Pakul Pucin zmahajecca z «kalektyŭnym Zachadam» i viadzie vajnu, jaho ŭłasnyja dzieci z malenstva akružany zachodnimi vychavacielami. Pierad imi pastaŭlena zadača z samych rańnich hadoŭ vymuštravać chłopčykaŭ da moŭnaha ŭzroŭniu «adukavanych jeŭrapiejcaŭ». Na ŭtrymańnie hetaha piersanału siamja traciła i praciahvaje tracić sotni tysiač dalaraŭ u hod.
Žurnalisty-rasśledavalniki prajekta «Sistema» atrymali dostup da dakumientaŭ i pierapiski za pieryjad 2017—2026 hadoŭ, jakija tyčacca najmu zamiežnych śpiecyjalistaŭ dla vychavańnia synoŭ Uładzimira Pucina i Aliny Kabajevaj. Bolšaja častka hetych źviestak źmiaščajecca ŭ listach na paštovuju skryniu, jakoj karystajucca Alesia Fiedzina i Kaciaryna Hałavačova — stryječnyja siostry Aliny Kabajevaj.
Žurnalisty śćviardžajuć, što pravieryli dakładnaść i praŭdapadobnaść atrymanych źviestak niekalkimi sposabami i źviazalisia ź fihurantami pierapisak. Dźvie ź ich paćvierdzili infarmacyju, vykładzienuju ŭ dakumientach.
Zhodna z dakumientami, spravami, źviazanymi z najmam zamiežnych huviernioraŭ i nastaŭnikaŭ dla małodšych dziaciej Pucina, zajmajucca Fiedzina i Hałavačova. Pieršaja vystupaje jak pradstaŭnica siamji i pieradaje pažadańni pa vychavaŭčym pracesie, a druhaja kuryruje finansavyja i arhanizacyjnyja pytańni.
Imiony baćkoŭ, dla jakich nasamreč najmajuć huviernantak, ni ŭ dakumientach, ni ŭ pierapiskach nie raskryvajucca: pra ich pišuć u treciaj asobie, nazyvajučy «siamjoj» abo «baćkami». Kontrahienty siaścior Kabajevaj pa pierapiscy — heta supracoŭniki źviazanych ź siamjoj afšoraŭ, pamočniki Kabajevaj, inšyja jurydyčnyja kampanii, a taksama ahienctvy pa padbory elitnaha piersanału.
Asablivaści vychavańnia
Pavodle infarmacyi z raniejšych daśledavańniaŭ, u Pucina i Kabajevaj dvoje sumiesnych dziaciej — Ivan, 2015 hoda naradžeńnia, i Uładzimir, 2019-ha.
Zamiežnych vychavacielaŭ siamja pačała šukać jašče ŭ 2017 hodzie, kali Ivanu nie było i dvuch hadoŭ. Užo ŭ 2018 hodzie ŭ raskładzie trochhadovaha Vani byli anhlijskaja i niamieckaja movy, a taksama muzyka.
Jak vynikaje sa stenahramy sustrečy Alesi Fiedzinaj z huviernantkami ŭ 2019 hodzie, da čatyroch hadoŭ Ivan pavinien byŭ być pastajanna pahružany ŭ «moŭnuju vannu». Jaho anhlijskaja havorka pavinna była być źviaznaj, jak «mova hramatnaha jeŭrapiejca». Da navučańnia niamieckaj movie vyłučalisia padobnyja patrabavańni.
Huvierniory nie tolki vučyli movie, ale i kłapacilisia pra dzicia: tak, nastaŭnica anhlijskaj movy Amanda S. paralelna z apuskańniem trochhadovaha Vani ŭ moŭnaje asiarodździe pavinna była sačyć za tym, kab bulba ŭ talercy była raźmiataja, a bulon całkam pakryvaŭ makarony.
U 2019 hodzie huviernioraŭ užo nastrojvali na padrychtoŭku chłopčyka da škoły. Adnak, jak adznačajuć aŭtary, na hety momant niama źviestak pra toje, kab chtości ź dziaciej Pucina pajšoŭ u ahulnaadukacyjnuju škołu razam ź inšymi dziećmi.
U apošnija niekalki hadoŭ repietytaraŭ najmali ŭžo małodšamu bratu Vani — Vovie. U pierapiskach i dakumientach ad 2021—2022 hadoŭ jaho nazyvali «maleńki» — chłopčyku tady nie było i troch hadoŭ.
Jak praviła, u adzin pieryjad času z adnym dziciom pracavali prykładna 4—6 čałaviek: častka adnačasova, častka źmianiajučy adzin adnaho. Pracadaŭcy pamiž saboj nazyvali huviernantak «brytancami» abo «niemcami» ŭ zaležnaści ad movy, jakuju jany vykładali. Pierad huvierniorami stajała abjomnaja zadača: stvarać dziciaci moŭnaje asiarodździe i załučać jaho ŭ zaniatki ŭ hulniavoj formie.
