«Мы рускія і ў нас ёсць свае святы»: што сцяганосец алімпійскай зборнай Беларусі лічыць «класным»
Рашэнне беларускага Нацыянальнага алімпійскага камітэта аб тым, што раварыст Васіль Кірыенка панясе дзяржаўны сцяг на адкрыцці Гульняў у Рыа, выклікала неадназначную рэакцыю.
Справа ў тым, што незадоўга да Алімпіяды Кірыенка зняважліва выказаўся пра беларускую мову, назваўшы яе мёртвай:
«Прабачце, можа каго пакрыўджу, але беларуская мова — не жывая; гэта мёртвая мова, на якой практычна ніхто не размаўляе. Яе, як лічу, у прымусовым парадку навязваюць, прыкладам, прымушаюць вывучаць маю дачку.
Я, па вялікім рахунку, супраць гэтага. І калі мяне запытаюць — ці трэба так рабіць — адкажу: канечне, не! Я некалі таксама вывучаў мову, нават пяцёркі меў, але пасьля школы яна мне нідзе не прыдалася!» — сказаў Кірыенка.
Больш тысячы чалавек прынялі ўдзел у апытанні на папулярным сайце by.tribuna.com, ці варты Васіль Кірыенка, каб несці беларускі сцяг. 45% удзельнікаў адказалі, што не даверылі б Кірыенку ніякі сцяг, 29% лічаць, што чырвона-зялёны няхай нясе, толькі 26% лічаць, што Кірыенка варты гэтай місіі без усялякіх «але».
У суполцы belultras «УКантакце» вынікі апытання яшчэ больш відавочныя. 78% удзельнікаў апытання лічаць, што Кірыенка не заслужыў права несці сцяг.
Вельмі цікава таксама зазірнуць у акаўнт Васіля Кірыенкі ў сацыяльнай сетцы «Аднакласнікі», якой спартсмен карыстаецца дастаткова рэгулярна, абнаўляючы фотаздымкі. Сваіх допісаў Кірыенка не піша, але дастаткова часта «лайкае» іншыя допісы, якія потым адлюстроўваюцца ў яго на сценцы.
Большасць такіх перапостаў – гэта звычайныя анекдоты. Але сустракаюцца і больш цікавыя рэчы.
Напрыклад, Кірыенка палічыў класным допіс аб тым, што рускім варта мець свой дзень закаханых. «Што за фігня? Мы доўга будзем паўтараць за Еўропай? Мы рускія і ў нас ёсць свае святы».
Ёсць некалькі згадак Амерыкі. «Амерыка, мядзведзі ў нас ручныя. Ты на чарзе!» — кажа допіс з пагрозай у бок ЗША.
А вось былінны рускі асілак, які збіраецца забіць Керы і Маккейна, Кірыенку такая карцінка таксама падалася забаўнай.
Пра Беларусь згадак на старонцы Кірыенкі практычна няма. Хіба што перапост і прыемнае ўражанне ад брэсцкай школы №1.
Цяпер чытаюць
Падазронага актывіста-стукача Паўла Бялюціна прывезлі з Турцыі3
Падазронага актывіста-стукача Паўла Бялюціна прывезлі з Турцыі
«Можа, баяўся заставацца ў шлюбе са мной, бо працуе на БТ». Настаўніца, якая з'ехала праз даносы Бондаравай, распавяла пра развод і жыццё ў эміграцыі1111
Каментары