Субпадрадчыкаў беларускай кампаніі падазраюць у тым, што жыўцом засыпалі людзей зямлёй у Зімбабвэ
Пра страшную трагедыю, да якой можа быць датычная кампанія з Беларусі (якая менавіта кампанія, пакуль не называецца), паведаміў Цэнтр кіравання прыроднымі рэсурсамі Зімбабвэ. Па яго звестках, у шахтах недалёка ад горада Мутарэ былі жыўцом пахаваныя шахцёры-саматужнікі, якія без дазволу шукалі золата. Распрацоўкай тэрыторыі займалася беларуская кампанія — субпадрадчыкам выступала кітайская кампанія Zhondin Investments. Інцыдэнт адбыўся ў перыяд з 11 па 13 лістапада 2020 года.
На месцы трагедыі ўжо знайшлі два целы шахцёраў-саматужнікаў, яшчэ каля 10 лічацца зніклымі без вестак.
Па словах відавочцаў, кітайская субпадрадная кампанія наўмысна засыпала шахты шахцёраў-саматужнікаў, цалкам усведамляючы, што пад зямлёй знаходзяцца людзі. Пры гэтым паведамляецца, што за гэтым назіралі ўзброеныя супрацоўнікі паліцыі Рэспублікі Зімбабвэ, якія забяспечвалі бяспеку дзейнасці кампаніі.
Паліцыя сцвярджае, што яны не ўпэўненыя, чым займалася кампанія: меліярацыяй зямель ці здабычай карысных выкапняў. Не было прынята дастатковых мер засцярогі, каб пераканацца, што ў шахтах няма шахцёраў-саматужнікаў.
Абедзве кампаніі і паліцыя Рэспублікі Зімбабвэ адхілілі сцверджанні аб тым, што целы шахцёраў-саматужнікаў яшчэ знаходзяцца пад зямлёй, нягледзячы на тое, што на зямлі засталіся іх адзенне і асабістыя рэчы.
Цэнтр кіравання прыроднымі рэсурсамі звярнуўся ва ўрад Зімбабвэ з патрабаваннем спыніць выдачу дазволаў на здабычу карысных выкапняў карпарацыі, якая парушае канстытуцыйныя правы яе грамадзян.
Саматужная і дробнамаштабная здабыча карысных выкапняў не ўзаконена ў Афрыцы, хоць забяспечвае сродкі да існавання для многіх людзей. І ў той жа час гэты від дзейнасці працягвае несці вялікую небяспеку, штогод забіраючы незлічоную колькасць жыццяў.
Цяпер чытаюць
Галоўны ідэолаг Беларусі знайшоў у краіне «псеўдапатрыятычныя ячэйкі» і заклікаў да змагання з імі «адзіным баявым кулаком»23
Каментары