Trevieł-błohieru vynieśli papiaredžańnie za niapravilnuju rekłamu rebrykaŭ i dranikaŭ
Ministerstva antymanapolnaha rehulavańnia i handlu sumiesna ź inšymi dziaržaŭnymi orhanami praviało manitorynh błohieraŭ, uklučanych u rejestr raspaŭsiudžvalnikaŭ rekłamy. U vyniku šeść ź ich byli vyklučanyja z rejestra, a taksama vyjaŭlena raspaŭsiudžvańnie nienaležnaj rekłamy błohieram, jaki ŭ rejestr nie ŭklučany, paviedamlaje pres-słužba viedamstva.
Pry rekłamie ŭ fejsbuku abjekta hramadskaha charčavańnia «Rebryk i dranik» i stravy, jakuju tam hatujuć, trevieł-błohier Arciom Ryndzievič paraŭnaŭ hetaje miesca z restaranam «Vasilki» i dapuściŭ niehatyŭnyja vykazvańni na adras apošniaha. Takaja rekłama pryznajecca niadobrasumlennaj i zabaronienaj.
U svaim roliku Ryndzievič, jaki pracuje ciapier u asnoŭnym na rasijskuju aŭdytoryju (navat jahony jutub-kanał prezientujecca jak miesca, u jakim «raskazvaju, jak žyvuć ludzi ŭ Rasii i śviecie»), skazaŭ nastupnaje:
«Tyja, chto jedzie ŭ Minsk, dapuskajuć adnu i tuju ž pamyłku. Mnohija, kab pajeści biełaruskaj ježy, iduć u kafe «Vasilki». Choć na samaj spravie, na moj pohlad, tam davoli pasrednaja ježa, ničoha zvyšnaturalnaha. Jana nie maje dačynieńnia da tradycyj biełaruskich, ale ŭsie čamuści pryzvyčailisia tudy iści jeści draniki».
Paśla hetaha jon parekamiendavaŭ ustanovu «Rebryk i dranik» na vulicy Rakaŭskaj, ad jakoj u jaho samoha «sarvała dach».
Akramia taho, ministerstva ustanaviła, što hety błohier nie ŭklučany ŭ rejestr raspaŭsiudžvalnikaŭ rekłamy i tamu ŭvohule nie maje prava akazvać pasłuhi pa raźmiaščeńni i raspaŭsiudžvańni rekłamy ŭ internecie, u tym liku ŭ sacyjalnych sietkach. Jamu nakiravana pradpisańnie ab likvidacyi parušeńniaŭ.
Pa stanie na 5 sakavika 2026 hoda ŭ rejestr uklučana bolš za 10 tysiač raspaŭsiudžvalnikaŭ rekłamy. Za rekłamu biez uklučeńnia ŭ rejestr praduhledžany štraf: dla fizičnych asob — ad 5 da 10 bazavych vieličyń, dla indyvidualnych pradprymalnikaŭ — ad 10 da 25, dla jurydyčnych asob — ad 20 da 50 bazavych vieličyń.
Ciapier čytajuć
Zališniaje budaŭnictva: ci moža luboŭ biełarusaŭ inviestavać hrošy ŭ kvatery pryvieści da kryzisu na rynku nieruchomaści?16
Kamientary