Sproba aštrafavać bieśpiłotnaje aŭto za niezakonny razvarot pastaviła amierykanskuju palicyju ŭ tupik

Jak piša The Guardian, padčas rejdu pa vyjaŭleńni pjanych kiroŭcaŭ palicejskija horada San-Bruna ŭ Kalifornii (ZŠA) zaŭvažyli, jak aŭtamabil ździejśniŭ zabaronieny razvarot na śviatłafory.

Narad, jak i naležyć, spyniŭ parušalnika. Ale kali palicejskija padyšli da mašyny, ich čakaŭ siurpryz: za rulom nikoha nie było. Heta byŭ bieśpiłotnik Waymo — viadomy ŭ rajonie zaliva San-Francyska servis robata-taksi.

Na aficyjnaj staroncy departamienta źjaviłasia fota, dzie źbiantežany aficer zaziraje ŭ sałon pustoha biełaha aŭtamabila. Palicyja prakamientavała situacyju z dolaj ironii:

«Pakolki čałavieka-kiroŭcy nie było, štraf vypisać nie ŭdałosia. U našych błankach dla štrafaŭ niama hrafy dla robata».

Zamiest štrafu palicejskija źviazalisia niepasredna z kampanijaj Waymo i paviedamili pra zboj u sistemie. «Spadziajomsia, pieraprahramavańnie dapamoža paźbiehnuć novych niezakonnych manieŭraŭ», — dadali ŭ palicyi.

Waymo vyrasła z prajekta Google Self-Driving Car Project, zapuščanaha jašče ŭ 2009 hodzie. U 2016 hodzie jon byŭ vydzieleny ŭ asobnuju kampaniju ŭ składzie chołdynhu Alphabet Inc. Užo ŭ 2018 hodzie kampanija zapuściła kamiercyjny servis pad nazvaj Waymo One. Ciapier u niekatorych haradach ZŠA luby čałaviek moža praz mabilnuju prahramu vyklikać taksi, za rulom jakoha nie budzie kiroŭcy: mašyna sama pryjedzie, adviazie pasažyra ŭ patrebnaje miesca i źjedzie.

U svaju čarhu, Waymo vypuściła standartnuju zajavu, u jakoj paviedamiła, što ich sistema aŭtanomnaha kiravańnia «raspracavana z ulikam zachavańnia praviłaŭ darožnaha ruchu». Kampanija paabiacała «vyvučyć situacyju» i praciahvać pracu nad pavyšeńniem biaśpieki na darohach.

Hety kamičny vypadak — jaskravaja ilustracyja taho, jak technałohii apiaredžvajuć zakanadaŭstva. Adnak ułady Kalifornii ŭžo pracujuć nad vyrašeńniem prablemy. Jašče letaś hubiernatar štata padpisaŭ zakon, jaki dazvolić palicyi vypisvać paviedamleńnie ab parušeńni niepasredna kampanii-apierataru, čyj bieśpiłotnik parušaje praviły. Praŭda, zakon ustupić u siłu tolki ŭ lipieni 2026 hoda.

Nieabchodnaść takoha zakona vyklikana nie tolki niavinnymi razvarotami. U San-Francyska ŭžo byli zafiksavanyja značna bolš surjoznyja incydenty.

Aŭtanomnyja mašyny błakavali ruch, pieraškadžali pracy pažarnych i zajazdžali na ačeplenyja palicyjaj miescy złačynstvaŭ. Asablivuju zaniepakojenaść hramadstva vyklikaŭ rezanansny vypadak, kali bieśpiłotnik inšaj kampanii (Cruise) praciahnuŭ za saboj piešachoda, jaki trapiŭ pad koły.

Tamu, choć hetym razam robat-parušalnik paźbiehnuŭ pakarańnia, u budučyni kampanijam daviadziecca nieści adkaznaść za pavodziny svaich aŭtanomnych aŭtamabilaŭ na darozie.

• 3
• 0
• 3
• 2
• 1
• 0
• 1
• 0