Kiraŭnik «Pinskdreva» ličyć vinavatymi ŭ svaim zvalnieńni žurnalistaŭ
Na ZAT «Pinskdreŭ» zvalniajucca śpiecyjalisty. Tym, chto niazhodnyja z zahadam kancernu «Biellesbumpram» pra pryznačeńnie novaha kiraŭnictva i źniaćcie naziralnaha savietu, prapanavana abo zvolnicca pa ŭłasnym žadańni, abo ŭ adnabakovym paradku.
Ciapier były hienieralny dyrektar «Pinskdreva» Łaran Arynič znachodzicca ŭ špitali. Kamentavać svajo zvalnieńnie i sytuacyju na pradpryjemstvie jon nie pažadaŭ:
«Vy, žurnalisty, mianie i źniščyli. Tady stolki davali niehatyŭnaj infarmacyi, kab źniali Aryniča. Kali b nie było hetaj pisaniny paŭsiul i ŭsiudy, to mahčyma i nie było b takoha stanovišča, što mianie vyhnali, jak sabaku, pa artykule.Moj stan ciapier nadzvyčaj pryhniečany. Dadalisia chvaroby dadatkovyja, ja ledź žyvy».
Dyrektara pa kadrach «Pinskdreva», jaki taksama ŭ špitali, dzie i Łaran Arynič, kiraŭnictva pradpryjemstva zvalniaje ŭ adnabakovym paradku. Presavy sakratar «Pinskdreva» adpraŭleny ŭ adpačynak. Niekatorym mieniedžaram i administrataram prapanujecca napisać zajavu ab zvalnieńni, paviedamiŭ supracoŭnik kancernu, jakomu taksama novaje kiraŭnictva prapanavała zvolnicca: «Na zavodzie z boku, jak heta ciapier ličycca, novaha kiraŭnictva, było skazana, što
zabaraniajecca davać niejkija kamentary dla ŚMI.Paśla ž maich namahańniaŭ pradstavić ŚMI praŭdu pra padziei na pradpryjemstvie, mianie ŭvohule abaviazali napisać zajavu ab zvalnieńni pa ŭłasnym žadańni».
Mieniedžar pradpryjemstva nie pahadžajecca z rašeńniami, jakija ŭviedzienyja ŭ adnosinach da chołdynhu: «Zbor akcyjanieraŭ, jakija arhanizavaŭ kancern „Biellesbumpram“ — heta zusim nia zbor akcyjanieraŭ, bo na samoj spravie akcyjanieraŭ u nas paŭtary tysiačy čałaviek. Na zbory ž prysutničali zacikaŭlenyja asoby ŭ kolkaści 15–20 čałaviek».
Mnohija dyrektary i administratary pradpryjemstva admaŭlajucca ad kamentaroŭ. Dyrektar ža zavodu DVP, dzie 25 kastryčnika minułaha hodu adbyŭsia vybuch, Leanid Łohvin naahuł paraiŭ nie «ŭłazić u hetyja spravy».
Były deputat pinskaha harsavietu Jaŭhien Šatochin kaža, što spravy robiacca na pradpryjemstvie litaralna «praz kalena»: «Jašče adnym važnym momantam źjaŭlajecca toje, što Arynič, ciapier były dyrektar „Pinskdreva“, źjaŭlajecca hanarovym žycharom Pinska. Tamu heta tolki razahravaje sytuacyju. Takoha ŭ historyi jašče nie było raniej, kab hanarovaha žychara zvalniali».
Pavodle Jaŭhiena Šatochina, žycharam Pinska nieviadoma, što na samoj spravie adbyvajecca na pradpryjemstvie.
Kamientary