Nastupny musić pamierci?
Ci vieryŭ chto choć na kaliva, što vysokaje načalstva pasyple hałavu popiełam: kajemsia, nielehitymnyja my! Sychodzim, voś vam klučy ad kabinetaŭ! Piša Alaksandar Kłaskoŭski.
Haładoŭka Kazulina, pry ŭsioj pavazie da mužnaści, pakinuła dvaistaje ŭražańnie. I nia tolki ŭ mianie.
Razmaŭlaŭ siońnia pa čarzie z dvuma palitolahami.
Uładzimier Roŭda ličyć, što samaachviarny krok Kazulina vyhladaje akurat tym maralnym uzoram, jakich brakuje našaj apazycyi. Takim čynam, maŭlaŭ, były rektar maje šaniec stać biassprečnym lideram apazycyi, zhurtavać jaje narešcie vakoł svajoj asoby.
A voś Jury Čavusaŭ kaža: "Chacieŭ by pahladzieć u vočy tamu, chto paraiŭ vyłučyć mienavita takija patrabavańni!".
Sapraŭdy, kali pakinuć ubaku vysokuju temu hieraizmu, to zastajecca prahmatyčnaje pytańnie ab metach, srodkach i vynikach.
"Elementarnaje praviła luboj haładoŭki palahaje u tym, što patrabavańni musiać być vykanalnymi", — nahadvaje Čavusaŭ.
Tak, kali vierniki zmahajucca za chram ci prava jaho pabudavać, to damahčysia svajho całkam realna. I my bačyli heta na śviežych prykładach.
A što ŭ našym vypadku?
Ci vieryŭ chto choć na kaliva, što vysokaje načalstva pasyple hałavu popiełam: kajemsia, nielehitymnyja my! Sychodzim, voś vam klučy ad kabinetaŭ!
Ciapierašniaja ŭłada nia ličyć siabie nielehitymnaj. Nie pakutuje na maralnyja zhryzoty. Tamu patrabavańnie syści apryjory stračvaje sens. Jaho naviersie prosta nia čujuć.
Astatnija ž punkty — i uvohule nie da kiroŭnych viarchoŭ.
Što, Łukašenka musić jadnać apazycyju? Ci — stavić pytańnie pra svoj režym u Radzie biaśpieki AAN?
Faktyčna byli vyłučany ŭltymatumy adrazu ŭsim bakam — i režymu, i lahieru jahonych apanentaŭ, i mižnarodnaj supolnaści. Prahrama-maksymum! Nia bolej realistyčnaja, čym daktryna pabudovy kamunizmu.
Tak, palitrada ADS praštampavała niejkija papiery, pradyktavanyja najpierš, musić, mierkavańniami humanizmu (čałaviek za kratami miž žyćciom i śmierciu).
Kamentatary adznačali, što zajavy z apazycyjnaha kiraŭnictva žonka Kazulina vyciahvała ledź ci nie abcuhami.
Ale ci paspryjała heta choć kaliva realnamu zhurtavańniu?
Nia kažučy ŭžo pra toje, što abjadnoŭvać kalony (zamiest taho kab kidacca palemičnymi kamianiami) varta było pierad prezydenckimi vybarami. Ale dva kandydaty ciahnuli koŭdru ŭ roznyja baki navat na płoščy Kalinoŭskaha...
Narešcie, eksperty adrazu adznačyli, što "biełaruskaje pytańnie" ŭ jaho siońniašnim vyhladzie nia jość kampetencyjaj Rady biaśpieki AAN. Tak by mović, niefarmat.
Naturalna, praź pahrozu kankretnamu čałaviečamu žyćciu i mižnarodnaja supolnaść schamianułasia. Pryniała i, musić, jašče prymie kolki tam rezalucyjaŭ.
Adnak ci adbudziecca takim čynam praryŭ u biełaruskim pytańni?
Prablema, badaj, nia stolki ŭ niedachopie ŭvahi da jaho, kolki ŭ braku realnych vaharoŭ uździejańnia.
I vyrašajecca hetaja prablema nie haładoŭkami. Jana jość pradmietam karpatlivaj i, kali chočacie, pieravažna latentnaj dziejnaści palityčnych hulcoŭ dy palittechnolahaŭ.
Uvohule palityka — mastactva mahčymaha. U joj musić być mocny prahmatyčny, technalahičny čyńnik.
Miž tym u najnoŭšaj historyi Biełarusi im najsprytniej navučyłasia karystacca mienavita ŭłada. A dziejnaść, nazaviem umoŭna, demakratyčnych siłaŭ uvieś čas hrašyła i pa siońnia hrašyć ramantyzmam i dyletanctvam.
Tak, hieraizm varty taho, kab źniać kapialuš.
Tak, lahieru apanentaŭ režymu patrebna bolej rašučych, pasyjanarnych asobaŭ.
Ale varta kazać i pra inšaje.
Ekstrym nia jość panacejaj.
Žest adčaju nie zaŭždy jość samym mocnym.
U našym vypadku analityki adznačajuć i taki momant, jak pastupovaja devalvacyja samoj źjavy haładovak.
Sapraŭdy, pa-pieršaje, hramadztva słaba infarmavanaje.
Pa-druhoje, jano zbolšaha zanadta inertnaje, apalityčnaje, kab možna było zapalić masu adnym pałymianym sercam Danka.
Pa-treciaje, jak ni žachliva, narod pryzvyčajvajecca da navinaŭ pra toje, što znoŭ niechta haładaje. Tak daŭno pryzvyčailisia da kryvavych repartažaŭ ź Iraku, i ŭžo mała chto ŭdajecca ŭ detali.
Palitolah Jury Čavusaŭ zaznačaje: nastupnamu palityčnamu haładoŭniku zastajecca chiba pajści na śmierć!
Ryzyknu dadać, što i taki trahičny finał naŭrad ci pachiśnie režym.
Varta šukać inšy hrunt, inšyja metady.
Mnie padabajecca vysłoŭje Anatola Fransa: "Samaja redkaja mužnaść — heta mužnaść dumki".
Dziela vysokich metaŭ jašče nie adnojčy spatrebicca nia tolki hieraizm marskoha piachotnika, ale j intelekt prafesara Kazulina. Daj boh jamu zdaroŭja!
P.S. Dla cikaŭnych: voś što aŭtar pisaŭ u dzień, kali Kazulin raspačaŭ haładoŭku.
Juraś Ziankovič raskazaŭ pra svajo vyzvaleńnie i šlach u ZŠA6
Kamientary