U Litvie nienaviśniku biełarusaŭ dali chatniuju chimiju i zabaranili karystacca internetam

Sud u Vilni pryznaŭ miascovaha prarasijskaha aktyvista Łaŭrynasa Rahielskisa vinavatym u raspalvańni nianaviści da jaŭrejaŭ i biełarusaŭ, a taksama ŭ apahańvańni miesca hramadskaha ŭšanavańnia. Jamu pryznačyli pakarańnie — adzin hod i dzieviać miesiacaŭ abmiežavańnia voli bieź intensiŭnaha nahladu, a taksama štraf sumaj 12,5 tysiačy jeŭra, paviedamlaje LRT.

Akramia taho, sud abaviazaŭ Łaŭrynasa Rahielskisa prajści prahramu karekcyi pavodzin, pracavać abo zarehistravacca ŭ słužbie zaniataści, a taksama biaspłatna adpracavać 100 hadzin va ŭstanovach achovy zdaroŭja i sacyjalnych pasłuh, jakija dahladajuć pažyłych ludziej i ludziej ź invalidnaściu.

Na čas abmiežavańnia voli jamu zabaroniena karystacca sacyjalnymi sietkami i internet-płatformami, stvarać i raspaŭsiudžvać luby kantent, vieści tranślacyi, kamientavać materyjały, stvarać novyja sajty i akaŭnty, a taksama karystacca čužymi akaŭntami. Pry hetym jamu dazvolena vykarystoŭvać elektronnyja dziaržaŭnyja servisy i internet-bankinh.

Paśla ŭstupleńnia prysudu ŭ siłu za vykanańniem nakładzienych abaviazkaŭ budzie sačyć słužba prabacyi. Mahčymaje vykarystańnie IT-śpiecyjalistaŭ dla kantrolu.

Sprava razhladałasia z 2022 hoda i nieadnarazova adkładałasia. Usiaho adbyłosia 67 sudovych pasiadžeńniaŭ. Abvinavačany ŭ sud nie źjaviŭsia. U apošnim słovie jon vinu nie pryznaŭ.

Pavodle abvinavačańnia, Rahielskis zdymaŭ i raspaŭsiudžvaŭ videa, u jakich publična abražaŭ i vyśmiejvaŭ roznyja hrupy ludziej pa prykmiecie nacyjanalnaści, palityčnych pohladaŭ i pierakanańniaŭ. U materyjałach spravy adznačajecca, što jon taksama apahaniŭ impravizavany miemaryjał u pamiać pra zahinułych padčas padziej u Biełarusi, źniaŭšy i vykłaŭšy adpaviednaje videa.

Pryznačanaje pakarańnie častkova supadaje z raniejšymi prapanovami prakurora, jaki taksama prasiŭ abmiežavańnie voli, štraf i dadatkovyja abaviazki.

Departamient dziaržbiaśpieki Litvy charaktaryzuje Rahielskisa jak «palityčnaha marhinała», jaki aktyŭna supracoŭničaje ź biełaruskimi prapahandystami i kuryruje antyzachodnija i prarasijskija resursy na litoŭskaj movie.

Kryminalnaja sprava suprać Rahielskisa była pieradadzienaja ŭ sud jašče ŭ 2022 hodzie, adnak praces zaciahnuŭsia na hady. Prarasijski aktyvist, jaki vydatna vałodaje litoŭskaj movaj, demanstratyŭna patrabavaŭ pierakładčyka na ruskuju i pierakładu ŭsich materyjałaŭ spravy. Jon šeść razoŭ mianiaŭ advakataŭ, sprabavaŭ dać advod sudździ, zasypaŭ sud chadajnictvami.

Łaŭrynas Rahielskis z 2020 hoda čas ad času vystupaŭ u biełaruskich dziaržaŭnych ŚMI, padčas čaho ŭ abraźlivaj formie adhukaŭsia pra apanientaŭ Łukašenki.

Miemaryjał kala biełaruskaj ambasady ŭ Vilni Rahielskis sprabavaŭ razburyć u kastryčniku 2020 hoda. U dačynieńni da jaho była raspačataja sprava ab «raspalvańni varožaści»i «apahańvańni pamiatnaha miesca».

• 13
• 0
• 1
• 3
• 0
• 0
• 0
• 0