Kali Viktaru Niafiodavu spoŭniłasia 79 hadoŭ, jon vyrašyŭ, što pryjšoŭ čas dałučycca da sportu. Da hetaha ŭ jahonym žyćci nie było ni prafiesijnych trenirovak, ni surjoznych spabornictvaŭ, ni spartyŭnych ambicyj. Jon prosta pryjechaŭ na Minskaje mora i prapłyŭ svoj pieršy kiłamietr.
Praź niekalki hadoŭ Viktar užo stajaŭ na starcie lehiendarnaha zapłyvu praz Basfor, a ciapier, u svaje 83 hady, rychtujecca da zusim novaha vyprabavańnia — Mižnarodnaha minskaha tryjatłonu, piša «Minskaja praŭda».
Viktar Niafiodaŭ — piensijanier, zvyčajny viaskovy žychar, pavodle adukacyi — radyjoinžynier. Bolšuju častku prafiesijnaha žyćcia jon pracavaŭ kanstruktaram i zajmaŭsia raspracoŭkaj elektronnych vyličalnych mašyn, pracujučy da 66 hadoŭ.
Pry hetym fizičnaj nahruzki ŭ jaho žyćci zaŭsiody chapała. Viktar žyvie ŭ vioscy pad Minskam, dzie praktyčna niemahčyma całkam vyklučyć fizičnuju pracu. Dom, učastak, aharod i zvyčajnyja haspadarčyja spravy patrabujuć pastajannaha ruchu.
— Ja fizična šmat pracavaŭ, ale sportam jak takim nie zajmaŭsia. Kali žyvieš u vioscy, fizičnaja siła pastajanna patrebna, bo zaŭsiody znachodzicca niejkaja praca. Pa-sapraŭdnamu paznajomicca sa sportam vyrašyŭ u 79 hadoŭ. Pačałosia ŭsio biez hrandyjoznych płanaŭ. Prosta pryjechaŭ na Minskaje mora, dzie prachodziŭ zapłyŭ, i pieraadoleŭ dystancyju ŭ adzin kiłamietr.
— Pieršy vopyt spadabaŭsia nastolki, što adnym startam sprava nie skončyłasia. Ahułam čatyry razy ŭdzielničaŭ u zapłyvach na Minskim mory. Zatym zachaciełasia pasprabavać što-niebudź zusim inšaje.
— Nastupnym vyprabavańniem staŭ zabieh pa leśvicach Nacyjanalnaj biblijateki Biełarusi, jaki pravodziła Fiederacyja pryhodnickich honak. Udzielnikam treba było pieraadoleć 591 prystupku, što pa nahruzcy prykładna adpaviadaje ŭzdymu na 30‑y pavierch zvyčajnaha žyłoha doma.
Mienavita hety start niečakana staŭ pavarotnym momantam u novym spartyŭnym žyćci Viktara.
Padčas zabiehu ŭ Nacyjanalnaj biblijatecy na ŭzrostavaha ŭdzielnika źviarnuŭ uvahu Dźmitryj Mielech — zasłužany majstar sportu mižnarodnaha kłasa. Jon padyšoŭ da Viktara, jany razhavarylisia, a paśla Dźmitryj staŭ jaho trenieram.
Dźmitryj Mielech raspavioŭ Viktaru ab mižnarodnych spabornictvach i ŭ niejki momant prapanavaŭ jamu zusim niečakanuju metu — pasprabavać pierapłyści Basfor.
— Kali Dźmitryj prapanavaŭ mnie Basfor, ja padumaŭ, što nie spraŭlusia. Tam vialikaja dystancyja i płyń, tamu ŭsio heta zdavałasia vielmi składanym. Adnak doma ja vyrašyŭ padrabiaźniej razabracca, što ŭjaŭlaje saboj hety zapłyŭ, i pačaŭ čytać infarmacyju ŭ Internecie. Tady i natknuŭsia na fakt, jaki całkam źmianiŭ majo staŭleńnie da prapanovy.
Akazałasia, što ŭ 2022 hodzie Basfor pierapłyŭ udzielnik 1942 hoda naradžeńnia, jaki staŭ samym uzrostavym čałaviekam na tym starcie. I tady sumnievy niečakana pieratvarylisia ŭ azart. Ja padumaŭ, što mnie budzie ŭžo 82 hady, i zahareŭsia žadańniem stać samym uzrostavym udzielnikam. Tak i źjaviłasia sapraŭdnaja meta.
Dziela hetaj mety pryjšłosia surjozna treniravacca. Padrychtoŭka da Basfora ŭžo mała nahadvała zvyčajnaje zachapleńnie płavańniem. U 2025 hodzie Viktar treniravaŭsia čatyry razy na tydzień, pastupova pavialičvaŭ nahruzku i staraŭsia nie adstavać ad značna bolš maładych spartsmienaŭ. Na starcie Viktar usio ž taki nie apynuŭsia samym uzrostavym udzielnikam. Vyśvietliłasia, što siarod płyŭcoŭ jość čałaviek starejšy za jaho. Viadoma, było nievialikaje rasčaravańnie. Viktar raźličvaŭ, što mienavita biełarus stanie samym uzrostavym udzielnikam zapłyvu, adnak admaŭlacca ad startu praz stračany rekord jon navat nie źbiraŭsia. Umovy ŭ toj dzień apynulisia daloka nie idealnymi.
