Radzilnyja damy spaborničajuć, u kaho 3 lipienia narodzicca bolš dziaciej
U chod iduć usie mahčymyja chitryki.
Supracoŭnik adnaho ź biełaruskich radzilnych damoŭ raspavioŭ «Našaj Nivie», što jašče ŭčora kiraŭnictva pastaviła zadaču: 3 lipienia pavinna naradzicca jak maha bolš biełarusaŭ.
— Skazali: «Nu vy ž razumiejecie, zaŭtra vialikaje śviata, usie radzilnyja damy buduć spaborničać, kab naradziłasia bolš dziaciej. Tamu my pavinny pastaracca, kab vyniki byli pryhožyja».
Surazmoŭca adznačaje, što ŭ jaho radzilni jość vypadki i stymulacyi rodaŭ. Ciažarnych uhavorvajuć pačać naradžać lubym koštam u «pryhožuju datu». Sprabujuć matyvavać padarunkami — maŭlaŭ, potym pryjedzie niechta z čynoŭnikaŭ vinšavać.
Pieršuju apieracyju zrabili ŭžo ŭ noč na 3 lipienia, kab možna było potym u spravazdačy paznačyć, što dzicia naradziłasia ŭ pieršyja chviliny Dnia Niezaležnaści.
Doktar kaža, što heta nie novaja praktyka: štohod 3 lipienia źjaŭlajecca dla radzilnych damoŭ Biełarusi samaj ideałahična važnaj dataj.
Darečy, letaś Ministerstva achovy zdaroŭja chvaliłasia, što ŭ Dzień Niezaležnaści ŭ krainie naradzilisia ažno 173 dziciaci, a heta bolš za siaredni pakazčyk za dzień.
Treba adznačyć i cikavuju tendencyju: ahułam naradžalnaść u Biełarusi padaje, ale ž mienavita 3 lipienia štohod nazirajecca pavieličeńnie kolkaści novanarodžanych. U 2024 hodzie ich było 158, u 2023‑m — 118.
Na druhim miescy pa značnaści idzie navahodniaja noč.
Prapahanda sapraŭdy lubić vykarystoŭvać dziaciej, jakija naradzilisia ŭ pieršyja chviliny niejkaha śviatočnaha dnia. Časam dachodzić da absurdu. Naprykład, u 2023 hodzie praŭładnyja ŚMI z zachapleńniem pisali pra Juliju Maciušeŭskuju, jakaja naradziła dačku ŭ pieršuju chvilinu hoda — adrazu, jak pasłuchała navahodni zvarot Łukašenki.
Vinšavać žančynu ŭ «Maci i dzicia» pryjechała Natalla Ejsmant. U videa Puła pieršaha historyja vyhladała maksimalna patryjatyčnaj. Atrymlivałasia, što Julija paprasiła aniestezijołaha ŭklučyć zvarot Łukašenki — a dzicia tak było ŭražana jaho pramovaj, što paśpiašałasia naradzicca.
Ale pa druhim intervju žančyny možna zrazumieć, što situacyja była inšaj. Jaje špitalizavali 29 śniežnia, bo byli miedycynskija pakazańni. Płanavali zrabić kiesarava siačeńnie 4 studzienia, ale ŭ vyniku zrabili ŭ navahodniuju noč — dyk tak udała, što ŭ miedycynskich dakumientach źjaviłasia pryhožaje 00.01.
U Minsku cicha začynili raddom №3 na vulicy Lenina
Zrabić EKA za košt dziaržavy možna budzie tolki ŭ adnym miedcentry. A druhuju biaspłatnuju sprobu daduć nie ŭsim
U biełaruskich radzilniach niama preparatu, jaki nieabchodny novanarodžanym
U biełaruskich radzilniach biaruć u zakładniki niemaŭlat, jakich naradzili mihrantki, kab spahnać z baćkoŭ hrošy? Raźbirajemsia
Ciapier čytajuć
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks6
Kamientary