naprykład, u lutym 2020 hoda kiraŭnik KDB Valer Vakulčyk naviedaŭ Miunchienskuju kanfierencyju pa biaśpiecy. A ŭ červieni i lipieni 2020‑ha adbylisia pastaŭki dźviuch partyj amierykanskaj nafty ŭ Biełaruś praz Kłajpiedu, u jakich brała ŭdzieł i polskaja kampanija Unimot.

«Dziakujučy hetaj nafcie my stvarali pierśpiektyvu, pry jakoj Biełaruś mahła b stać mienš zaležnaj ad rasijskaj nafty», — davodzić Kraŭčyk.

Vybary 2020-ha

Adnak, pavodle pałkoŭnika, «nastupili vybary žniŭnia 2020-ha», jakija «Łukašenka moh vyjhrać biez falsifikacyj, viadoma, na značna nižejšym uzroŭni». Ale «paśla vybaraŭ na vulicy biełaruskich haradoŭ, miastečak i viosak vyjšli sotni tysiač ludziej». U vyniku ŭ Biełarusi «dyjałoh z Zachadam abrynuŭsia i ŭsia dynamika całkam źmianiłasia». Za pratestami, jak śćviardžaje Kraŭčyk, stajała Rasija.

«Chaču, kab vy razumieli: biełarusy, ź jakimi my kantaktavali ŭ 2019 hodzie i raniej, užo ŭ sakaviku 2019 hoda viedali, što rasijanie buduć imknucca sarvać hety dyjałoh pamiž Biełaruśsiu i Zachadam.

U sakaviku 2019 hoda moj biełaruski kaleha, kiraŭnik KDB, adkryta kazaŭ, što, pavodle ich acenak, rasijanie rychtujucca da taho, kab padčas vybaraŭ 2020 hoda spravakavać pratesty, jakija mohuć pryvieści da krovapralićcia.

Biełarusy kazali nam, što hetaja pralitaja biełaruskaja kroŭ, jakoj jany nie chacieli, moža žorstka pierapynić hety dyjałoh. Jany sprabavali zrabić vielmi šmat, kab kroŭ nie praliłasia».

Były šef polskaj raźviedki śćviardžaje, što «častka manipulacyj pratestami išła z Polščy», ale śpiecsłužby ich nie zaŭvažyli. Jon źviartaje ŭvahu na kanał Nexta:

«Hety kanał u peŭny momant pačaŭ pieradavać niepubličnuju infarmacyju, jakaja pachodziła z mnohich biełaruskich instytutaŭ: z vojska, ź milicyi, z roznych struktur biaśpieki — pra toje, jak režym Łukašenki źbirajecca zadušyć mahčymyja pratesty paśla vybaraŭ 2020 hoda.

Staŭlu pytańnie, bo nie maju pramych dokazaŭ taho, što hetyja maładyja ludzi byli źviazanyja z rasijskimi śpiecsłužbami, ale staŭlu pytańnie: ci rasijanie nie mahli śpiecyjalna pieradavać im hetuju infarmacyju dla taho, kab budavać peŭnuju napružanaść, budavać peŭnuju tryvohu siarod biełarusaŭ?»

Pavodle Kraŭčyka, navat va ŭmovach zamarozki dyjałohu pamiž Minskam i Zachadam kantakty pamiž polskimi i biełaruskimi śpiecsłužbami padtrymlivalisia. Dziakujučy im u mai 2021 hoda ŭdałosia vyzvalić troch aryštavanych nastaŭnic polskaj movy. Ale pierad hetym, u sakaviku, za kraty trapiŭ Andžej Pačobut.

Jak śćviardžaje Kraŭčyk, prykładna ŭ toj ža čas biełaruski bok prapanavaŭ pieradać žurnalista Polščy pry ŭmovie, što jon bolš nie vierniecca ŭ Biełaruś. Adnak Pačobut admoviŭsia.

