Paradoks: bryljanty patańnieli ŭdvaja, a piarścionki daražejuć. Čamu?

Jašče dziesiać hadoŭ tamu adnakaratny dyjamient kaštavaŭ kala vaśmi tysiač dalaraŭ. U 2020 hodzie jaho cana źniziłasia da 5,5 tysiačy, a siońnia taki kamień možna znajści za 4 tysiačy dalaraŭ. Ekśpierty prahnazujuć dalejšaje padzieńnie.

Adna z hałoŭnych pryčyn — raspaŭsiudžańnie łabaratornych ałmazaŭ. Sučasnyja technałohii dazvalajuć vyraścić ałmaz za niekalki miesiacaŭ. Pa fizičnych i chimičnych ułaścivaściach jon taki ž, jak pryrodny.

Paśla ahranki łabaratorny ałmaz stanovicca bryljantam, jaki na vyhlad niemahčyma adroźnić ad bryljanta z pryrodnaha ałmazu. Navat daśviedčanamu ekśpiertu dla vyznačeńnia pachodžańnia kamienia patrebnaje śpiecyjalnaje abstalavańnie.

Z 2020 hoda aptovyja ceny na bryljanty z łabaratornych ałmazaŭ źnizilisia prykładna na 74%. Kali tady karat kaštavaŭ kala 3400 dalaraŭ, to ciapier adnakaratny kamień možna znajści prykładna za tysiaču.

Čamu tady nie tańniejuć piarścionki?

Zdavałasia b, padzieńnie koštu bryljantaŭ pavinna było pryvieści da patańnieńnia ŭpryhažeńniaŭ. Ale ŭ kramach adbyvajecca advarotnaje: juvielirnyja vyraby z bryljantami nie tolki nie patańnieli, ale i padaraželi, piša Rzeczpospolita.

Adna z pryčyn — iniercyja rynku. Jak tłumačyć kiraŭnik polskaj juvielirnaj kampanii W.Kruk Łukaš Biernacki, pamiž zakupam kamianioŭ, vytvorčaściu ŭpryhažeńnia i jaho prodažam prachodzić davoli šmat času. Tamu źmieny suśvietnych cen dachodziać da klijenta sa spaźnieńniem.

Ale jość i bolš istotnaja pryčyna. Patańnieńnie bryljantaŭ pierakryvajuć rost cen na zołata i padaražeńnie pracy.

U 2020 hodzie uncyja zołata kaštavała prykładna 1600—2000 dalaraŭ, ciapier — kala 4300. U vyniku čałaviek, jaki kuplaje hatovaje ŭpryhažeńnie, padzieńnia suśvietnych cen na bryljanty faktyčna nie adčuvaje.

Nie tolki ŭ zołacie sprava

Jość u hetaha rynku i jašče adna prablema — demahrafija. Maładyja pakaleńni stanoviacca mienš šmatlikimi, a ludzi radziej biaruć šlub.

Adnačasova słabieje viadomaja najpierš u ZŠA tradycyja, pavodle jakoj mužčyna pavinien vydatkavać na zaručalny piarścionak niekalki miesiačnych zarobkaŭ. Hetuju normu ŭ svoj čas aktyŭna prasoŭvała sama juvielirnaja industryja.

Na fonie vysokaj kolkaści razvodaŭ usio mienš budučych žanichoŭ hatovyja na takija vydatki. Łabaratornyja bryljanty stanoviacca tańniejšaj alternatyvaj naturalnym.

Praŭda, dla inviestycyj taki kamień pasuje horš. Na druhasnym rynku bryljanty z łabaratornych ałmazaŭ rezka hublajuć u canie praź vialikuju prapanovu. Tamu tym, chto raźličvaje z časam pierapradać upryhažeńnie, ekśpierty rajać vybirać bryljanty z pryrodnych ałmazaŭ.

• 1
• 1
• 1
• 1
• 0
• 0
• 1
• 0