«Калі справа абмяжуецца «глыбокімі спачуваннямі», то такія жудасныя навіны будуць з'яўляцца пастаянна» — Ціханоўская
Святлана Ціханоўская выступіла на мерапрыемстве «Абарона дэмакратыі: як супрацьстаяць інфармацыйным маніпуляцыям», арганізаваным цэнтрам GLOBSEC у рамках Мюнхенскай канферэнцыі па бяспецы. Падчас прамовы Святлана Ціханоўская адзначыла: сёння жыцці тысячаў беларускіх палітвязняў залежаць ад рэакцыі краін Захаду на забойства Аляксея Навальнага.
«Забойства Навальнага — змрочны напамін аб тым, што бяспека, дэмакратыя і правы чалавека ўзаемазвязаныя.
Калі ўрад не паважае сваіх грамадзян, ён не будзе паважаць міжнародны парадак», — сказала Ціханоўская.
«Жыцці Статкевіча, Бабарыкі, Калеснікавай і тысячаў іншых людзей зараз напрамую залежаць ад рэакцыі Захаду на забойства Навальнага.
Калі справа абмяжуецца «глыбокімі спачуваннямі», то трэба быць гатовымі да таго, што такія жудасныя навіны будуць з'яўляцца пастаянна», — падкрэсліла яна.
«Мне страшна ад думкі, што наступным можа стаць мой муж. Я ўжо год не атрымліваю ад яго ніякіх вестак і не ведаю, ці жывы ён.
У нас тысячы палітычных зняволеных, якія знаходзяцца ў цяжкім стане. Многія ўтрымліваюцца без сувязі са знешнім светам. Некалькі чалавек ужо загінулі ў зняволенні.
Мне падаецца, дыктатары наўмысна правяраюць, наколькі далёка яны могуць зайсці без наступстваў», — нагадала Ціханоўская.
«Нам трэба пашыраць супрацоўніцтва паміж урадамі, актывістамі, міжнароднымі арганізацыямі і прыватнымі кампаніямі. Патрэбныя надзейныя сродкі камунікацыі і платформы, якія ўзмоцняць нашы галасы.
Нам трэба не толькі ўсвядоміць сваю сілу, але і эфектыўна карыстацца ёю», — заклікала беларуская дэмакратычная лідарка.
Чытайце таксама:
Святлана Ціханоўская сустрэлася з Юліяй Навальнай
Ціханоўская: Няма сумневаў у тым, што Навальнага мэтанакіравана забіў пуцінскі рэжым
Цяпер чытаюць
Сілавікі масава затрымліваюць удзельнікаў конкурсу гомельскага трэш-блогера14
Каментары