«Z adnaho boku, heta vielmi hieraičnaja pazicyja, ale z druhoha boku, biełarusy taksama ŭśviedamlali, što znachodžańnie Andžeja Pačobuta, simvała polskaści i polska-biełaruskich adnosin, u biełaruskaj turmie budzie elemientam, jaki mocna paharšaje polska-biełaruskija adnosiny. Ich žadańnie pieradać Pačobuta Polščy, jak zdajecca, było pradyktavanaje mienavita hetym razumieńniem», — raskazvaje Kraŭčyk.

Dalej Kraŭčyk razvažaje pra mihracyjny kryzis, kali polskuju miažu šturmavali mihranty z Afryki i Blizkaha Uschodu. Jon pahadžajecca, što kryzis inicyjavali biełaruskija ŭłady, ale tut ža znachodzić hetamu apraŭdańnie: maŭlaŭ, u Polščy znachodzilisia biełaruskija apazicyjaniery, jakija publična havaryli pra žadańnie zrynuć Łukašenku.

«Biełaruś — heta nie zakrytaja tema. Biełaruś — heta zadača dla Respubliki Polšča, dla polskich palitykaŭ, polskich śpiecsłužbaŭ, polskich instytutaŭ i polskaj dypłamatyi. My pavinny i nadalej imknucca da taho, kab Biełaruś była jak maha bolš niezaležnaj i mieła jak maha šyrejšaje pole manieŭru adnosna Rasii», —

davodzić Kraŭčyk i ŭ jakaści prykładaŭ imknieńnia da niezaležnaści pryvodzić pratesty 2020 hoda i admovu Łukašenki ŭvodzić biełaruskuju armiju va Ukrainu.

Asobna były šef polskaj raźviedki zhadvaje niabožčyka Uładzimira Makieja, jaki «pamior pry niavyśvietlenych abstavinach». Sam Kraŭčyk miarkuje, što «heta byli nie całkam naturalnyja abstaviny».

Takich, jak Makiej, pavodle Kraŭčyka, u Biełarusi niamała, adnak «pakul jašče zanadta rana nazyvać usie imiony».

Biełarusy skieptyčna ŭspryniali videa Piatra Kraŭčyka

«Heta absalutnaja siensacyja, — iranizuje z zajavaŭ byłoha kiraŭnika polskaj raźviedki žurnalist radyjo «Svaboda» Dźmitryj Hurnievič. — Jość dzivosnyja ludzi, jakija majuć iluzii, što i paśla 32 hadoŭ prarasijskaj palityki Łukašenku ŭdasca adciahnuć ad Rasii».

Adnosna padazreńniaŭ, vykazanych polskim pałkoŭnikam na adras Nexta, Hurnievič kpić:

«Chočacca spytać samoha Kraŭčyka, jaki kiravaŭ polskaj raźviedkaj u pratestavy ŭ Biełarusi hod: a vy sami nie mahli hetaha pravieryć? Redakcyja Nexta była ŭ Varšavie pa adrasie, jaki viedaŭ kožny, chto ŭmieje karystacca internetam. Niaŭžo jaho nie viedała polskaja raźviedka?»

Były biełaruski dypłamat Pavieł Śluńkin taksama ź ironijaj zaŭvažaje: «Atrymlivajecca, ułady Biełarusi bolš bajalisia dazvolić Andžeju Pačobutu zastacca ŭ Biełarusi, čym dalejšaha pahłynańnia krainy Rasijaj».

Ajcišnik Juryj Sidun adznačaje, što ŭ razvahach byłoha šefa polskaj raźviedki nie chapaje takoj vysnovy ŭ miežach jahonaj ža łohiki: «Jany chacieli addać nam Pačobuta, kab nie psavać adnosiny z Polščaj. Ale Pačobut byŭ suprać. Značyć, Pačobut pracavaŭ na Rasiju».

Błohier, były palitviazień Ihar Łosik koratka zaŭvažaje: «U mianie drennyja naviny nakont kampietentnaści hetaha kiraŭnika polskaj vyviedki».

Jašče bolš rezka vykazaŭsia žurnalist «Biełsata» Źmicier Mickievič: «Kali taki kieks ŠEŚĆ HADOŬ kiravaŭ śpiecsłužbaj, to ŭ mianie vielmi kiepskija naviny dla Polščy».

• 4
• 0
• 6
• 17
• 1
• 0
• 1
• 0