Baskietbalist zbornaj Biełarusi spjanu pabiŭsia ŭ Rasii ź siamiejnaj paraj, jakaja jaho padvoziła. Skončyłasia kryminałkaj

Biełaruski baskietbalist Andrej Stabroŭski ŭlapaŭsia ŭ Rasii ŭ niepryhožuju historyju. Jana adbyłasia ŭ 2023-2024, ale viadoma pra jaje stała tolki ciapier.

Andrej Stabroŭski — viadomy biełaruski baskietbalist. Jon naradziŭsia ŭ Oršy ŭ 1997 hodzie. U 2014 pa 2023 hod byŭ u sistemie minskich «Cmokaŭ» (pierajmienavanyja ŭ «Minsk» u 2022). U 2019—2022 hadach Stabroŭski hulaŭ i za zbornuju Biełarusi.

U studzieni 2023 hoda biełarus padpisaŭ kantrakt z kłubam «Rusičy» z rasijskaha Kurska. Ale ŭžo nieŭzabavie ŭsio palacieła pad adchon.

4 lutaha 2023 hoda, prykładna a 5:20 ranicy, pjany spartoviec trapiŭ u kanflikt kala handlovaha centra ŭ Kursku. Nieznajomyja Stabroŭskamu muž i žonka prapanavali padkinuć jaho na mašynie.

Pa darozie Stabroŭski i mužčyna-kiroŭca paspračalisia nakont taho, dzie treba spynić mašynu. Chutčej za ŭsio, dajšło da rukapašnaj — bo žančyna pasprabavała raściahnuć udzielnikaŭ kanfliktu.

I tut biełaruski baskietbalist nanios joj udar kułakom u tvar. Žančyna straciła raŭnavahu, upała na śpinu, udaryłasia patylicaj ab asfalt i atrymała zakrytuju čerapna-mazhavuju traŭmu (pierałom patylicavaj kostki). Paškodžańnie paličyli ciažkaj škodaj zdaroŭju, niebiaśpiečnaj dla žyćcia.

Pavialičyć

Andrej Stabroŭski. Fota: minskbasket.by

Nieviadoma, ci Stabroŭski padčas śledstva siadzieŭ u SIZA, ale na sud jon pryjšoŭ z-pad chatniaha aryštu. 13 śniežnia 2023 hoda Leninski rajonny sud Kurska pryznaŭ baskietbalista vinavatym pavodle č. 1 st. 111 KK RF (naŭmysnaje pryčynieńnie ciažkaj škody zdaroŭju) i pryznačyŭ 2 hady kałonii. Tady biełarusa ŭziali pad vartu.

Spartsmien i jaho abaroncy asprečyli prysud — jany nastojvali, što ŭdar byŭ instynktyŭnym i nieaściarožnym, a ciažkaja traŭma hałavy ŭźnikła nie niepasredna ad udaru, a ad padzieńnia i ŭdaru ab asfalt.

I Kurski abłasny sud pavieryŭ Stabroŭskamu. Na apielacyjnym pasiadžeńni sudździa pahadziŭsia, što pramych dokazaŭ namieru pryčynić mienavita ciažkuju škodu zdaroŭju ŭ spravie nie było, kanflikt uźnik nie z paciarpiełaj, a ź jaje mužam, udar byŭ adzinkavy i sam saboju pryčyniŭ tolki lohkuju škodu. U vyniku abvinavačvańnie pierakvalifikavali na pryčynieńnie ciažkaj škody zdaroŭju pa nieaściarožnaści — č. 1 st. 118 KK RF.

Z ulikam taho, što ŭ Stabroŭskaha raniej nie było sudzimaściaŭ, biełaruski baskietbolny kłub «Minsk-2006» i Respublikanski centr alimpijskaj padrychtoŭki dali jamu pazityŭnyja charaktarystyki, a jon sam pamiryŭsia z paciarpiełaj i zapłaciŭ joj kala $10 tysiač kampiensacyi, prysud byŭ davoli łahodny — štraf pamieram kala $800.

Stabroŭskaha vyzvalili ŭ zale suda. Paśla vyzvaleńnia spartsmien viarnuŭsia ŭ Biełaruś, a ŭ lipieni 2024 hoda znoŭ dałučyŭsia da BK «Minsk», za jaki vystupaje i ciapier.

• 0
• 1
• 2
• 9
• 1
• 0
• 5
• 0