Белстат: ВУП Беларусі ў 2022 годзе ўпаў на 4,7%. Планавалася, што ён вырасце на 2,9
Нацыянальны статыстычны камітэт Беларусі апублікаваў першую ацэнку валавога ўнутранага прадукту за 2022 год. Аб'ём ВУП у бягучых цэнах склаў 191,4 млрд рублёў і знізіўся ў супастаўных цэнах на 4,7% у параўнанні з 2021-м.
У канцы снежня прэм'ер-міністр Беларусі Раман Галоўчанка заявіў, што ўрад папярэдне чакае зніжэння ВУП на 4% па выніках года.
Ліпень 2022-га стаў месяцам пікавага зніжэння ВУП, калі эканоміка прасела больш чым на 10%. За студзень — ліпень падзенне склала 5,2%. Але ўжо са жніўня, як сведчыць афіцыйная статыстыка, зніжэнне замарудзілася.
За студзень — верасень зніжэнне ВУП склала 4,7% год да года, такія ж лічбы назіраліся па выніках кастрычніка і лістапада.
Перад 2022-м улады прагназавалі рост эканомікі на 2,9%. Рэальнасць аказалася на 7,6% горшай за план.
Цяжка сказаць, ці можна давяраць гэтым лічбам Белстата. Раней лукашэнкаўцаў шмат разоў лавілі на фальсіфікацыі статыстыкі рознага роду.
Спад эканомікі выкліканы масавымі рэпрэсіямі і спрычыненай імі эміграцыяй высокакваліфікаваных спецыялістаў, а таксама санкцыямі, накладзенымі на лукашэнкаўцаў за суўдзел у агрэсіі супраць Украіны, і стратай украінскага рынку для беларускай эканомікі.
Чытайце таксама:
Сала — плюс 21%, бульба — мінус 30%. Як за год змяніліся цэны?
У Беларусі істотна падраслі пенсіі
Рознічны гандаль у 2022 годзе ўпаў на 3,7 %
«У камфортных умовах». Урад расказаў, як будзе расплачвацца па даўгах
Цяпер чытаюць
Колькасць судоў па палітычных крыміналках зменшылася ў разы24
Каментары