«Dumka, što niepadaloku niešta ŭzarvali, tryvožyć». Biełarusy, jakija žyvuć u Rasii, raskazali pra ciapierašniuju atmaśfieru tam

Maskva: «Užo chodziać razmovy pra adjezd, ale pakul niesurjoznyja»

Barys (imia źmieniena) amal hod žyvie ŭ Maskvie, pracuje ŭ ofisie:

— U mianie niama aŭtamabila, karystajusia hramadskim transpartam. Ale ŭžo paśpieŭ zaŭvažyć padaražańnie ŭ taksi, choć i nie krytyčnaje. Havorka idzie tolki pra Maskvu: u rehijonach situacyja moža vyhladać bolš dramatyčna.

Z abmierkavańniaŭ paliŭnaj temy, jakija ja čuŭ, mahu vyłučyć nastupnaje:

• Uładalniki elektryčak i hibrydaŭ nie mocna adčuli na sabie bambiožki NPZ.
• U samoj Maskvie situacyja niastrašnaja. Čuŭ pra čerhi na paŭhadziny, ale heta, chutčej, abumoŭlena panikaj, čym realnym deficytam.
• U rehijonach situacyja bolš surjoznaja. Čuŭ pra čerhi bolš čym na try hadziny, pra prodažy pa pryncypie cotnych/niacotnych numaroŭ u roznyja dni.

Situacyja ź internetam značna pahoršyłasia. Niedzie da siaredziny lipienia možna było karystacca biełaruskaj simkaj, i VPN dla sacsietak nie byŭ patrebny. Zaraz heta ŭžo «vypraŭlena». Z VPN taksama idzie baraćba, niekatoryja prahramy ź im pierastajuć pracavać abo pracujuć ź pierabojami.

Karparatyŭny VPN pracuje dobra, možna spakojna karystacca Telegram i inšymi sacsietkami. Pa internet-złučeńni roźnicy ź Biełaruśsiu asabliva nie adčuvaju, akramia, zrazumieła, resursaŭ, zabłakavanych u RF.

Mnie pašancavała, ja žyvu ŭ toj častcy Maskvy, dzie prylotaŭ niama. Ale niekatorym kaleham na pracy davodziłasia čuć i bačyć pryloty dy ich nastupstvy. Pamiž imi ŭžo iduć razmovy pra adjezd z Maskvy, ale pakul niesurjoznyja.

Pierajazdžać pakul nie płanuju. Adzinaje, što moža mianie na heta padšturchnuć — abviaščeńnie mabilizacyi ŭ Biełarusi. Tady vybaru asabliva nie zastaniecca: pryjdziecca źjazdžać u krainu, dzie mianie nie dastanie vajenkamat.

Sankt-Pieciarburh: «Znachodžu zapraŭki, dzie niama čerhaŭ»

Alaksiej (imia źmienienaje) žyvie ŭ Sankt-Pieciarburhu kala dvuch hadoŭ, pracuje taksama ŭ ofisie.

— U inšych rehijonach Rasii apošnim časam nie byŭ, ale ŭ Sankt-Pieciarburhu prablemy z palivam zaŭvažyŭ. Mianie cikavić tolki 95‑ty bienzin, ale daloka nie na ŭsich zapraŭkach naohuł jość paliva. Zrešty, zdajecca, što dyzielnaha paliva bolš, čym bienzinu.

Na košt ja nie hladžu. Zapraŭlajusia ŭ asnoŭnym na AZS «Hazprama». Tydni z try tamu limit adpusku byŭ 30 litraŭ, ale paru dzion tamu znajšoŭ zapraŭku, dzie limitu nie było.

Na biahučy momant na majo žyćcio pieraboi z palivam asabliva nie paŭpłyvali. Tak, pryjšłosia pajeździć dalej, kab zapravicca, ale nie prosta kab daloka. Znachodžu zapraŭki, dzie niama čerhaŭ. U cełym usio spakojna, ničoha pryncypova nie źmianiłasia.

Pieraboi z mabilnym internetam pačalisia jašče hod tamu. U vypadku, kali nabližajucca BPŁA, jaho adklučajuć. Tendencyja zachoŭvajecca, adnak jość sajty, na jakija možna zajści navat u vypadku adklučeńnia mabilnaha internetu.

