2 kastryčnika ranicaj Chielsinkski rajonny sud pryniaŭ rašeńnie ab aryšcie byłoha hulca chakiejnaj zbornaj Finlandyi i kłubaŭ NCHŁ dy KCHŁ Jere Karałachci. Były spartsmien, jaki ŭ svoj čas hulaŭ i ŭ minskim «Dynama», padazrajecca ŭ ździajśnieńni ciažkaha narkazłačynstva, nibyta ŭčynienaha ŭ Chielsinki ŭ pieryjad z 1 červienia pa 29 vieraśnia 2025 hoda, piša Yle.
Palicyja ciapier praciahvaje śledstva, a sud abaviazaŭ, kab abvinavačańnie pa hetaj spravie było vystaŭlena nie paźniej jak 15 studzienia 2026 hoda. Pavodle źviestak vydańnia Yle, u hety ž dzień sud razhledzieŭ pytańni ab aryšcie i inšych asobaŭ, jakich padazrajuć u narkazłačynstvach, adnak nieviadoma, ci źviazanyja jany niepasredna z Karałachci.
Advakat Karałachci paviedamiŭ, što jahony padabaronny całkam admaŭlaje abvinavačańni. Padrabiaznaści spravy zastajucca zasakrečanymi.
Jere Karałachci — viadomy ŭ minułym chakieist. U składzie zbornaj Finlandyi jon trojčy zavajoŭvaŭ srebra i adzin raz bronzu na čempijanatach śvietu, a taksama byŭ uklučany ŭ simvaličnuju zbornuju turniru.
U 2011‑2013 hadach jahonym kłubam u Kantynientalnaj chakiejnaj lizie było minskaje «Dynama», i tady jon byŭ adnym ź lidaraŭ kamandy. Finski lehijanier adzin čas byŭ navat kapitanam «Dynama», a ŭ 2011 hodzie hulaŭ u matčy ŭsich zorak KCHŁ.
Heta nie pieršy raz, kali Karałachci traplaje ŭ pole zroku pravaachoŭnikaŭ. U 2007 hodzie Chielsinkski apielacyjny sud pryznaŭ jaho vinavatym u nabyćci amfietaminu ŭ Estonii na sumu 10 tysiač jeŭra i ŭ sadziejničańni ciažkamu narkazłačynstvu. Tady jon atrymaŭ 1 hod i 8 miesiacaŭ umoŭnaha terminu.
U 2008 hodzie jaho taksama asudzili za ŭžyvańnie narkotykaŭ. Sam Karałachci pryznavaŭ, što ŭ pačatku 2000‑ch pakutavaŭ ad surjoznaj zaležnaści. U 2017 hodzie vyjšła kniha pra žyćcio chakieista, dzie padrabiazna apisvajucca jaho prablemy z narkotykami, jakija pačalisia jašče ŭ padletkavym uzroście.
Kamientary
Oboznaliś.