U biełaruskich sanatoryjach budzie prachodzić reabilitacyja rasijskich udzielnikaŭ vajny z Ukrainaj
Ułady Leninhradskaj vobłaści Rasii i Minsk damovilisia ab stvareńni «pastajannaj prahramy reabilitacyi bajcoŭ SVA». Paviedamleńnie pra heta na rehijanalnym rasijskim partale online47.ru zaŭvažyŭ «Pozirk».
Damoŭlenaść była dasiahnutaja padčas vizitu ŭ Biełaruś dyrektara Usievałažskaha multycentra sacyjalnaj i pracoŭnaj intehracyi Iryny Draździenka. Jana naviedała «sanatorna-kurortnyja i reabilitacyjnyja ŭstanovy Minskaj vobłaści», dzie «aznajomiłasia ź ich mahčymaściami ŭ śfiery lačeńnia, adnaŭleńnia i azdaraŭleńnia ŭdzielnikaŭ «śpiecapieracyi» ź Leninhradskaj vobłaści, a taksama ich siemjaŭ».
«U ramkach pajezdki Iryna Draździenka praviała sustreču z kiraŭnictvam vykanaŭčaha kamiteta Mahiloŭskaj vobłaści. Baki abmierkavali pierśpiektyvy metavaha nakiravańnia i pryjomu žycharoŭ Leninhradskaj vobłaści, jakija majuć patrebu ŭ miedycynskaj i adnaŭlenčaj dapamozie. U pryvatnaści, havorka pra bajcoŭ SVA i ich rodnych», — havorycca ŭ publikacyi.
Pa vynikach pieramoŭ, jak zajaŭlajecca, pryniataje rašeńnie «sumiesna z kamitetam pa sacyjalnaj abaronie Leninhradskaj vobłaści raspracavać i pieradać biełaruskamu boku ŭmovy i patrabavańni dla zapusku pastajannaj prahramy reabilitacyi».
«Płanujecca, što štohod u ramkach hetaj inicyjatyvy ŭ Biełarusi zmohuć prachodzić lačeńnie i azdaraŭleńnie nie mienš za 800 čałaviek ź liku ŭdzielnikaŭ SVA i ich siemjaŭ», — adznačaje partał.
Padkreślivajecca, što inicyjatyvu ŭchvaliŭ pieršy vice-premjer Biełarusi Mikałaj Snapkoŭ.
30 vieraśnia abjadnańnie BelPol paviedamiła, što sanatoryj «Biełaruś» u Sočy RF, jaki naležyć Kiraŭnictvu spraŭ Alaksandra Łukašenki, «daŭno i rehularna» absłuhoŭvaje rasijskich vajskoŭcaŭ, jakija ŭdzielničajuć u vajnie suprać Ukrainy.
Terminam «SVA» («śpiecyjalnaja vajennaja apieracyja») rasijskija, a ŭśled za imi i biełaruskija ŭłady i prapahandysty nazyvajuć poŭnamaštabnuju ahresiju RF suprać Ukrainy.
Kamientary
Chotia i nado sieḿjam mientov, khbšnikov i činovnikov. Oni eto zasłužili, čtoby riadom s nimi na prociedurach ležali upyri, nieludi, kotorym mirnoho čiełovieka zavaliť ničieho nie stoit.