Новая тэхналогія з нанясеннем нанатонкага пласта золата прадухіліць запаценне акуляраў
А таксама дапаможа трымаць чыстым лабавое шкло ў вашым аўто.
Гэта больш чым непрыемна, калі вашы акуляры запацелі, — проста спытайцеся ў любога, хто насіў маску для твару за апошнія два гады пандэміі. Аднак неўзабаве нанатэхналогіі дапамогуць захаваць шкельцы чыстымі. Даследчыкі з ETH Zurich распрацавалі залатое нанапакрыццё, якое награвае шкло да тэмпературы прыкладна да 8℃, паглынае вялікую колькасць інфрачырвонага выпраменьвання і не дае акулярам запацець у вільготных умовах. І ў адрозненне ад звычайных падыходаў, якія проста змагаюцца з вадой з дапамогай гідрафільных малекул, новая тэхналогія прадухіляе нават пачатак кандэнсацыі.
Пакрыццё таўшчынёй 10 нм змяшчае золата паміж пластамі аксіду тытана, які не толькі ўзмацняе эфект награвання праз праламленне, але і абараняе золата ад зносу. Канструкцыя таксама не прывядзе да перагрэву ў цёплае надвор'е, бо яна прадухіляе траплянне промняў на іншы бок. Даследчыкі падкрэсліваюць, што яны зрабілі пакрыццё з выкарыстаннем метадаў, звычайных для вытворчасці. Такім чынам, кампаніям, хутчэй за ўсё, нават не давядзецца мадэрнізаваць свае вытворчыя лініі.
Адказваючы на натуральнае пытанне, якое можа ўзнікнуць наконт цаны, Engaget піша, што гэта не так дорага, як можна падумаць. Хоць золата і дарагі матэрыял, яго неабходная колькасць настолькі малая (патрэбны пласт, прыкладна ў 12 разоў танчэйшы за звычайную пазалоту), што яно не павінна значна павялічваць кошт вашых акуляраў. Тым не менш, каманда плануе вывучыць выкарыстанне іншых металаў.
Тэхналогію хочуць выкарыстаць не толькі ў акулярах. Даследчая група лічыць, што нанапласт будзе карысным для памяншэння «туману» на лабавым шкле аўтамабіляў, а таксама для люстэркаў, вокнаў і многіх іншых празрыстых паверхняў.
І ўсё ж — магчыма, вам прыйдзецца пачакаць некаторы час, перш чым знайсці акуляры з пазалочаным пакрыццём у мясцовай краме. Нягледзячы на тое, што першаадкрывальнікі падалі заяўку на патэнт, пакуль няма кампаній, якія выстройваюцца ў чаргу, каб пераняць вынаходніцтва.
Цяпер чытаюць
«Не спадабаліся прадукты на паліцы — і пішуць туды эсэмэску». МУС назвала Threads пагрозай бяспецы і заявіла пра затрыманні21
Каментары
якія толькі шчэ больш замутняюць шкло )