U biełaruskich radzilniach niama preparatu, jaki nieabchodny novanarodžanym
Zhodna ź biełaruskimi pratakołami, usim niemaŭlatam pavinny ŭvodzić vitamin K adrazu paśla naradžeńnia. Ale kanakijonu niama nie pieršy miesiac ni ŭ radzilniach, ni ŭ aptekach krainy.
Kanakijon (vitamin K1) uvodziać dla prafiłaktyki hiemarahičnaj chvaroby novanarodžanych — niebiaśpiečnych kryvaciokaŭ, jakija mohuć uźniknuć praz deficyt vitaminu K u dziciaci. Jon dapamahaje piečani vypracoŭvać faktary zhusańnia kryvi i źnižaje ryzyku ŭnutranych i vonkavych kryvaciokaŭ.
Zastacca bieź vitaminu K asabliva niebiaśpiečna dzieciam, jakija znachodziacca ŭ zonie ryzyki — naprykład, niedanošanym.
Žurnalistka «Našaj Nivy» nazvałasia budučaj maci i źviarnułasia ŭ dziesiać roznych radzilnych damoŭ Biełarusi. Usiudy paćvierdzili — vitaminu K (kanakijonu) ŭ ich niama. Kali baćki majuć mahčymaść, lepš prynieści svoj.
Supracoŭnik adnoj z radzilniaŭ raskazaŭ, što vitaminu K u ich niama ažno ź lipienia:
«Čamu niama? Dobraje pytańnie. Štohod radzilni padajuć spravazdačy, kolki dziaciej sioleta naradziłasia — i zychodziačy z hetych danych pavinny prykładna raźličyć, kolki jakich miedycynskich srodkaŭ nieabchodna zakupić na budučy hod. Viedaju, što letam kanakijon byŭ u dźviuch aptekach u Baranavičach — niekatoryja baćki tudy pa jaho jeździli».
Na hety momanta kanakijonu niama va ŭsich aptekach Biełarusi. Surazmoŭca kaža, što tyja baćki, jakija viedajuć i razumiejuć, nakolki nieabchodny vitamin K, samastojna nabyvajuć preparat ci ŭ Jeŭropie, ci ŭ biełaruskich pierakupščykaŭ.
Pierakupščyki prosiać za ŭpakoŭku ź piaci ampuł ad 180 da 230 rubloŭ. Dla adnaho dziciaci nieabchodna adna ampuła — za jaje prosiać 46 rubloŭ.
Jašče ŭ adnoj radzilni vykazali spadziavańni, što kanakijon źjavicca ŭ śniežni. Adnak pakul hetaha harantavać nie mohuć, dakładnaja data pastaŭki nieviadomaja.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»23
Kamientary