Litoŭskaja kampanija Kesko Senukai zajaviła ab kančatkovym prodažy akcyj biełaruskaj sietki OMA
Kampanija kaža, što prodaž zaciahnuŭsia praź dziejańni biełaruskich uładaŭ.
Litoŭskaja hrupa kampanij pa handli budaŭničymi, ramontnymi i bytavymi tavarami Kesko Senukai zajaviła, što letaś pradała 50% akcyj handlovaj sietki OMA ŭ Biełarusi, paviedamlaje LRT.
«U 2022 hodzie, z pačatkam rasijskaj ahresii va Ukrainie, my spynili lubyja biznes-suviazi, łancužki pastavak i supracoŭnictva ŭ Biełarusi. (…) Praces prodažu akcyj OMA, inicyjavany adrazu ž, z-za dziejańniaŭ biełaruskich uładaŭ byŭ realizavany ŭ minułym hodzie paśla padpisańnia damovy ab prodažy akcyj», — zajaviła ŭ kamientary BNS kiraŭnica adździeła kamunikacyj Kesko Senukai Luboŭ Zajcava.
Kampanija pakul nie kamientuje, kamu i za jakuju sumu pradała akcyi OMA, adnak paabiacała paviedamić pra heta paźniej.
U spravazdačy hrupy za 2025 hod śćviardžajecca, što ŭ minułym hodzie jaje dachody ŭ Biełarusi vyraśli na 2,1% da 140,2 młn jeŭra, a daččynaje pradpryjemstva OMA na kaniec hoda mieła kredytnuju liniju i zakłała bankam zapasy i majomaść na sumu 17,85 młn jeŭra.
«Zhodna z abaviazkovymi standartami ŭliku, OMA ŭsio jašče była ŭklučana ŭ našy kansalidavanyja spravazdačy. Tamu, adkazvajučy na pytańnie, za što atrymany dachody ŭ Biełarusi, adkaz nastupny: my nie atrymlivali nijakich dachodaŭ, ich atrymała OMA», — adznačyła pradstaŭnica Kesko Senukai.
Tym nie mienš, u spravazdačy hrupy za 2025 hod niama infarmacyi pra ŭhody OMA ci inšych kampanij hrupy, źviazanyja z akcyjami. Na kaniec 2025 hoda Kesko Senukai Lithuania praz daččynuju kampaniju SPC Holding vałodała 50% plus adnoj akcyjaj kampanii Romos Holdingas, a apošniaja mieła 100% akcyj OMA, śviedčyć dakumient.
U mai 2022 hoda Kesko Senukai paviedamiła ab prypynieńni dziejnaści ŭ Biełarusi i vychadzie sa składu akcyjanieraŭ OMA. Tady paviedamlałasia, što praces prodažu pakieta z 50% akcyj, jakim kampanija vałodała ŭskosna, jašče nie zavieršany, a skončyć jaho płanavałasia za niekalki miesiacaŭ.
Ciapier čytajuć
Małady rabotnik «Minsk-Areny» pavinien zapłacić 71 miljon dalaraŭ7
Małady rabotnik «Minsk-Areny» pavinien zapłacić 71 miljon dalaraŭ
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach1111
Kamientary
Poka ja vižu tolko obratnyje riezultaty ot podobnoho roda sankcij i pročich principialnych, no nie łohičnych riešienij