Barkoŭski: Časam uźnikaje žadańnie paprasić Jeŭrakamisiju skaracić datacyi na niezaležnyja miedyja
«Kab ź niezaležnych redakcyj prynamsi syšła piena».
Pradstaŭnik pa nacyjanalnym adradžeńni Abjadnanaha pierachodnaha kabinieta Pavieł Barkoŭski vykazaŭsia ŭ fejsbuku nakont kanfliktu Siarhieja Cichanoŭskaha i ŚMI. Jon ličyć, što niezaležnyja miedyja ŭ «sistemnym kryzisie» i im varta skaracić finansavańnie.
Barkoŭski sfarmulavaŭ niekalki zaŭvah. Jon ličyć, što miedyja nie prytrymlivajucca standartaŭ i nie pravodziać dastatkovy faktčekinh, vykarystoŭvajuć «nizkuju leksiku» i robiać biezapielacyjnyja zajavy.
Taksama Barkoŭski narakaje, što ŚMI pišuć pra Łukašenku i čynoŭnikaŭ bolš, čym pra demakratyčnyja siły.
«Navat niezaležnyja ŚMI najbolšuju ŭvahu nadzialajuć dziejańniam i vykazvańniam łukašenki i jaho ministraŭ, bo, maŭlaŭ, ad hetaha najbolš zaležyć žyćcio zvyčajnych biełarusaŭ, u toj čas jak dziejnaść pradstaŭnikoŭ demakratyčnych sił padajecca pieravažna praz pryzmu sprečak i skandałaŭ. (…) U toj ža čas dziejańni demsił aśviatlajucca kudy mienš uvažliva, navat kali demanstrujucca kankretnyja vyniki, što ŭpłyvajuć na žyćcio prynamsi dyjasparalnych biełarusaŭ, kali nie šyrej.
Adnyja ŚMI vybirajuć sabie ŭlubioncaŭ siarod palitykaŭ i cytujuć ich da miesca ci nie da miesca, pieratvarajučysia ŭ trybuny ci toje Paźniaka, ci toje Sańnikava, inšyja namahajucca nie zaŭvažać nikoha, aproč chiba Cichanoŭskaj, bo nie zaŭvažać jaje dziejnaść badaj ciažka.
Zatoje žurnalisty lepiej za astatnich viedajuć, varta ci nie varta, naprykład, iści na vybary ŭ Kaardynacyjnuju radu i hatovyja samaŭłasna abviaścić joj dyjahnaz i prysud, razhojdvajučy pytańnie praz historyju ź Mielnikavaj i skandały vakoł instytucyi», — piša Barkoŭski.
Aburajecca jon taksama vypadkovymi miedyjazorkami i niekampietentnymi ekśpiertami, a taksama tym, što miedyja ŭ jakaści KRI vykarystoŭvajuć kolkaść prahladaŭ i aryjentujucca na toje, što cikava ludziam.
«Časam sapraŭdy ŭźnikaje žadańnie paprasić na ŭzroŭni Jeŭrakamisii skaracić datacyi miedyja z tych 15 miljonaŭ na hod (z 30 ahulnych na biełaruskuju hramadzianskuju supolnaść), kab ź niezaležnych redakcyj prynamsi syšła piena i ŭ prafiesii zastalisia zbolšaha prafiesijanały i syšli vypadkovyja ludzi.
Moža, i sapraŭdy b taki darvinizm pazityŭna adbiŭsia na kultury niezaležnaj žurnalistyki, bo kali jaje paasobnyja materyjały pačynajuć paraŭnoŭvać z tvorami biełaruskaj prapahandy — heta ŭžo dyjahnaz surjoznaj chvaroby», — prapanuje Barkoŭski.
Ciapier čytajuć
«Łukašenku nielha nazvać navat małodšym partnioram Pucina». Kit Kiełah raskazaŭ pra rolu Łukašenki ŭ pieramovach ZŠA i Rasii11
Kamientary