Izrail nanios udar pa Chamieniei sa strataśfiery. Biez papiaredniaha ŭdaru pa SPA, jak zvyčajna ŭ sučasnych vojnach

Klučavuju rolu ŭ padrychtoŭcy adyhrała padraździaleńnie 8200 — sakretnaja izrailskaja raźviedvalnaja słužba, jakaja śpiecyjalizujecca na pierachopie telefonnych razmoŭ i kibierapieracyjach. Mienavita jaje śpiecyjalisty daviedalisia pra zapłanavanyja sustrečy vyšejšaha kiraŭnictva Irana. Raźviedka paćvierdziła: ranicaj u subotu, 28 lutaha, Viarchoŭny lidar budzie znachodzicca ŭ svajoj rezidencyi razam z členami siamji.

Prykładna a siomaj hadzinie tryccać chvilin ranicy pa iranskim časie ŭ kirunku Tehierana vylecieli izrailskija źniščalniki F-15 u supravadžeńni inšych samalotaŭ.

Płan apieracyi hruntavaŭsia na absalutnaj niečakanaści: izrailskaje kamandavańnie pryniało rašeńnie zabić Chamieniei pieršym ža ŭdaram, navat nie sprabujučy papiarednie vyvieści z ładu iranskuju sistemu supraćpavietranaj abarony. U Tel-Avivie bajalisia, što lubaja zaŭvažnaja aktyŭnaść u pavietranaj prastory daść Chamieniei čas spuścicca ŭ bunkier abo pierajechać u inšaje biaśpiečnaje miesca, dzie jon stanie niedasiažnym dla ŭdaru.

Sama ataka pačałasia prykładna ŭ dzieviać hadzin sorak chvilin ranicy. Dziasiatki izrailskich rakiet, vypuščanych sa źniščalnikaŭ F-15, pačali bić pa celach. Siarod ich byli i rakiety Blue Sparrow.

Jak adznačaje vydańnie sa spasyłkaj na krynicy, prainfarmavanyja ab chodzie apieracyi, puski ažyćciaŭlalisia ź vialikaj adlehłaści. Unikalnaść ataki zaklučałasia ŭ tym, što rakiety Blue Sparrow spačatku vychodzili ŭ strataśfieru Ziamli, a ŭžo adtul viertykalna abrynalisia ŭniz. Takaja nietypovaja vysokaja trajektoryja stała poŭnaj niečakanaściu dla iranskaj SPA i kiraŭnictva ŭ Tehieranie.

Užo za piać chvilin, kala 09:45 pa miascovym časie, žychary ŭsich rajonaŭ Tehierana nazirali, jak nad zakrytym kompleksam lidara padymajucca vielizarnyja chmary dymu. Vysokadakładnyja rakiety kłasa «pavietra-ziamla» paśpiachova i roŭnieńka-roŭnieńka parazili niekalki punktaŭ unutry kompleksu, dzie prachodzili schody słužbovych asob.

U momant udaraŭ sam Chamieniei znachodziŭsia ŭ svajoj rezidencyi nad ziamloj. Jak pakazvajuć spadarožnikavyja zdymki, mienavita hetaja častka terytoryi atrymała samyja značnyja i bačnyja paškodžańni.

Tolki paśla taho, jak fakt likvidacyi Chamieniei byŭ paćvierdžany, Izrail i Złučanyja Štaty Amieryki pierajšli da nastupnaj fazy — maštabnaha źniščeńnia supraćpavietranaj abarony Irana i inšaj krytyčnaj vajskovaj infrastruktury. Da toj fazy, jakaja zvyčajna idzie pieršaj.

Vyniki apieracyi stali vidavočnyja bližej da viečara. Spadarožnikavy zdymak, zrobleny ŭ 17:47, zafiksavaŭ pažary i razbureńni ŭ kompleksie, dzie mieściacca hihanckaja miačeć, prezidenckaja administracyja i rezidencyja lidara.

• 17
• 0
• 0
• 0
• 0
• 0
• 0
• 1