Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje
U kamandzie Śviatłany Cichanoŭskaj ličać hety kantakt palityčnym avansam dla Łukašenki i tłumačać, jakija dziejańni ciapier čakajuć ad biełaruskich uładaŭ.
Sustreča ministraŭ zamiežnych spraŭ Biełarusi i Polščy Maksima Ryžankova i Radasłava Sikorskaha ŭ Ńju-Jorku adbyłasia ź inicyjatyvy biełaruskaha boku. Pra heta «Našaj Nivie» raskazaŭ daradca Śviatłany Cichanoŭskaj pa dypłamatyi Dzianis Kučynski.
Pierad razmovaj dvuch ministraŭ Śviatłana Cichanoŭskaja sustrełasia z Radasłavam Sikorskim. Adrazu paśla pieramovaŭ pradstaŭniki jaje kamandy taksama abmierkavali ich z kiraŭnikom polskaj dypłamatyi.
Pieršaja sustreča ministraŭ paśla 2020 hoda
Ryžankoŭ i Sikorski sustrelisia 22 vieraśnia na palach Hienieralnaj asamblei AAN u Ńju-Jorku. Heta byŭ pieršy taki kantakt paśla padziej 2020 hoda i rezkaha paharšeńnia biełaruska-polskich adnosin.
Biełaruskaje MZS paviedamiła, što ministry abmierkavali stan adnosin pamiž dźviuma krainami, mahčymaści ich raźvićcia i situacyju ŭ rehijonie.
Sam Radasłaŭ Sikorski byŭ bolš kankretnym. Jon raskazaŭ, što havorka išła pra stanovišča na miažy i rehijanalnuju biaśpieku. Na pytańnie, ci zaklikaŭ jon Minsk nie dazvalać Rasii vykarystoŭvać biełaruskuju terytoryju dla pralotu rakiet i bieśpiłotnikaŭ, polski ministr adkazaŭ: «U tym liku».
Sustreču jon nazvaŭ «pieršaj, aznajamlalnaj». Sikorski taksama paviedamiŭ, što kantakty adbyvajucca pamiž inšymi viedamstvami i na inšych uzroŭniach, a Polšča rychtujecca adkryć novy budynak svajoj ambasady ŭ Minsku.
Mahčymuju narmalizacyju adnosin polski ministr paraŭnaŭ z praleskaj, jakaja «moža raśćviści, kali nadvorje budzie spryjalnym».
«Kredyt, vydadzieny avansam»
Pavodle Dzianisa Kučynskaha, kamanda Śviatłany Cichanoŭskaj była ŭ kursie kantekstu pieramovaŭ dvuch ministraŭ i padtrymlivała kantakt z polskim bokam da i paśla sustrečy.
«Śviatłana Cichanoŭskaja razmaŭlała ź ministram Sikorskim u paniadziełak, da jaho sustrečy z Ryžankovym. Praktyčna adrazu paśla sustrečy Sikorskaha z Ryžankovym u nas z Franakam Viačorkam była źmiastoŭnaja razmova ź ministram Sikorskim. Tamu ŭ nas jość dakładnaje razumieńnie kantekstu hetaj sustrečy i jaje sutnaści», — raskazaŭ daradca.
Jon padkreśliŭ, što pravieści pieramovy paprasiŭ Minsk.
«Inicyjatyva sustrečy zychodziła ad biełaruskaha režymu», — adznačyŭ Dzianis Kučynski.
Pierad razmovaj Sikorskaha z Ryžankovym Śviatłana Cichanoŭskaja abmierkavała z kiraŭnikom polskaj dypłamatyi palitviaźniaŭ, vajnu Rasii suprać Ukrainy i militaryzacyju Biełarusi. Asobnaj temaj stała zaležnaść Łukašenki ad Kramla.
U kamandzie Cichanoŭskaj sam fakt sustrečy aceńvajuć jak palityčny avans dla Minska. Dzianis Kučynski źviarnuŭ uvahu, što pieramovy prajšli na palach Hienieralnaj asamblei AAN, dzie padobnyja kantakty adbyvajucca rehularna. Adnak dla biełaruskich uładaŭ, jakija imknucca vyjści ź mižnarodnaj izalacyi, navat takaja razmova maje značeńnie.
