Babaryka: Ja razumieju, što Eduard zakładnik, ale mnie nichto i nikoli nie vystaŭlaŭ umovaŭ
Były palitviazień, bankir i eks-pretendent na pasadu prezidenta Biełarusi Viktar Babaryka ŭ intervju Delfi raskazaŭ, ci davodzicca jamu abmiažoŭvać siabie ŭ publičnych vykazvańniach praz toje, što jaho syn Eduard pa-raniejšamu znachodzicca za kratami.
Padčas vialikaj razmovy viadoŭca spytaŭ u Babaryki, ci źviazvaje jamu ruki źniavoleńnie syna i ci nie prymušaje hety faktar da samacenzury.
«Ja mahu skazać, što heta vielmi składany stan dla mianie. Jašče bolš składany, napeŭna, dla Eduarda. Chacia ja nie viedaju, jak jon. Čamu składany dla mianie? Ja razumieju, što jon zakładnik», — adkazaŭ Babaryka.
«Ale ŭsio žyćcio toj, chto trymaje zakładnika, vystaŭlaŭ umovy. Kali ty zachapiŭ zakładnika, to ty pa idei pavinien skazać, navošta ty jaho zachapiŭ».
«A inakš niejkaje rabstva atrymlivajecca», — zaŭvažyŭ viadoŭca.
«Ja navat nie viedaju, ci rabstva heta. (…) Ty zrabiŭ sabie niejki fietyš u vyhladzie zakładnika. i razumieješ, što, z adnaho boku, addać jaho — strach tak ekzistencyjalna nie sychodzić, a trymać — taksama nie razumieješ, jaki sens.
I voś dla mianie voś jak raz heta prablema. To-bok mnie nikoli za ŭsie piać z pałovaj hadoŭ, što ja znachodziŭsia ŭ turmie, i ciapier nichto nie vystaŭlaŭ umoŭ adnosna Eduarda. «Nie zrobiš toje — i tady Eduarda vypuściać». Ci, naadvarot, zrobiš toje».
Mienavita adsutnaść jakich-niebudź umoŭ, patłumačyŭ Babaryka, i pakidaje jaho ŭ niavyznačanaści nakont taho, jak pavodzić siabie publična.
«Što ja budu rabić ci što ja budu nie rabić — ja nie viedaju, jak heta budzie ŭździejničać na los Eduarda. Budu havaryć ja toje, što chaču, ci budu havaryć toje, što chacieła b čuć ułada».
Jak vynikaje sa słoŭ Babaryki, u hetaj dylemie dla jaho važny pryncyp, jakoha jany z synam prytrymlivalisia i raniej:
«U mianie i z maimi siabrami, i ź siamjoj zaŭsiody było adno razumieńnie: kožny z nas robić svoj vybar.
U 2020 hodzie Eduard zrabiŭ svoj vybar. Tak, prapanavaŭ jamu ja, ale pryniaŭ hetuju prapanovu jon».
Kali ŭ kancy hetaj častki razmovy viadoŭca pažadaŭ Babaryku, kab Eduard apynuŭsia siarod nastupnaj hrupy vyzvalenych palitviaźniaŭ, Viktar adkazaŭ:
«Dziakuj vialiki. Ja na heta vielmi-vielmi spadziajusia».
«Da kanca hoda, spadziajusia, zmožam realizavać adnu-dźvie rečy». Babaryka — pra svoj novy prajekt i biełaruskuju movu
«U mianie była mahčymaść pajechać inšaj darohaj». Viktar Babaryka — pra dzień zatrymańnia 6 hadoŭ tamu
«Hanarusia, kali mnie kažuć, što ja — naiŭny». Viktar Babaryka vystupiŭ na knižnym kirmašy ŭ Varšavie
Kamientary