Statkievič: «Siadać u kresła Sidorskaha» mnie prapanoŭvaŭ biznesoviec Smancar

Tolki na druhi dzień pracesu nad Statkievičam jaho narešcie dapytali.

Statkievič razam z advakatam jašče da pačatku pracesu padavali chadajnictva, kab usich kandydataŭ sudzili razam. Atrymali admovu.

Mikoła Statkievič vyhladaje badziorym. I havoryć jon upeŭniena. Ad jaho praciahły čas nie było źviestak. Tolki skupyja naviny praz advakata. Ciapier paćvierdziłasia infarmacyja, što eks-kandydat trymaŭ haładoŭku ź SIZA. Sam Statkievič nie nadta zasiarodžvaŭsia na detalach jaho ŭtrymańnia za kratami. U pieršuju čarhu pryvodziŭ arhumienty na karyść viersii z pravakatarami 19.12.

«Ja admoviŭsia davać śviedčańni struktury, jakoj ja nie daviaraju, jakaja ŭsio heta stvaryła. Ja nie padpisvaŭ nijakich dakumientaŭ pryncypova [na papiarednim śledstvie]. Padpisaŭsia tolki pad tym, što aznajomiŭsia z materyjałami kryminalnaj spravy. I pad vynikami ekśpiertyzy, kab ich nie pamianiali». Eks-kandydat zajaviŭ, što ŭ spravie ŭbačyŭ dva pratakoły ahladu płoščy Niezaležnaści. Pieršy ahlad z 0.30 da 04.00 pravodziŭ kapitan. Jon znajšoŭ pustuju butelku, survetki, miehafon. Druhi ahlad pravodziŭ major — za 24 chviliny jon znajšoŭ užo šmat pradmietaŭ: ledaruby, mietaličnyja pruty.

«Ja nie znachodžu inšaha tłumačeńnia, jak fabrykacyja spravy».

Eks-kandydat vykazaŭ spadziavańnie, što abodva pratakoły majucca ŭ spravie. Jamu nichto ničoha nie adkazaŭ.

«Chaciełasia b pačuć, z kim i dzie ja płanavaŭ masavyja biesparadki. Hałasłoŭnaje abvinavačvańnie. Dzie tyja «bajeviki», jakich ja pavioŭ?

Hetyja maładyja ludzi, jakija mianie bačać pieršy raz? Masavych biesparadkaŭ nie było. Ale była sproba ich arhanizavać z boku ŭłady, zahadzia spłanavaŭšy».

Mikoła Statkievič patłumačyŭ svajo znachodžańnie ŭ kałonie Niaklajeva, u toj čas, jak jaho prychilniki źbiralisia kala čyhunačnaha vakzała ŭviečary 19 śniežnia. Kala 19.00 Statkievič zajšoŭ u štab Niaklajeva, kab paznajomicca z dakumientami, jakija płanavali vynieści na abmierkavańnie na płoščy. A paśla zrazumieŭ, što na vakzał nie paśpieje. Kali na ludziej napali i pabili, Statkievič adzin rušyŭ na Kastryčnickuju płošču.

«Tut škło raźbili i stolki abvinavačanych. A źbićcio kandydata ŭ prezidenty Niaklajeva — ja tolki davaŭ adno tłumačeńnie».

Kali ludzi vyjšli na praśpiekt Niezaležnaści, pa słovach Statkieviča, jon vyrašyŭ uznačalić šeście. «Pobač była Administracyja prezidenta. Samaje niejabśpiečnaje — niekirujemaja situacyja. Ja bajaŭsia, što ŭłada zdolnaja na ahresiŭnyja dziejańni. Varta było źvieści ludziej dalej adtul. Ja sprabavaŭ vyjści na praśpiekcie napierad, kab uznačalić demanstracyju. Ale čamuści nievialiki łancuh supracoŭnikaŭ DAI ŭ formie pierakryŭ darohu mienavita nam (kandydatam). Ja ich abyšoŭ i pabieh dahaniać demanstracyju. Ale ja nie zdoleŭ hetaha zrabić da płoščy Niezaležnaści. Ludzi išli niekiravana. Ale biesparadkaŭ nie było». Na jaho dumku, kandydataŭ błakavali naŭmysna, bo spadziavalisia, što natoŭp pačnie čynić hvałt.

