24‑hadovuju fatohrafku-animalistku i vieterynarku z Homiela asudzili za paklop na Łukašenku i pa «narodnym» artykule
Alaksandra Dźmitryjeva lubić žyvioł i fatahrafiju. Heta pieraŭtvaryłasia ŭ hałoŭnaje jaje chobi — fatahrafavać žyvioł. Dziaŭčynu abvinavacili adrazu pavodle dvuch kryminalnych artykułaŭ i adpravili za kraty.
Alaksandry Dźmitryjevaj 24 hady. Jana rodam z Mazyra, dzie ŭ 2018 hodzie skončyła siaredniuju škołu № 11 z chimika-bijałahičnym uchiłam. Vyšejšuju adukacyju dziaŭčyna atrymała ŭ Viciebskaj dziaržaŭnaj akademii vieterynarnaj miedycyny.
Paśla jana raźmierkavałasia vieterynaram. U lutym 2024 hoda Alaksandra pisała, što jaje całkam adviarnuła ad prafiesii vieterynara mienavita paśla taho, jak jana pryjšła na adpracoŭku. Jana adznačała, što navat kali rychtavać dziaciej ź pialonak, jany ŭsio adno syduć z prafiesii praz realnyja ŭmovy pracy.
Alaksandra viadomaja jak talenavitaja fatohrafka-animalistka. Jana śpiecyjalizujecca na zdymkach svojskich hadavancaŭ, asabliva sabak, i viała ŭłasnuju fotasupołku. Dziaŭčyna ŭdzielničała ŭ vystavach sabak, zajmałasia kinałahičnym sportam (fryźbi) i vałancioryła.
U jaje byŭ ulubiony sabaka — karyčnievy mietys spaniela pa mianušcy Arčybald, jaki časta stanaviŭsia hierojem zdymkaŭ.
Dźmitryjevu zatrymali paśla vieraśnia 2025 hoda. Sud Čyhunačnaha rajona Homiela vynies Alaksandry prysud pavodle dvuch artykułaŭ Kryminalnaha kodeksa: č. 2 art. 367 (paklop na prezidenta) i č. 1 art. 342 (arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich).
Viadoma, što dziaŭčyna adbyvaje pakarańnie — heta chimija z nakiravańniem ci kałonija. Jaje sacsietki nie abnaŭlajucca, a instahram vydaleny.
«Naša Niva» — bastyjon biełaruščyny
PADTRYMAĆ
Kamientary