U Minsku źniasuć pryvatny siektar kala Śvisłačy ŭ Sierabrancy. Što budzie zamiest?
U Minsku kančatkova vyznačyli los pryvatnaha siektara ŭ rajonie Sierabranki pobač sa Śvisłačču. Rašeńnie Minharvykankama ab zaćviardžeńni horadabudaŭničaha prajekta apublikavana na Nacyjanalnym pravavym partale i ŭžo ŭstupiła ŭ siłu. Dakumient praduhledžvaje paetapny znos siadzibnaj zabudovy na terytoryi byłych viosak Šejpičy i Dvoryščy, piša Blizko.by.
Havorka idzie pra ŭčastak płoščaj kala 286 hiektaraŭ pamiž vulicami Dzianisaŭskaj i Jakubava. Zhodna z prajektam, na miescy ciapierašnich pryvatnych damoŭ płanujecca stvaryć hramadskija prastory, zony adpačynku i pryrodnyja terytoryi.
Tak, u rajonie vulicy Siamionava na miescy siadzibnaj zabudovy miarkujecca raźmiaścić placoŭki dla adpačynku, sportu i zabaŭ, a taksama pravieści ŭparadkavańnie i azielanieńnie terytoryi. U rajonie vulicy Šejpičy detalovym płanam praduhledžana budaŭnictva hramadskich abjektaŭ.
Va ŭschodniaj častcy ŭčastka — pobač z vulicami Jakubava i Dvoryščy — płanujecca stvaryć pryrodny park. Jaho źbirajucca vykarystoŭvać dla spakojnaha adpačynku, prahułak, zaniatkaŭ sportam i rovarnych maršrutaŭ.
Realizacyja prajekta budzie prachodzić u niekalki etapaŭ. Na pieršym etapie, jaki raźličany da 2027 hoda, płanujecca ŭparadkavać terytoryju budučaha pryrodnaha parku z boku vulicy Jakubava. Pry hetym siadzibnuju zabudovu ŭ rajonach vulic Siamionava, Šejpičy i Dvoryščy pakul čapać nie buduć.
Asnoŭnyja źmieny zapłanavanyja na druhi etap realizacyi prajekta, jaki pavinien zaviaršycca da 2030 hoda. U hety pieryjad płanujecca źnieści najaŭny siadzibny žyły fond — usiaho 105 damoŭ — i całkam realizavać prajektnyja rašeńni.
Zhodna z dakumientam, znos budzie adbyvacca paetapna. Spačatku pad transfarmacyju trapić terytoryja byłoj vioski Šejpičy, zatym raboty pačnucca ŭ Dvoryščach, a na zaviaršalnym etapie čarha dojdzie da vulicy Siamionava.
Akramia taho, prajekt praduhledžvaje raźvićcio transpartnaj infrastruktury. U pryvatnaści, płanujecca budaŭnictva tramvajnaj linii pa praśpiekcie Rakasoŭskaha i praciah ruchu tramvajaŭ pa vulicy Jakubava da vulicy Malinina. Taksama praduhledžvajecca pieranos ciapierašniaha razvarotnaha tramvajnaha kalca.
Redki vypadak: pamiłavany biełaruski palitviazień pajšoŭ na vajnu suprać Ukrainy16
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary
Heta asablivaje miesca.
Vierby pa-nad Śvisłačču, abrosłyja mocham draŭlanyja płoty...
A za toj vadoj, tymi vierbami i tymi płotami, naŭprost u sercy horada - Biełaruś.
Spradviečnaja, viaskovaja i niekranutaja źmienami i mituśnioj.
Byccam na karcinie - hladziš tolki, a patrapić tudy nielha. Ty možaš pajści pa ściežcy uzdoŭž raki napierad, možaš raźviarnucca i pajści nazad - a jana zastaniecca. Pa-za časam i pa-za napramkam.