19‑hadovy kursant Akademii MUS nabiŭ sabie na łbie mišeń i pajechaŭ šturmavać Zaparožža. Ideja spracavała
Ivan Łamanosaŭ nie dažyŭ da svajho pieršaha surjoznaha jubileju. Heta ŭžo druhi viadomy vypadak, kali biełaruski kursant adpraŭlajecca na śmierć pa ŭłasnaj inicyjatyvie.
Ivan Łamanosaŭ naradziŭsia ŭ krasaviku 2006 hoda ŭ vioscy Łuhavaja Słabada zusim pobač ź Minskam.
U 2022 hodzie chłopiec sprabavaŭ pastupić u staličnuju Akademiju avijacyi i ŭ momant padačy dakumientaŭ paśpieŭ dać intervju žurnalistam.
«Učorašni školnik Ivan Łamanosaŭ pryjšoŭ u akademiju z baćkam, jaki dapamoh synu z vybaram kirunku.
— Padaju dakumienty na śpiecyjalnaść «techničnaja ekspłuatacyja avijacyjnaha abstalavańnia», — ścisła adkazvaje chłopiec.
— A kudy iści jašče? — dadaje baćka abituryjenta. — Dla chłopca techničnaja adukacyja nie budzie lišniaj. Niekatoryja mužčyny hajku ad płaskahubcaŭ nie adroźniać.
— Nakidny ad tarcovaha kluča adroźnić nie mahu, — uśmichajecca chłopiec.
— Voś, a tak čałaviek budzie viedać, jak jano pracuje, nie budzie pytacca: «Tat, a jak heta adkrucić?» Ja ŭ hetym raźbirajusia, ale ŭsio rastłumačyć nie zmahu. A tut da hetaha staviacca bolš dbajna, raskładuć usio, — razvažaje mužčyna. — Z avijacyjaj u nas nichto z svajakoŭ nie źviazany. Tolki susied pracuje lotčykam, dobry prykład», — cytavała siamiejstva ahienctva «Minsk-Naviny».
Ale, jak možna zrazumieć z dalejšych padziej, u Akademiju avijacyi Łamanosava nie ŭziali. Ivan niedzie pierabiŭsia hod, a ŭ 2023‑m pastupiŭ u Akademiju MUS — tudy biaruć amal usich achvotnych.
Sacyjalnyja sietki chłopca ŭ toj momant — jak u mnohich kursantaŭ — vyčyścilisia, staronka «Ukantakcie» stała pustoj.
U kancy maja 2025 hoda Ivan pytaŭsia pa čatach, kolki kaštuje pajezdka ź Biełarusi na terytoryju Ukrainy. Jamu padkazali, što za darohu ŭ Kijeŭ praz Varšavu daviadziecca zapłacić $200.
Urešcie Łamanosaŭ pajechaŭ va Ukrainu ź inšaha boku. Dakładna nieviadoma, kali mienavita i čamu, ale nieŭzabavie chłopiec apynuŭsia ŭ rasijskaj armii, ale ŭžo 22 vieraśnia 2025 hoda pajšoŭ na bajavoje zadańnie pad Zaparožžam razam z rasijaninam, jaki ŭrešcie zahinuŭ. Ad jaho svajakoŭ i stała viadoma, što toj adpraŭlaŭsia ŭ boj «z maładym biełarusam z pazyŭnym «Łamanos». Hety «Łamanos» i jość 19‑hadovy Ivan Łamanosaŭ.
Jaho svajaki paćvierdzili, što Ivan — «źnikły bieź źviestak». Heta taki eŭfiemizm, jaki va ŭmovach rasijskich miasnych šturmaŭ u bolšaści vypadkaŭ aznačaje, što sałdata likvidavali siły abarony Ukrainy.
Da momantu svajoj vierahodnaj śmierci Łamanosaŭ užo mała nahadvaŭ kursanta Akademii MUS. Jon nabiŭ sabie tatuiroŭku na ŭsiu šyju na łacinskaj movie, dzie adhadvajecca tolki nižniaje słova (napisanaje z pamyłkaj): «Rhutenia». «Ruthenia» heta łacinski adpaviednik «Rusi».
A taksama, pa-prarocku, nabiŭ sabie mišeń na łbie.
Admietna, što heta ŭžo druhi vypadak, kali na vajnie hinie žaŭtaroty biełaruski kursant. Niadaŭna «Naša Niva» paviedamlała pra 18‑hadovaha Ramana Špaka z Vajskovaj akademii, čyj los u ahulnych rysach supadaje ź losam Łamanosava.
Čytajcie taksama: 18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ3
Kamientary
Žart zaličany ✅