Biełarus paŭtara hoda čakaŭ PMŽ u Polščy, a potym atrymaŭ list, što jaho kartu palaka anulavali jašče čatyry hady tamu

Pieršuju kartu palaka Piotr (imia źmieniena) atrymaŭ jašče ŭ 2012 hodzie ŭ Biełarusi. Z taho času ŭ jaho žyćci mnohaje źmianiłasia. Paśla padziej 2020 hoda jon byŭ vymušany źjechać spačatku ŭ Hruziju, a potym u Polšču. U hetaj krainie ŭ 2025 hodzie jon padaŭ dakumienty na dazvoł na pastajannaje pražyvańnie (stały pobyt), a ŭ jakaści padstavy prykłaŭ kartu palaka. A praz paŭtara hoda atrymaŭ list: jaho karta palaka anulavanaja. Vierahodna, pryčyna — staraja pamyłka, pra jakuju ŭžo paśpieli zabycca. Svajoj historyjaj Piotr padzialiŭsia z Most.

Atrymać kartu palaka ŭ 2012 hodzie Piatru było nieskładana. Jaho dzied u 1939 hodzie byŭ abaroncam Varšavy (u siamji zachavalisia jaho dakumienty), u pašparcie baćki i ŭ dakumientach samoha Piatra była paznačana nacyjanalnaść — palak. Prava na kartu palaka pryznajecca adzin raz, ale sama płastykavaja kartka vydajecca na 10 hadoŭ, paśla čaho padlahaje zamienie.

U 2022 hodzie, kali skončyŭsia termin dziejańnia pieršaj karty, Piotr žyŭ u Hruzii. Tudy jon byŭ vymušany źjechać praz ryzyku palityčnych represij. Tamu pa novuju Kartu palaka jon źviarnuŭsia ŭ konsulstva Polščy ŭ Tbilisi. Prablem nie ŭźnikła — i ŭ lipieni 2022 hoda jon atrymaŭ stanoŭčaje rašeńnie ab vydačy karty palaka.

Adnak u dzień, kali Piotr pavinien byŭ zabrać novuju kartku, jamu patelefanavali z konsulstva i paviedamili, što ŭ proźviščy dapuścili pamyłku. Jaje paabiacali vypravić i nadrukavać novuju kartku, za jakoj treba budzie pryjechać paźniej.

— Ja ŭžo jechaŭ u aŭtobusie zabirać kartu, kali mnie patelefanavali. Ja pryjechaŭ, ale ŭ konsulstva ŭžo nie zachodziŭ, — uspaminaje Piotr.

Karta anulavanaja

U vyniku dakumient z pamyłkaj jon navat nie bačyŭ. A praz čatyry miesiacy, jak i abiacali, atrymaŭ kartu palaka ŭžo z pravilna napisanym proźviščam. Paźniej na jaje padstavie Piotr u tym ža konsulstvie atrymaŭ polskuju vizu, a jašče praź niekatory čas pierajechaŭ u Polšču.

Tam u 2025 hodzie jon padaŭ dakumienty na stały pobyt — na padstavie toj samaj karty palaka. Niadaŭna Piotr atrymaŭ list z vajavodskaj ustanovy (užonda), jakaja razhladaje jaho zajavu. U im paviedamlajecca, što jaho karta palaka była anulavanaja jašče ŭ vieraśni 2022 hoda. Pry hetym numar anulavanaha dakumienta supadaje z numaram karty, jakuju Piotr padaŭ razam z dakumientami, — druhoha varyjantu, z pravilnym proźviščam. Na toje, kab pradstavić sapraŭdny dakumient, jamu dali 14 dzion.

Jaki numar mieła kartka z pamyłkaj i ci adroźnivaŭsia jon ad numara novaj, Piotr nie viedaje. Jon užo nakiravaŭ list u konsulstva Polščy ŭ Tbilisi z prośbaj rastłumačyć, što adbyłosia i što jamu rabić dalej.

U liście z užonda prapanujecca i inšy varyjant — źmianić padstavu dla atrymańnia PMŽ z karty palaka na polskaje pachodžańnie. U takim vypadku jamu daviadziecca nanova dakazvać svaje polskija karani.

U hetaj historyi jość jašče adzin niezvyčajny momant. Lehalizacyju Piotr prachodzić razam ź niepaŭnaletniaj dačkoj. Jana taksama afarmlaje pastajanny vid na žycharstva na padstavie karty palaka. Adnak jaje dakumient u polskich čynoŭnikaŭ nijakich pytańniaŭ nie vyklikaŭ.

• 0
• 0
• 2
• 3
• 0
• 0
• 0
• 0