Не менш за 46 700 затрыманых за тры гады, больш за 5 мільёнаў рублёў штрафу
«Вясна» распавядае пра адміністрацыйны пераслед за апошнія тры гады, што мінулі з 9 жніўня 2020 года.
Па інфармацыі праваабаронцаў, за апошнія тры гады было затрымана не менш за 46 700 чалавек. Але гэтая лічба дакладна значна большая, бо правабаронцы, на жаль, не заўсёды атрымліваюць інфармацыю пра рэпрэсіі і пераслед беларусаў.
Беларускія суды прызначылі не менш за 7560 штрафаў. Агульная сума склала 5 090 295 рублёў (больш за 1 615 000 даляраў).
Таксама суддзі прызначылі мінімум 13 315 арыштаў. Агулам у ізалятарах беларусы адбылі 134 356 сутак. Пры гэтым, паводле звестак праваабаронцаў, з розных прычынаў спынілі толькі 173 справы.
Цягам трох гадоў людзей кожны дзень кідаюць за краты ў нечалавечыя ўмовы без сродкаў гігіены і зменнага адзення. Людзі, якіх утрымліваюць у няволі па тры месяцы, бываюць на свежым паветры толькі тады, калі іх вязуць у РУУС складаць новы пратакол.
Камеры ўвесь час перапоўненыя, таму людзям даводзіцца спаць на падлозе, пад ложкамі, на лаўцы. Ім не выдаюць пасцельнай бялізны, не выводзяць у душ і на шпацыр. У камеры саджаюць бяздомных людзей у якасці дадатковага ціску. Ноччу і днём бесперапынна гарыць святло.
Мыла і туалетную паперу затрыманым даводзіцца выпрошваць у адміністрацыі. Часам іх не выдаюць два-тры дні запар.
Праз «вока» і відэаназіранне ў камерах за кожным дзеяннем затрыманых сочаць дзяжурныя. Цёплай вады няма, а тую, што цячэ з-пад крана, вельмі не рэкамендуецца піць.
Тым, каго забіраюць з дома, не дазваляюць узяць нават сродкі гігіены, таму яны прыдумваюць новыя спосабы, як, напрыклад, пачысціць зубы тымі рэчамі, якія ёсць у камеры. Перадачы да людзей не даходзяць.
Медыцынская дапамога не аказваецца, пры тым, што шмат людзей трапляюць на Акрэсціна моцна збітымі. Адзіная крыніца інфармацыі — новыя сукамернікі, якіх закідваюць штодзённа. Гэтыя ўмовы праваабаронцамі расцэньваюцца як катаванні.
Цяпер чытаюць
На нарадзе ў Лукашэнкі публічна пасварыліся чыноўнікі. Ён не ведаў, каго падтрымаць15
Каментары
Любит люто, очень люто любит.
Народ атвячает такой же лютой любоую