Chto vychavacieli
Jak śćviardžajuć aŭtary, za apošnija vosiem hadoŭ u siamji prezidenta i byłoj alimpijskaj čempijonki pracavali nie mienš za 20 zamiežnych huviernioraŭ i huviernantak. Siarod ich hramadzianie Vialikabrytanii, PAR, Novaj Ziełandyi, Hiermanii, Aŭstryi, Irłandyi. «Sistemie» viadomyja imiony, proźviščy i pašpartnyja danyja ŭsich hetych supracoŭnikaŭ, ale redakcyja nie raskryvaje ich ź mierkavańniaŭ abarony piersanalnych danych.
Žurnalisty adznačajuć, što jany zmahli znajści źviestki tolki pra adnu rasijskuju nastaŭnicu, Palinu T., jakaja vučyła Ivana muzycy i znajomiła jaho ŭ tym liku z tvorami Siarhieja Prakofjeva i Mikałaja Rymskaha-Korsakava.
Umovy pracy
Žurnalisty taksama aznajomilisia z paŭtara dziasiatkam kantraktaŭ, jakija ŭ roznyja hady dasyłalisia budučym supracoŭnikam dla podpisu. Na dakumiencie stajać imiony bakoŭ: jak praviła, heta sam supracoŭnik i Alesia Fiedzina ŭ roli najmalnika.
Niekatoryja punkty hetaj damovy całkam łahičnyja dla piersanału zamožnaj siamji: zabiaśpiečvać adukacyjny praces, nie pić i nie kuryć na pracy, sačyć za źniešnim vyhladam padapiečnaha i pryjomam lekaŭ, a taksama nie abmiarkoŭvać z trecimi asobami pracu i ničoha nie publikavać pra jaje ŭ sacyjalnych sietkach.
U pracoŭny čas zabaroniena karystacca hadžetami (kali tolki heta nie patrebna dla navučańnia), a taksama vieści nie ahavoranuju zahadzia fota– i videazdymku. Piersanał pavinien apranacca achajna i nie vykarystoŭvać parfumu ci dezadaranty z mocnym pacham.
Niekatoryja ŭmovy davoli suvoryja i vydajuć śpiecyfičnyja aściarohi siamji — asabliva ŭ toj častcy, jakaja tyčycca zdaroŭja.
Tak, supracoŭnik, jaki padpisaŭ kantrakt, abaviazany prachodzić miedycynskaje abśledavańnie. Heta dyspansieryzacyja pavinna bolš-mienš adpaviadać normam rasijskich zakonaŭ ab nieabchodnych dla pracy ź dziećmi abśledavańniach, ale pry patrebie tudy mohuć dadać dadatkovyja analizy. Abśledavańnie supracoŭniki prachodziać raz u hod (jak praviła, heta klinika «Sahaz» u Sankt-Pieciarburhu) i kožny raz, kali supracoŭnik vyjazdžaje za miežy miesca pracy i viartajecca nazad.
Chvareć na hetaj pracy vielmi niepažadana. Pracadaŭca apłačvaje tolki šeść dzion balničnaha za paŭhoda. Kali vyśvietlicca, što ŭ supracoŭnika infiekcyjnaje zachvorvańnie abo lubaja inšaja chvaroba, jakaja moža paŭpłyvać na jaho pracu bolš čym na try tydni, huvierniora mohuć zvolnić adnym dniom.
Supracoŭniku dajuć kvateru abo pakoj u haściničnym numary. Pry hetym najmalnik papiaredžvaje: u kvateru (abo numar) u luby momant mohuć padsialić jašče adnaho čałavieka. Adzinaje, što harantuje pracadaŭca — asobny pakoj dla kožnaha supracoŭnika i asobnuju prybiralniu z dušam. Piersanału apłačvajuć telefon, haz, elektryčnaść i internet, akramia padpisak na stryminhavyja kanały i asabistych mižnarodnych zvankoŭ.
U vyvučanych «Sistemaj» pierapiskach niekalki razoŭ zhadvajecca «vioska» abo «les»: vidavočna, havorka idzie pra žyćcio pablizu prezidenckaj rezidencyi na Vałdai. Supracoŭnikam apłačvajuć darohu da rezidencyi z Maskvy ci Sankt-Pieciarburha (bilety da čyhunačnaj stancyi Uhłoŭka), a taksama bilety ŭ Sočy, kali siamja pierajazdžaje tudy. Samastojny vyjezd u horad z «siamiejnaha kompleksu» niemahčymy.
U kantrakcie kožnaha vychavaciela prapisany žorstkija abmiežavańni na peŭnyja temy:
«Nikoli nie naviazvać Padapiečnamu svaje relihijnyja, palityčnyja ci ideałahičnyja pohlady. Nie zakranać temy seksualnych uzajemaadnosin abo seksualnaha vychavańnia, nie ŭzhadniŭšy heta papiarednie z Najmalnikam. Ni pry jakich abstavinach nie zakranać temy, źviazanyja z ŁHBT».
