RIA Naviny apublikavała kałonku, što Rasiju čakaje jašče adna «SVA» — ź Litvoj. A paśla vydaliła z paznakaj «Nie adpaviadaje dziaržaŭnaj palitycy»
Miž tym aŭtar abiacaŭ, što hetaja vajna budzie ŭžo vielmi karotkaj.
Ranicaj 25 vieraśnia na sajcie dziaržaŭnaha ahienctva źjaviŭsia artykuł Alaksandra Nasoviča pad zahałoŭkam «Rasiju čakaje jašče adna SVA. Jana budzie vielmi karotkaj».
U materyjale havorycca pra patencyjnuju mahčymaść Litvy raźmiaścić na svajoj terytoryi jadziernuju zbroju i pra toje, jak Rasija pavinna budzie na heta adkazać. Na dumku aŭtara materyjału, u takim vypadku Rasija moža admovicca ad uvodu suchaputnych vojskaŭ i adrazu nanieści rakietny ŭdar «z adpaviednym zaradam».
«Nielha skazać, što ŭ Rasii zusim niama vybaru. U Rasii jość vybar: jak vajavać. Havorka navat nie pra toje, doŭha ci chutka. Zrazumieła, što chutka: vajenny kanflikt u Prybałtycy prosta ŭ siłu hieahrafii nie moža być takim ža, jak va Ukrainie», — ličyć Nasovič.
Jon nazyvaje Litvu «krainaj-samahubcaj uvohule biez mazhoŭ» i patencyjnym «nastupnym paśla Ukrainy vučebna-trenirovačnym abjektam dla adpracoŭki rasijskimi rakietčykami bajavych vyletaŭ».
«Takija maleńkija, ale hordyja kamikadze ŭ blizkim zamiežžy našaj krainy byli niezamiennymi ŭ spravie «strymlivańnia Rasii» z taho momantu, jak jana znoŭ pieratvaryłasia ŭ hłabalny centr siły», — piša Nasovič.
Alaksandr Nasovič — člen Savieta pa źniešniaj i abaronnaj palitycy, adzin z suzasnavalnikaŭ kłuba «Vałdaj», hałoŭny redaktar RuBaltic.Ru. Centr «Daśje» ŭ 2020 hodzie adnosiŭ jaho da «prybałtyjskaj sietki», stvoranaj, pavodle danych rasśledavalnikaŭ, supracoŭnikam Administracyi prezidenta i pałkoŭnikam zamiežnaj raźviedki Jaŭhienam Umierankovym. LRT publikavała pierapisku, zhodna ź jakoj Nasovič atrymlivaŭ zadańni dla RuBaltic ad kurataraŭ, źviazanych z Kramlom.
Raniej kiraŭniki jeŭrapiejskich śpiecsłužbaŭ papiaredžvali pra ŭzmacnieńnie cisku Rasii na NATA ŭ najbližejšyja miesiacy. Kiraŭnik češskaj Słužby biaśpieki i infarmacyi Michał Koŭdelka ličyć, što, akramia ŭzmacnieńnia aktyŭnaści z vykarystańniem dronaŭ, Kreml moža pajści na «nievialikaje ŭvarvańnie na terytoryju NATA, jakaja miažuje z Rasijaj».
Rasija publična adprečyła hetyja zajavy. Pry hetym paśla źjaŭleńnia infarmacyi pra toje, što Litva zdymaje zabaronu na raźmiaščeńnie jadziernaj zbroi, pres-sakratar Pucina Dźmitryj Piaskoŭ zajaviŭ, što terytoryja Litvy taksama budzie «pad prycełam» rasijskaj jadziernaj zbroi, i dadaŭ, što «heta budzie vielmi surjoznym vitkom u płanie eskałacyi i napružanaści.
Paźniej artykuł na RIAN byŭ vydaleny z farmuloŭkaj «nie adpaviadaje dziaržaŭnaj palitycy».
Niejki čas zamiest jaho adkryvałasia staronka z pamyłkaj 404, a paźniej vydańnie vyrašyła rastłumačyć vydaleńnie materyjału.
«Artykuł pazaštatnaha aŭtara Alaksandra Nasoviča byŭ vydaleny z sajta ria.ru, bo nie adpaviadaje mierkavańniu redakcyi, redakcyjnaj palitycy i dziaržaŭnaj palitycy Rasijskaj Fiederacyi», — havorycca ciapier u paviedamleńni redakcyi na staroncy, dzie raniej byŭ raźmieščany artykuł Nasoviča.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii11
Kamientary