«Яны маглі б паўстаць, змагацца супраць рэжыму». Прэзідэнт Ізраіля заявіў аб адказнасці палесцінцаў у сектары Газа
Прэзідэнт Ізраіля Іцхак Герцаг заявіў, што палесцінцы ў сектары Газа павінны былі змагацца супраць ХАМАС. Аб гэтым ён сказаў на прэс-канферэнцыі 12 кастрычніка, піша «Медуза».
«Гэта рыторыка, што грамадзянскія асобы не ўцягнутыя, няслушная. Гэта абсалютная няпраўда. Яны маглі б паўстаць, яны маглі б змагацца супраць гэтага злавеснага рэжыму, які захапіў Газу ў выніку дзяржаўнага перавароту», — сказаў Герцаг.
Як піша The Times of Israel, адказваючы на пытанне карэспандэнткі CNN аб «калектыўным пакаранні» для мірных жыхароў у сектары Газа за дзеянні ХАМАС, Герцаг адпрэчыў абвінавачванні ў «ваенных злачынствах» і павысіў голас.
«Хіба вы не бачылі [разню на поўдні Ізраіля]? Вы ўсё гэта бачылі. Такім чынам, зараз мы пачынаем з рыторыкі аб ваенных злачынствах. Сапраўды? Праўда?» — сказаў прэзідэнт Ізраіля. Ён дадаў, што Ізраіль «выконвае міжнароднае права, дзейнічае ў адпаведнасці з міжнародным правам».
Пасля гэтага журналіст Channel 4 сказаў, што «збіты з панталыку» адказамі Герцага, бо «ён, відаць, ускладае адказнасць за ХАМАС на жыхароў Газы».
«Пры ўсёй павазе, калі ў вас на вашай чортавай кухні ёсць ракета і вы жадаеце стрэліць ёю ў мяне, ці магу я абараняцца? Такая сітуацыя», — адказаў на гэта прэзідэнт Ізраіля.
Раніцай 7 кастрычніка ХАМАС напаў на Ізраіль. У адказ Ізраіль пачаў наносіць масіраваныя ўдары па сектары Газа.
13 кастрычніка Армія абароны Ізраіля заклікала жыхароў Газы эвакуіравацца на поўдзень сектара, папярэдзіўшы, што ЦАХАЛ мае намер працягнуць аперацыю ў Газе.
У ААН гэты заклік раскрытыкавалі, заявіўшы, што перамяшчэнне 1,1 мільёна жыхароў немагчымае без разбуральных гуманітарных наступстваў.
У сваю чаргу кіраўніцтва ХАМАС заявіла, што жыхары Газы павінны ігнараваць заклік Арміі абароны Ізраіля эвакуіравацца з горада.
Прадстаўнік ізраільскага войска адказаў, што баевікі выкарыстоўваюць мірных жыхароў і падвяргаюць іх небяспецы. The Times of Israel са спасылкай на жыхара Газы адзначала, што ХАМАС проста перашкаджае эвакуацыі мірных жыхароў.
Учора Мінск зноў затапіла. Чаму сталіца не гатовая да дажджоў?4
Каментары