Каля траціны беларусаў сутыкаліся з узломам старонак у сацыяльных сетках
Кампанія Kaspersky правяла апытанне ў розных гарадах Беларусі і прыйшла да высновы, што 28% рэспандэнтаў рабіліся ахвярамі ўзлому ўліковага запісу ў сацыяльных сетках. У апытанні ўзялі ўдзел больш за 500 чалавек у Мінску, Магілёве, Гомелі, Віцебску, Гродне і Брэсце, паведамляе Office Life.
Як расказалі выданню ў кампаніі, яшчэ 14% удзельнікаў апытання адзначылі, што з падобнай праблемай сутыкаліся іх блізкія.
Спецыялісты Kaspersky падкрэсліваюць, што ўліковыя запісы могуць падвяргацца ўзломам не толькі ў выніку складаных шматступеньчатых кібератак. Часта зламыснікам спрыяе халатнасць карыстальнікаў.
Напрыклад, кожны трэці прызнаваўся, што перадаваў свае даныя для ўваходу блізкім, а не мянялі пасля гэтага пароля больш за палову рэспандэнтаў. Пры гэтым кожны чацвёрты выкарыстоўвае падобныя адзін да аднаго паролі ў розных сэрвісах і сацыяльных сетках, што палягчае задачу зламыснікам.
Каб абараніць уліковыя запісы ад узлому, эксперты па кібербяспецы рэкамендуюць:
- ствараць складаныя ўнікальныя паролі. Надзейны пароль складаецца як мінімум з 12 сімвалаў, у ідэале — больш, і змяшчае спалучэнне вялікіх і малых літар, лічбаў і спецыяльных сімвалаў;
- выкарыстоўваць двухфактарную аўтэнтыфікацыю ва ўсіх сэрвісах, дзе гэта магчыма;
- нікому не паведамляць даных з СМС і push-апавяшчэнняў.
Цяпер чытаюць
У чым прычына незадаволенасці жыхароў мікрараёна Лебядзіны ў Мінску? Вось што насамрэч там планавалі будаваць5
Каментары