«Ja pramiorz da kaściej, ale dapłyŭ»
Basfor niemahčyma paraŭnać z darožkaj u basiejnie, dzie viadomaja dakładnaja dystancyja, vada maje kamfortnuju tempieraturu, a spartsmien ruchajecca ŭ pradkazalnych umovach. U adkrytaj vadzie vynik šmat u čym zaležyć ad płyni, nadvorja i abranaj trajektoryi.
U dzień zapłyvu Viktar sutyknuŭsia adrazu ź niekalkimi składanaściami. Pavodle jaho słoŭ, płyń akazałasia vielmi słaboj, tamu raźličvać na značnuju dapamohu vady nie davodziłasia. Akramia taho, vada była vielmi chałodnaj.
— Ja tady pramiorz da kaściej. Vada była vielmi chałodnaja, a płyń akazałasia nadzvyčaj słaboj. Ale ja dapłyŭ i ŭkłaŭsia ŭ nieabchodny čas. Basfor ja pieraadoleŭ za 1 hadzinu 59 chvilin 33 siekundy.
Dla 82‑hadovaha čałavieka, jaki pačaŭ zajmacca sportam usiaho niekalki hadoŭ tamu, sam fakt pieraadoleńnia takoj dystancyi vyhladaje vielmi ŭražliva. Adnak jość jašče adna ličba, jakoj Viktar sapraŭdy moža hanarycca: na Basfory jamu ŭdałosia abahnać 382 čałavieki.
Paśla Basfora možna było b vyrašyć, što hałoŭnaja spartyŭnaja meta dasiahnutaja i ciapier narešcie možna krychu źnizić temp.
Ale ŭ Viktara atrymałasia naadvarot. U 83 hady jon upieršyniu pasprabuje siabie ŭ tryjatłonie.
Pryčym budučy start u tryjatłonie moža stać asablivym nie tolki dla samoha Viktara. Razam ź Leanidam Tałkačovym i Uładzimiram Sudzinkovym jany źbirajucca stvaryć estafietnuju kamandu, u jakoj kožnamu ŭdzielniku bolš za 80 hadoŭ.
Viktar prapłyvie adzin kiłamietr, 86‑hadovy Leanid pieraadoleje 45 kiłamietraŭ na rovary, a Uładzimir prabiažyć 10,5 kiłamietra.
U tryjatłonie Viktar Niafiodaŭ raniej nikoli nie ŭdzielničaŭ. Ciapier jaho pieršy start u hetaj dyscyplinie pavinien adbycca na Mižnarodnym Minskim tryjatłonie.
Samastojna prachodzić usie try etapy jamu nie daviadziecca. Viktar stanie častkaj estafietnaj kamandy, ale niezvyčajnaj jaje robić uzrost udzielnikaŭ.
Viktaru Niafiodavu budzie 83 hady. Leanidu Tałkačovu — 86 hadoŭ. Uładzimiru Sudzinkovu — 80. Ahulnuju dystancyju jany padzielać pamiž saboj z ulikam taho, u jakoj dyscyplinie kožny adčuvaje siabie bolš upeŭniena.
Viktar, jaki maje dośvied zapłyvu praz Basfor, voźmie na siabie płavańnie i pieraadoleje adzin kiłamietr. Leanid Tałkačoŭ pavinien prajechać 45 kiłamietraŭ na rovary, a Uładzimir Sudzinkoŭ zavieršyć estafietu dziesiacikiłamietrovym bieham.
Pavodle słoŭ Viktara, kamanda z troch udzielnikaŭ starejšych za 80 hadoŭ sama pa sabie moža stać unikalnaj historyjaj.
— Usie kažuć, što takoha jašče nie było. Kab try čałavieki starejšyja za 80 hadoŭ sabralisia i zrabili estafietu ŭ tryjatłonie, takoha, nakolki my viedajem, nie było ni ŭ Biełarusi, ni ŭ Jeŭropie.
Asabliva cikava, što pakul hetyja troje navat nie paśpieli paznajomicca asabista. Leanid Tałkačoŭ i Uładzimir Sudzinkoŭ žyvuć u Mahilovie. Viktar raskazvaje, što raniej nikoli nie sustrakaŭ ich na spabornictvach, choć sam za apošnija hady paśpieŭ pabyvać na mnostvie startaŭ.
Darečy, Viktar nie sprabuje pierakanać navakolnych, što ŭzrost isnuje tolki ŭ pašparcie. Naadvarot, jon całkam adkryta kaža pra toje, jak źmianiajecca cieła i nakolki składaniej stanovicca zachoŭvać raniejšuju fizičnuju formu.
— Ja ŭžo značna asłabieŭ. Raniej ciahlicy na nahach byli jak słupy, a ciapier heta bolš padobna na zapałki. Tamu čałavieku nieabchodna ruchacca. Kali čałaviek pierastaje ruchacca, arhanizm ličyć, što toje, čym jon nie karystajecca, jamu bolš nie patrebna. U nahach znachodziacca samyja vialikija myšcy, i kali myšačnaja tkanka sychodzić, razam ź joj my hublajem vielmi mnohaje.
Ciapier čytajuć
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca15
Kamientary