Pavieł Vinahradaŭ nazvaŭ top-5 rečaŭ, pa jakich jon sumavaŭ u turmie

1. Pieršy punkt banalny da niemahčymaści, ale ad hetaha nie mienš praŭdzivy: siamja. Pierad tym jak ja pastanaviŭ zastavacca ŭ Biełarusi, niahledziačy na ŭžo zaviedzienuju kryminalnuju spravu, ja atrymaŭ «dabro» na adsiedku ŭva ŭsich, čyja dumka na hety kont mnie była cikavaja. Amal uva ŭsich. Adziny čałaviek, jaki mnie hetaje samaje «dabro» nie davaŭ, — heta moj syn. Na momant majho zatrymańnia jamu jašče troch hadoŭ nie było. Časam chaciełasia vyć ad taho, što nie mahu jamu štości apavieści, čamuści navučyć i prosta abniać u patrebny momant.

2. Internet. Nie viedaju, jak vy, spadarstva, a ja bolšuju častku sodniaŭ u onłajnie. Dla mianie vialikaja kaštoŭnaść — toj fakt, što ja mahu daviedacca praktyčna pra što zaŭhodna ciaham 10 siekundaŭ. Znajści patrebny kantakt — lohka! Zabavić siabie na ceły dzień — jašče praściej. Ja z tych ludziej, jakija nie pakidajuć miežaŭ žytła biez važkaj na toje pryčyny. Navošta? Navošta, kali ŭdoma jość Jaho Vialikaść Internet.

3. Majo koła stasunkaŭ. Narod, ja vas nie caniŭ. Mnie zdavałasia, vy prosta redkija durni i razhildziai — pakul ja nie trapiŭ na strohi režym. O-o-o, tam siadzić sapraŭdy śpieckantynhient. Čytać umiejuć nie ŭsie. Pisać — tym bolš.

Adnojčy da mianie pryjšoŭ čałaviek, kab uziać u mianie paštoŭku. Na paštoŭcy byŭ namalavany Miki Maŭs. I napisana, jak ni dziŭna, tam było taksama Mickey Mouse. Kali jon u mianie zapytaŭsia «A što tut napisana?», ja zaśmiajaŭsia, bo padumaŭ, što jon tak pryšpilvajecca. A jon nie pryšpilvaŭsia.

4. Smažanaje. Inšyja hastranarkotyki kštałtu salonaha, sałodkaha, tłustaha i vendžanaha dastać možna. Kali ŭ vas proźvišča Vinahradaŭ, to heta budzie ciažkavata, ale ŭsio roŭna možna. A voś smažanaje… m-m-m… Paru razoŭ mnie šancavała, i ja traplaŭ u Vaŭkavysku na smažanuju rybu. A adnojčy adzin asudžany abiacaŭ mnie addać svaju porcyju smažanaj ryby i kinuŭ mianie. Robiercie, paskuda, ja ciabie pamiatuju!

5. Mahčymaść prosta kročyć napierad i nie ŭpiracca ŭ ścianu. Dla ŭsich, chto nie siadzieŭ: heta ŭvohule nie kaštoŭnaść. Heta toje, što samo saboj zrazumieła. Bazavaja opcyja, jak kisłarod. A voś dla hanhstaraŭ heta oho-ho! Potym zvykaješsia, viadoma, što tvoj maksimum — heta čatyry kroki ŭ adnym kirunku (u Aŭtuchoviča, darečy, takaja raskoša, jak čatyry kroki, jość nie zaŭsiody), ale žadańnie iści kudy vočy hladziać ad hetaha nikudy nie prapadaje.

• 20
• 2
• 0
• 0
• 0
• 7
• 0
• 2