Супрацоўнік вывесіў у музеі сваю карціну побач з карцінамі сусветна вядомага мастака — і быў звольнены
Праца вісела побач з творамі Эндзі Уорхала.
Музей «Пінакатэка сучаснасці» ў Мюнхене звольніў супрацоўніка за тое, што ён таемна вывесіў у музеі ўласную карціну ў адной прасторы з карцінамі Эндзі Уорхала. Праца правісела да закрыцця, піша newsru.co.il.
Адміністрацыя «Пінакатэкі сучаснасці» пацвердзіла, што работнік тэхнічнай службы быў звольнены, бо вывесіў сваю працу ў аддзеле сучаснага мастацтва, падзяліўшы выставачную прастору з Эндзі Уорхалам.
Супрацоўнік, які лічыць сябе мастаком, зрабіў гэта «ў надзеі здзейсніць свой прарыў».
51-гадовы мужчына таемна пранёс свой твор на выставу, ён лічыў сваю працу ў музеі часовай, якая забяспечвае яго, пакуль ён шукае сваё сапраўднае пакліканне.
Прадстаўнік Пінакатэкі таксама паведаміў, што карціна памерам 60 на 120 см была вывешаная раніцай, а заўважаная толькі пасля адкрыцця музея.
«Было прынята рашэнне пакінуць карціну навідавоку, пакуль галерэя адкрыта, і прыбраць яе пасля закрыцця ў 18:00», — дадаў ён. Карціна правісела ў музеі восем гадзін.
Маючы доступ да ўнутраных памяшканняў музея, тэхнік вывесіў сваю карціну на белай сцяне ў калідоры першага паверха ўсходняга крыла.
Пінакатэка адмовілася выдаваць сюжэт і стыль карціны, каб не заахвочваць жартаўнікоў-пераймальнікаў.
Кантракт з супрацоўнікам быў скасаваны, таксама яму забаронена ўваходзіць у памяшканні музея, справа перададзена ў паліцыю. Як мяркуецца, каб павесіць карціну, пачатковец-мастак прасвідраваў дзве дзіркі ў сцяне, што таксама трапляе пад артыкул аб наўмысным псаванні маёмасці.
Можна толькі гадаць, як адрэагаваў бы на такі акт самапіяру Эндзі Уорхал, кароль поп-арту.
Зрэшты, улічваючы характар мастака і яго мастацтва, можна ўявіць, што вельмі станоўча.
Пінакатэка сучаснасці (Pinakothek der Moderne) — мастацкі музей у Мюнхене, пад дахам якога размешчаны чатыры незалежныя адзін ад аднаго музея. Яго пастаянная калекцыя налічвае больш за 20 тысяч работ, уключаючы карціны вядучых мастакоў дваццатага стагоддзя.
Каментары