Галоўным дырыжорам мінскага Опернага стаў расіянін. Сваіх пазвальнялі за палітыку
Генеральная дырэктарка Вялікага тэатра оперы і балета Беларусі Кацярына Дулава паказала на агульным сходзе калектыву тэатра новага галоўнага дырыжора. Ім стаў расіянін Арцём Макараў, паведамляе Sputnik.
Дагэтуль Арцём Макараў 12 гадоў працаваў галоўным дырыжорам у Башкірскім тэатры оперы і балета, мае ганаровае званне народнага артыста Рэспублікі Башкартастан. Таксама ў чэрвені гэтага года ён стаў яшчэ і галоўным дырыжорам Маскоўскага тэатра імя Наталлі Сац.
Як адзначыў новы кіраўнік аркестра, ён шчаслівы, што знаходзіцца ў Беларусі і для яго «вялікі гонар стаць часткай такога легендарнага тэатра». Раней ён ужо супрацоўнічаў з беларускім тэатрам у некалькіх спектаклях, і ўвогуле ўжо пісалася пра тое, што Оперны тэатр зрабіў стаўку пры вырашэнні кадравых праблем на запрашэнне расіян.
«Паколькі гэта было не спантаннае рашэнне, я яго абдумваў на працягу мінулага года, і мы ўсё абгаварылі і з тутэйшым кіраўніцтвам, і з кіраўніцтвам у Маскве, вырашылі, што паспрабуем сумясціць. Я спадзяюся, што ўсё атрымаецца», — заявіў Макараў.
Беларускія дырыжоры не падыходзілі Вялікаму тэатру оперы і балета Беларусі з палітычных меркаванняў. З 2020 года з Опернага тэатра звольнілі чатырох вядомых дырыжораў. Калектыў былі вымушаныя пакінуць Вячаслаў Чарнуха-Воліч, Андрэй Галанаў, Іван Касцяхін, а ў канцы мінулага года — Алег Лясун. Усе звальненні былі звязаныя з грамадзянскай пазіцыяй творцаў.
Цяпер чытаюць
Завадчанін Ігар, які вяртаўся дадому бухім, упершыню ў жыцці едзе за мяжу. А яшчэ ён халасты8
Каментары