Akramia hetaha, ad huviernantak patrabujecca štodzionnaje zapaŭnieńnie spravazdač ab praviedzienym ź dziciom časie. Jany zajmajuć niekalki staronak padrabiaznaha pieraliku aktyŭnaściaŭ, z fotazdymkami i prykładami. Asobna dla maleńkaha Vani nastaŭniki zapaŭniali ceły «trekier» dasiahnieńniaŭ.
Apłata pracy
Kožny supracoŭnik padpisvaje dźvie damovy ab pracy.
Pieršaja, u jakoj padrabiazna raśpisany ŭmovy žyćcia i vychavańnia naščadkaŭ, padpisvajecca z najmalnikam — pradstaŭnikom siamji. Jak praviła, im vystupaje Alesia Fiedzina. Dzicia ŭ hetym kantrakcie nazyvajecca «Padapiečnym». U adnym z dakumientaŭ, datavanym 2019 hodam, padapiečny nazvany pa imieni: «Ivan Fiedzin». Nasamreč syna Alesi Fiedzinaj kličuć inakš.
U hetaj damovie i ŭkazvajecca realny zarobak supracoŭnika. Suma ŭ kožnaha indyvidualnaja i zaležyć ad asabistych damoŭlenaściaŭ, ale paradak prykładna adnolkavy. Tak, u 2019 hodzie apłata vychavańnia «Ivana Fiedzina» składała 1400 jeŭra za 40 hadzin pracy na tydzień. U paźniejšych damovach fihurujuć padobnyja sumy: naprykład, 1500 funtaŭ sterlinhaŭ za 60 hadzin pracy na tydzień.
Druhi kantrakt zamiežnik zaklučaje z rasijskaj jurydyčnaj asobaj: «Instytutam prafiesijnaj pierapadrychtoŭki Mižnarodnaha miedycynskaha centra «Sahaz»» (radziej — z samim MMC «Sahaz»). Pasada, ukazanaja ŭ hetaj pracoŭnaj damovie, — «viadučy pierakładčyk». Takoje aficyjnaje pracaŭładkavańnie nieabchodna dla taho, kab supracoŭniki siamji mahli atrymlivać dazvoły na pracu i vizy ŭ Rasii jak «vysokakvalifikavanyja śpiecyjalisty» (VKS).
Status VKS nie prosta dazvalaje atrymać dazvoł na pražyvańnie dla zamiežnika: za takoha śpiecyjalista kampanija-pracadaŭca amal nie płacić u biudžet sacyjalnych uznosaŭ. Aficyjny akład, jaki paznačany ŭ damovie bolšaści huviernantak z «Sahazam», — 167 tysiač rasijskich rubloŭ u miesiac na 2020 hod (na toj momant prykładna $2300—2500). Tady heta było minimalnym zarobkam, jaki dazvalaŭ mihracyjnym orhanam uchvalić status VKS.
U bolšaści vypadkaŭ reštu svajho zarobku supracoŭniki atrymlivali na rasijski ž rachunak ad hetaj ža kampanii: prosta bolšaja častka zarobku aficyjna vypłačvałasia jak «premija», i jaje pamier zaležaŭ ad kolkaści realna adpracavanych dzion, balničnych, adpačynkaŭ i hetak dalej.
Žurnalisty vyvučyli apłatnyja viedamaści i padličyli, što za žnivień 2022 hoda piaci supracoŭnikam tolki na aficyjnyja rasijskija rachunki vypłacili kala $31800 — u hetuju sumu nie ŭvachodziać hrošy, jakija mahli addavacca najaŭnymi abo pieravodzicca na zamiežnyja rachunki.
U 2020 hodzie ŭ pierapiscy abmiarkoŭvalisia płany ŭkamplektavańnia štata niań na bližejšy čas. Pavodle acenki Hałavačovaj, siamja płanavała ŭtrymlivać 5—6 supracoŭnikaŭ z akładam kala $7000, što abychodziłasia b u sumu minimum $30 tysiač štomiesiac, abo kala $400 tysiač u hod.
Jak śćviardžajuć rasśledvalniki, pa stanie na studzień 2026 hoda ŭ siamji Pucinych pracavali jak minimum try zamiežnyja niani: hramadzianka Bośnii i Hiercahaviny Sofja B., hramadzianka Hiermanii Iren E. i hramadzianka PAR Kerał R. Sumarna ŭ studzieni im vypłacili bolš za $45 tysiač (biez uliku mahčymych dadatkovych vypłataŭ). Miarkujučy pa bankaŭskich vypiskach, jakija jość u rasparadžeńni «Sistemy», adna tolki Kerał R. zarabiła ŭ pieryjad sa studzienia pa maj 2026 hoda bolš za $30 tysiač.
Ciapier čytajuć
«Pra jaki sajuz možna havaryć?» Łukašenka ŭ Astanie raskrytykavaŭ Rasiju za naviazvańnie utylzboraŭ15
Kamientary
Ťfu,pozoriŝie…