Siarhiej uziaŭ hrošy za kantrakt i pajšoŭ zdavacca ŭ pałon pry pieršaj mahčymaści. Pakručasty los biełarusa, jaki padpisaŭsia vajavać za Rasiju
Uradženiec Minska, były futbolny fanat Siarhiej Hryšačoŭ pravioŭ za kratami amal 16 hadoŭ. Paśla čarhovaha zabojstva ŭ Pieciarburhu jon mieŭ vybar: siadzieć u rasijskaj turmie abo adpravicca na vajnu va Ukrainu. Jon abraŭ druhoje, ale mieŭ chitry płan, kab uratavać svajo žyćcio.
Bijahrafija 38‑hadovaha Siarhieja Hryšačova — heta typovy šlach recydyvista. Jon niekalki razoŭ byŭ za kratami ŭ Biełarusi: za zabojstva, kradziož i rabavańni. U pierapynku pamiž adsidkami pracavaŭ na roznych nieskładanych pracach u Minsku. Paśla padaŭsia na zarobki ŭ Rasiju. Pra siabie kaža, što ź dziacinstva, z 1999 hoda, byŭ futbolnym chulihanam, fanatam minskaha «Dynama». Videa z Hryšačovym vyjšła na ŭkrainskim anhłamoŭnym jutub-kanale United24.
Apošni raz jon trapiŭ u SIZA paśla taho, jak padčas pracy achoŭnikam u Sankt-Pieciarburhu zarezaŭ adnaho z mužčyn, jakija pryjšli da jaho na razborki. Za heta jamu pahražała da piatnaccaci hadoŭ kałonii.
Biełarus vyrašyŭ zapisacca na vajnu, kab nie siadzieć. 6 śniežnia 2025 hoda jon padpisaŭ kantrakt ź Ministerstvam abarony Rasii, i praź niekalki dzion jaho adpuścili.
Adnak, pavodle słoŭ samoha Hryšačova, vajavać za rasijskija intaresy jon nie źbiraŭsia. Paśla atrymańnia hrošaŭ, jakija jon pieravioŭ siamji, Siarhiej źbiraŭsia zdacca ŭ pałon pry pieršaj ža mahčymaści.
Realnaść rasijskaha vojska jaho źbiantežyła. Siarhiej kaža, što sutyknuŭsia z «zombi-atradami» z narkamanaŭ i 60‑hadovych mabilizavanych, jakich zastajecca tolki «abniać i płakać». Armiju jon nazyvaje padobnaj da niejkaha partyzanskaha atrada, a nie da prafiesijnaha vojska.
Paśla pieravodu ŭ 79‑y połk jaho adpravili na šturm vioski Zialonaja razam z hrupaj zekaŭ i raźviedčykaŭ. Umovy byli składanymi: kamandziry žyli ŭ hrazi, šturmavikoŭ adpraŭlali na šturmy biez nadziei na evakuacyju, a pasadki byli litaralna zaścielenyja trupami rasijskich sałdat. Pavodle jaho słoŭ, «evakuacyjnyja hrupy» zabirali tolki hamancy i telefony zahinułych, pakidajučy cieły na miescy.
Padčas vykanańnia čarhovaha zadańnia hrupa Siarhieja trapiła pad ščylny ŭdar ukrainskich dronaŭ. Kali kamandziry ź jaho hrupy pačali hinuć i raźbiahacca, biełarus zrazumieŭ, što nadyšoŭ jahony šaniec. Razam z kantužanym praparščykam jon adździaliŭsia ad reštkaŭ atrada i pajšoŭ zdavacca ŭ pałon, padniaŭšy ruki i pakazaŭšy racyi ŭkrainskamu bieśpiłotniku.
Pabačyŭšy dron, jon «zihanuŭ pa staroj zvyčcy» — tak Siarhiej namiaknuŭ hledačam pra svaje nieanacysckija pohlady. Kaža, zihanuŭ ad stresu.
Niahledziačy na svajo kryminalnaje minułaje i ŭdzieł vajnie na baku Rasii, Siarhiej u sacsietkach padpisany na roznyja biełaruskija supołki. Ukantakcie jon pisaŭ: «Mienavita bieł-čyrvona-bieły ściah — heta histaryčny i sapraŭdny ściah biełarusaŭ». A aficyjny čyrvona-zialony ściah jon nazyvaje «zachad nad bałotam» i kaža, što toj «bolej nahadvaje ściah Madahaskara, čym ściah biełaruskaha naroda».
Pa jaho słovach, umovy va ŭkrainskim pałonie lepšyja za ŭmovy ŭ rasijskim vojsku. Jon kaža, što ličyć, što ŭkraincy zmahajucca za vyžyvańnie, i kali jany prajhrajuć hetuju vajnu, to ich prosta nie stanie jak nacyi, nie zastaniecca ni ŭkrainskaj kultury, ni ŭkrainskaj movy.
Źviartajučysia da rasijskich sałdat i takich ža zekaŭ, jakich kidajuć u miasnyja šturmy, były zek daje prahmatyčnuju paradu: zabivać kamandziraŭ i vychodzić z padniatymi rukami da ŭkraincaŭ, kab zachavać sabie žyćcio.
«Naša Niva» — bastyjon biełaruščyny
PADTRYMAĆ
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju15
Kamientary