Pamierła viadomaja francuzskaja aktrysa Maryna Uładzi, paviedamlaje ahienctva AFP sa spasyłkaj na jaje siamju. Joj było 88 hadoŭ.
Maryna Uładzi naradziłasia 10 maja 1938 hoda ŭ Klišy-ła-Haren, pryharadzie Paryža, u siamji ruskich emihrantaŭ. Jaje sapraŭdnaje proźvišča — Palakova-Bajdarava, Uładzi — psieŭdanim, uziaty ŭ honar baćki, opiernaha śpievaka Uładzimira Palakova-Bajdarava.
U kino jana debiutavała ŭžo ŭ dziesiacihadovym uzroście. Razam ź siastroj Taćcianaj Uładzi ŭdzielničała ŭ zdymkach filma Žana Hiera «Letniaja navalnica», premjera jakoha adbyłasia naprykancy 1949 hoda.
U 1950‑ia hady aktrysa źniałasia ŭ niekalkich filmach. Siarod ich byli karciny «Čornyja piory» (1952) i «Dni kachańnia» (1954), dzie jana vykanała hałoŭnyja roli razam ź italjanskim akcioram Marčeła Mastrajani. Suśvietnuju viadomaść Uładzi pryniesła hałoŭnaja rola ŭ šviedska-francuzskim filmie režysiora Andre Mišela «Viedźma», jaki vyjšaŭ u 1956 hodzie.
U 1967 hodzie Maryna Uładzi pryjechała ŭ SSSR na Maskoŭski mižnarodny kinafiestyval. Tam jana paznajomiłasia ź viadomym savieckim akcioram i bardam Uładzimiram Vysockim. U 1970 hodzie jany pažanilisia i prabyli ŭ šlubie da samaj śmierci Vysockaha ŭ lipieni 1980-ha. Uładzi paśla napisała pra muža ŭspaminy «Uładzimir, ci Pierarvany palot». Taksama jana sama vykonvała niekatoryja jaho pieśni.
Kamientary