Statkievič pryvioŭ niekalki arhumientaŭ na karyść viersii ab pravakatarach. Pa jaho słovach, źjaŭleńnie śpiecnazu paśla pieršaha bićcia škła i jaho adychod było naŭmysnym.

«Meta adstupleńnia (paśla zrazumieŭ) — vymanić kandydataŭ da ŭvachodu Doma ŭrada, dzie było ŭžo raźbita škło».

Jon adznačyŭ, što pačuŭsia čyjści hołas, maŭlaŭ, kala dźviarej budynka čakaje aficer, jaki budzie vieści pieramovy z delehacyjaj kandydataŭ. Kali Statkievič padyšoŭ bližej, to nijakaha aficera nie ŭbačyŭ. Tady zrazumieŭ, što i heta była pravakacyja. Kamuści treba było, kab kandydaty padyšli da raźbitaha škła.

«U lutym mianie pieraviali z adzinočnaj kamiery ŭ ahulnuju, dzie byŭ Dźmitryj Novik. Jon raskazaŭ, što kali ich kala dźviarej Doma ŭrada pačali źbivać śpiecnazaŭcy, niekatoryja ludzi, što bili škło, zakryčali: «Svaje! HUVD!»

«My z hrupaj kandydataŭ pajšli da ŭvachodu Doma ŭrada. I kali havorać, što tam nikoha nie było... Ja nikoli nie pavieru, što premjer-ministr u noč vybaraŭ tam nie byŭ, mahčyma jon byŭ niedzie pobač i moh chutka pryjechać».

Kali Statkievič haładaŭ, da jaho zajšoŭ načalnik SIZA z mabilnym telefonam. Pakazaŭ film «Płošča. Žalezam pa škle». U im pakazali Pinčuka, jaki skazaŭ, što Statkievič zamoviŭ u jaho mietaličnyja pruty i paprasiŭ ich zatačyć. Eks-kandydat nie sumniavajecca, što zamova Pinčuku była zroblena kimści zadoŭha da 19.12. I heta śviedčyć pra toje, što pravakacyi płanavalisia zahadzia. Jon skazaŭ, što ŭ tym filmie byli vykarystany narezki ź jaho razmovy z adnym z pradstaŭnikoŭ inicyjatyŭnaj hrupy padčas sustrečy z vybarcami, i źmieščany ŭ patrebny kantekst.

Statkievič patłumačyŭ i situacyju z telefonnaj razmovaj, vykarystanaj u prapahandysckim filmie. Niejki mužčyna pačaŭ davać parady — «zasoŭvać płany ŭ kišeni», prapanoŭvaŭ kandydatu «siadać u kresła Sidorskaha i naciskać na knopki». Heta byŭ biznesoviec z Ukrainy Smancar. Statkievič paznajomiŭsia ź im u Kijevie dzieści ŭ 2008 hodzie.

«Cikavaść da jaho była, bo jon — biełaruski pradprymalnik». Padčas apošniaj razmovy ŭ siaredzinie lipienia 2010 u Kijevie spytaŭ u Smancara, kaho jon padtrymaje na vybarach. Toj skazaŭ, što jamu heta niecikava. «Tady jon mnie niecikavy».

«Ja pałovu nie čuŭ z taho, što jon kazaŭ. Chaj sp. Smancar adkazvaje za svaje słovy».

Svajo znachodžańnie na łavie padsudnych Mikoła Statkievič ličyć źviadzieńniem asabistych rachunkaŭ ź im kiraŭnika krainy.

«Ja viedaŭ, što Łukašenka pomślivy».

Ab hetym jaho papiaredžvaŭ i eks-kandydat Kazulin.

• 0
• 0
• 0
• 0
• 0
• 0
• 0
• 0