«Robicca heta za hrošy rasijan». «Biełpoł» raskazaŭ, jak Biełaruś rychtujecca da vajny
Abjadnańnie Belpol sumiesna z «Supolnaściu čyhunačnikaŭ» padrychtavała maštabny analityčny dakład «Militaryzacyja Biełarusi». Dakumient detalova apisvaje, jak ułady krainy pieravodziać ekanomiku na vajennyja rejki, źmianiajuć zakanadaŭstva pad patreby naboru i rychtujuć infrastrukturu dla pierakidańnia rasijskich vojskaŭ. Zakrytaja prezientacyja daśledavańnia prajšła na Varšaŭskim forumie biaśpieki. Vydańnie «Lusterka» aznajomiłasia z materyjałami i pahavaryła z pradstaŭnikom Belpol pra hałoŭnyja vysnovy dakumienta.
«Z uschodu na zachad»
Dakład składajecca z čatyroch častak, u ich analizujucca padrychtoŭka hramadstva, adaptacyja cyvilnych abjektaŭ pad patreby vojska, praca pradpryjemstvaŭ i źmianieńnie zakonaŭ.
«U papiarednija hady my raskazvali davoli ścisła pra asobnyja elemienty militaryzacyi, — tłumačyć pradstaŭnik Belpol Uładzimir Žyhar. — Zaraz my dadatkova pakazali, jak budujecca vajskovaja infrastruktura. Kali pahladzieć na raźmiaščeńnie roznaha rodu vyšak suviazi, my bačym, što ŭsio heta robicca ŭzdoŭž asnoŭnych daroh. U narmalnaj dziaržavie heta pavinna raźmiaščacca ad centra da miežaŭ — kab centr moh kantralavać usiu krainu. Adnak my bačym, što ŭ Biełarusi budaŭnictva infrastruktury idzie z uschodu na zachad. Robicca heta za hrošy rasijan i vielmi časta z kampanientaŭ, jakija vyrablaje RF».
U jakaści prykładu maskavańnia takich pabudoŭ u daśledavańni pryvodzicca łahistyčny centr u Klimavickim rajonie niedaloka ad Kryčava.
«U vyniku tam budzie raźmieščany toj samy «Arešnik», adnak jon maskujecca pad łahistyčny centr. Pry hetym my bačym, što tam užo raźmiaščajecca i antydronavaja abarona, i sistemy SPA, i šmat čaho inšaha, — dadaŭ pradstaŭnik Belpol.
Asobnuju ŭvahu aŭtary dakumienta nadali Biełaruskaj čyhuncy (BČ). «Supolnaść čyhunačnikaŭ» zdabyła danyja pra toje, jak paśla pačatku paŭnamaštabnaj vajny ŭ 2022 hodzie kiravańnie mahistrallu było pierabudavana. Zaraz u Centry kiravańnia pieravozkami pastajanna znachodziacca vajskoŭcy, a sama sistema hatovaja da chutkaha pryjomu i pierakidańnia bujnych uzbrojenych hrupovak biez vykarystańnia publičnych stancyj.
Treciaja častka dakładu pryśviečanaja ekanomicy. Aŭtary prychodziać da vysnovy, što vytvorčaść zbroi i bojeprypasaŭ dla Rasii stała adnym z hałoŭnych faktaraŭ padtrymki mnohich biełaruskich pradpryjemstvaŭ.
Čaćviorty raździeł apisvaje źmieny pravavoj bazy. Na dumku aŭtaraŭ, admova ad niejtralitetu i bieziadziernaha statusu ŭ Kanstytucyi, a taksama padpisańnie novych damoŭ z Maskvoj jurydyčna zamacoŭvajuć stratu suvierenitetu ŭ abarončaj śfiery.
«Sabrali kaštoŭnyja dokazy»
Prezientacyja dakładu adbyłasia 12 kastryčnika ŭ miežach zakrytaha kruhłaha stała na Varšaŭskim forumie biaśpieki. U mierapryjemstvie pryniali ŭdzieł zamiežnyja ekśpierty, dypłamaty i palityki. Adkryvała sustreču Śviatłana Cichanoŭskaja, jakaja adznačyła važnaść sabranych faktaŭ dla jeŭrapiejskaha rehijona.
Pradstaŭnik Belpol Uładzimir Žyhar raskazaŭ «Lusterku», što bolš za ŭsio cikaviła zamiežnych udzielnikaŭ kruhłaha stała na Varšaŭskim forumie biaśpieki.
«Usie 50 miescaŭ, adviedzienyja dla hetaha mierapryjemstva, byli zaniatyja, — adznačyŭ Žyhar. — Asnoŭny nacisk byŭ na razumieńni taho, jak militaryzacyja Biełarusi pahražaje krainam Bałtyi, Polščy i Ukrainie. A hałoŭnaje pytańnie zachodnich partnioraŭ było: «Što rabić?» I ŭ našym dakładzie ŭ samym kancy my apisvajem, što nieabchodna zrabić na siońniašni dzień usim, kab u vyniku hetaja situacyja nie abiarnułasia ahresijaj u dačynieńni da susiednich dziaržaŭ».
Raniej Belpol užo pieradavaŭ ukrainskamu boku niepubličnuju infarmacyju ab militaryzacyi Biełarusi. Abjadnańnie taksama publikavała dakład pra rolu Kitaja ŭ padtrymcy biełaruskaha VPK. Ekśpierty Narodnaha antykryzisnaha ŭpraŭleńnia i Belpol rychtavali sumiesny dakład «Dzieci biez budučyni». U im raźbirałasia, jak niepaŭnaletnich biełarusaŭ sistematyčna ŭciahvajuć u ideałahičnuju apracoŭku, rychtujučy ź ich rezierv dla siłavych struktur praź sistemu vajskova-patryjatyčnych kłubaŭ.
Rubia zajaviŭ pra tupik u vajnie pamiž Rasijaj i Ukrainaj i adsutnaść pierśpiektyŭ mirnaha ŭrehulavańnia
Paśla sustrečy ź Cichanoŭskaj premjer Słavienii zhadaŭ Biełaruś z trybuny Hienasamblei AAN
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje
«Pra niešta my nie havorym, pamoŭčvajem». Łukašenka ź ciažkaściu havaryŭ, ale nastrojvaŭ hienierałaŭ na baraćbu za mir da apošniaj kropli kryvi
Łukašenka paabiacaŭ vajskoŭcam nie pasyłać ich u «hetu bojniu» va Ukrainie
Ciapier čytajuć
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek33
Kamientary