VPN u asabistych metach karystajusia štodnia, heta ŭžo «bazavy minimum». Košt 100 rasijskich rubloŭ u miesiac [kala 1,3 dalara], što zusim nie adčuvajecca.

Mabilnaje internet-złučeńnie zaraz vidavočna bolš stabilnaje ŭ Biełarusi. A voś dzie praściej pracavać ajcišniku — zaležyć, chutčej, ad śfiery, u jakoj pracuješ.

U rajonie, u jakim ja žyvu, nastupstvy ŭdaraŭ dronami niepasredna nie adčuvajucca. Adnak dumka pra toje, što niepadaloku niedzie niešta ŭzarvali, tryvožyć.

Płanaŭ viarnucca ŭ Biełaruś u mianie niama.

Jekaciarynburh: «Ludzi atrymlivajuć asałodu ad leta, hulajuć»

Andrej (imia źmieniena) užo treci hod žyvie ŭ Jekaciarynburhu, pracuje addalena:

— Zaŭvažyŭ prablemy z palivam u Jekaciarynburhu apošnim časam. Ceny źmianilisia pa-roznamu, usio zaležyć ad kampanii: niedzie +2%, niedzie +20%. U inšych častkach Rasii ja nie byvaŭ.

Pieraboi, chutčej, tyčacca papularnych vidaŭ bienzinu, 92‑ha i 95-ha, i dyzpaliva. Abmiežavańni to ŭvodziacca, to zdymajucca, usio zaležyć ad kampanii. Na mianie pieraboi asabliva nie paŭpłyvali, prosta staŭ mienš jeździć pa asabistych spravach, bolš staŭ chadzić. Dastaŭka ježy, tavaraŭ, taksi, hramadski transpart — usio hetak ža sama, roźnicy nie zaŭvažyŭ.

Ź niejkim źmianieńniem pavodzin ludziej nie sutykaŭsia, usio spakojna i cyvilna. Mahčyma, heta tolki mnie tak pašancavała.

Stacyjanarny internet tut zaŭsiody pracuje, a voś mabilny hłušać čas ad času. Ale pakolki ja pracuju addalena, to nie viedaju, kolki pa časie hetyja błakiroŭki trymajucca. Paru razoŭ sutyknuŭsia ź imi sam, surjoznych niazručnaściaŭ heta nie pryniesła.

VPN — heta, viadoma, mastcheŭ dla žyćcia ŭ Rasii. Heta baza, asabliva dla ajcišnika, jaki nie suprać vykarystoŭvać zamiežnyja štučnaintelektualnyja (AI) technałohii. Mnie jon abychodzicca prykładna ŭ 3000 rasijskich rubloŭ [kala 39 dalaraŭ] na hod.

Kali paraŭnoŭvać stabilnaść chatniaha internetu, to lepšy jon dakładna ŭ RF. A voś mabilny vyjhraje ŭ Biełarusi. Adpaviedna, addalena pracavać z-za stabilnaha chatniaha internetu praściej u Rasii. Ale kali vy lubicie vychodzić papracavać u kaviarni ci kaljannyja — lepš hetuju ryzyku zakładać i vybirać ustanovy bližej da doma.

U nas užo 3‑4 razy ŭklučalisia sireny, i adzin raz byŭ prylot drona ŭ apartamienty ŭ centry horada. Ale fon spakojny, kali nie čytać prazachodni kantent i nie prymać za čystuju manietu ŭsio, što tam pišuć. Ludzi atrymlivajuć asałodu ad leta, hulajuć, vyjazdžajuć na dačy, u horadzie arhanizujucca mierapryjemstvy.

Pra viartańnie ŭ Biełaruś ja, kaniečnie, zadumvaŭsia. Ale, na žal, zaraz kryzis pa vakansijach, i daloka nie prosta znajści choć by taki ž zarobak u RB, jak u mianie tut. A pierajazdžać na ZP u -30% plus zdymać tam kvateru — heta mocna pareža siamiejny biudžet (tut nam z žonkaj kvateru zdymać nie davodzicca). Moža, pierajechaŭ by, kali b znajšoŭ pracu dobruju, abo pabudavali b u Biełarusi kvateru ci dom.

• 0
• 0
• 0
• 1
• 0
• 0
• 0
• 0