Rublovyja ŭkłady: jakija staŭki prapanujuć banki i što adbyvajecca z hrašyma z ulikam kursaŭ
Pracenty pa valutnych układach apošnija hady znachodziacca ŭ miežach statystyčnaj chibnaści, tamu narod pieraklučyŭsia na rublovyja. Raźbirajemsia, ci šmat jany prynosiać i nakolki heta vyhadna z ulikam kursavych vahańniaŭ.
Što prapanujuć banki
Najbolš vyhadnyja — biezadzyŭnyja depazity terminam ad adnaho hoda. Dachod ad takich depazitaŭ nie abkładajecca padachodnym padatkam (u vypadku ź biezadzyŭnymi ŭkładami da hoda bank aŭtamatyčna vyličvaje padatak).
Razhladzim minimalny ź nieabkładanych padatkam terminaŭ — 13 miesiacaŭ. To-bok ciapier zabirać hrošy mohuć tyja, chto pakłaŭ ich na depazit u krasaviku 2025 hoda, a kali pakłaści ich siońnia, to zabrać atrymajecca tolki ŭ červieni 2027-ha.
Bolšaść bankaŭ prapanujuć ad 13% da 14,1% hadavych.
Naprykład, kali pakłaści hrošy ŭ Bielinviestbank na depazit «Asabisty vybar» pad 13,5% na 13 miesiacaŭ, to z 10 000 rubloŭ vy atrymajecie 1 503 rubli dachodu. Heta plus 15%.
Bank «Rašeńnie» prapanuje 14% hadavych z kapitalizacyjaj. U vyniku efiektyŭnaja staŭka vyrastaje da 15,02%. Za hod i miesiac z 10 000 rubloŭ musić vyjści 1 627 rubloŭ prybytku. To-bok suma za hety pieryjad pavialičycca amal 16,3%.
Jość i mienš vyhadnyja prapanovy, jak, naprykład, układ «Kapitalny anłajn» ad Banka Dabrabyt. Na im niama kapitalizacyi, tamu efiektyŭnaja staŭka zastajecca niaźmiennaj — 13%. Praz hod i miesiac 10 000 rubloŭ pieratvoracca ŭ 11 408. To-bok za 13 miesiacaŭ suma pavialičycca na 14%, što taksama niamała, navat z ulikam inflacyi.
A što, kali rubiel laśnie?
Pakolki biełarusy pryvykli trymać i pieraličvać aščadžeńni ŭ dalarach, a rubiel nieadnojčy rezka abiasceńvaŭsia, my padličyli, da jakoha kursu zaduma pakłaści hrošy na rublovy depazit budzie zastavacca vyhadnaj u pieraliku na valutu.
Pa ciapierašnim kursie 10 000 rubloŭ — heta kala $3500.
U siarednim praz 13 miesiacaŭ 10 tysiač rubloŭ pieratvoracca ŭ 11 500 rubloŭ. Atrymlivajecca, što ŭ dalaravym vymiareńni «kursam biasstratnaści» budzie kala 3,285 rubla za dalar. Heta kurs, pry jakim, abmianiaŭšy 11 500 rubloŭ, vy atrymajecie tyja samyja $3500, što možacie nabyć siońnia za 10 000 rubloŭ.
A moža być i zusim inakš
Pry hetym, jak pakazvaje praktyka apošnich hadoŭ, kurs moža davoli istotna źmianicca i ŭ bok umacavańnia rubla. Praŭda, ciapier dalar i tak znachodzicca na nizkim uzroŭni, tamu dalejšaje prykmietnaje ŭmacavańnie rubla vyhladaje małavierahodnym.
Tyja, chto nie pabajaŭsia pakłaści rubli na 13‑miesiačny biezadzyŭny ŭkład u krasaviku 2024 hoda, letaś atrymali dadatkovy bonus pry abmienie. Aproč taho, staŭki tady byli krychu vyšejšyja: 14,1—15,9%.
Voś jak vyhladała vyhada z ulikam umacavańnia rubla na našym minułahodnim prykładzie. Na 24 krasavika 2024 hoda kurs Nacbanka składaŭ 3,23 rubla za dalar. Tady 10 000 rubloŭ raŭnialisia $3096.
Praz 13 miesiacaŭ (u mai 2025 hoda) dalar kaštavaŭ kala 3,01 rubla. Atrymlivajecca, što sami pa sabie 10 000 rubloŭ stali ekvivalentnyja $3322.
A pralažaŭšy 13 miesiacaŭ na biezadzyŭnym depazicie, suma pieratvaryłasia ŭ 11 562—11 813 rubloŭ, abo ŭ $3841—$3924.
Kamientary