«Sam fakt takoha kantaktu — heta ŭžo avans dla režymu. Ciapier pytańnie ŭ tym, ci skarystajecca jon hetym dla realnych krokaŭ», — ličyć daradca.
Pavodle jaho, hetaja situacyja stanie taksama pravierkaj zdolnaści Minska dziejničać samastojna:
«Faktyčna heta test na toje, ci maje režym Łukašenki choć niejkuju subjektnaść i samastojnaść, u čym my majem surjoznyja sumnievy. Kali hety kredyt znoŭ budzie zmarnavany, heta stanie jašče adnym śviedčańniem taho, što režym nie zdolny dziejničać samastojna».
Kankretnymi krokami, jakich Polšča i inšyja jeŭrapiejskija krainy čakajuć ad Minska, Dzianis Kučynski nazvaŭ spynieńnie represij, vyzvaleńnie palitviaźniaŭ, spynieńnie pieraśledu biełarusaŭ u krainie i za miažoj, a taksama admovu ad saŭdziełu ŭ rasijskaj ahresii suprać Ukrainy i hibrydnych atakach na susiednija dziaržavy.
Na dumku daradcy, sustreča ŭ Ńju-Jorku pakul nie śviedčyć pra źmienu palityki Varšavy. Polskija ŭłady razumiejuć, što represii ŭ Biełarusi praciahvajucca, Minsk padtrymlivaje Rasiju ŭ vajnie suprać Ukrainy, a susiednija krainy ES sutykajucca ź mihracyjnym i inšym hibrydnym ciskam.
Biełaruskija ŭłady, u svaju čarhu, viedajuć, jakija kroki nieabchodnyja dla palapšeńnia adnosin z Polščaj. Adnak raniej Minsk užo sprabavaŭ vykarystoŭvać mižnarodnyja kantakty ŭ prapahandysckich metach, pradstaŭlajučy sam fakt razmovy jak pasłableńnie izalacyi. Ciapier dalejšaje raźvićcio adnosin budzie zaležać ad taho, ci paćvierdziać biełaruskija ŭłady svaje zajavy realnymi dziejańniami.
«Kab nie było viartańnia da business as usual»
Padčas pajezdki ŭ Ńju-Jork Śviatłana Cichanoŭskaja sustrełasia taksama z prezidentam Polščy Karalem Naŭrockim. Asnoŭnaj temaj razmovy stała budučaja palityka Polščy ŭ dačynieńni da aficyjnaha Minska:
«Havaryli pra važnaść zachavańnia Polščaj mocnaj, pryncypovaj palityki, zasnavanaj na kaštoŭnaściach, u dačynieńni da biełaruskaha režymu. Kab nie było viartańnia da business as usual i kab lubyja dalejšyja kroki zaležali ad realnych dziejańniaŭ režymu».
Takim čynam, vyhladaje, Varšava pakidaje mahčymaść dla dalejšych kantaktaŭ ź Minskam, adnak ich praciah budzie zaležać ad taho, ci zrobiać biełaruskija ŭłady kroki ŭ pytańniach palitviaźniaŭ, represij, biaśpieki miažy i rasijskaj vajny suprać Ukrainy.
Ciapier čytajuć
28‑hadovaha avijatara asudzili na 13 hadoŭ kałonii: «zdrada dziaržavie» za pierapisku z adnakurśnikami z USU16
28‑hadovaha avijatara asudzili na 13 hadoŭ kałonii: «zdrada dziaržavie» za pierapisku z adnakurśnikami z USU
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»1010
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»10
Niebaraka ź Lachavičaŭ źnik «na SVA» ŭžo na treci dzień, a ŭ baraćbie za hrabavyja sčapilisia siastra, sužycielka i žonka — z čatyrma dziećmi, ale čužymi88
Kamientary