Паўднёвая Карэя можа пачаць прамыя пастаўкі зброі Украіне пасля заключэння Пуціным пагаднення з КНДР
Паўднёвая Карэя хоча правесці паўторны разгляд пытання аб прамых пастаўках зброі Украіне, піша агенцтва Рёнхап са спасылкай на офіс паўднёвакарэйскага прэзідэнта.
Заява зʼявілася на фоне заключэння дагавора аб усёабдымным стратэгічным партнёрстве Расіі і Паўночнай Карэі.
Дарадца па нацыянальнай бяспецы Чан Хо Джын таксама выказаў шкадаванне з нагоды «ўсёабдымнай стратэгічнай дамовы», падпісанай падчас саміту паміж Уладзімірам Пуціным і лідарам Паўночнай Карэі Кім Чэн Ынам у Пхеньяне.
«Урад выказвае сур'ёзную заклапочанасць і асуджае падпісанне пагаднення аб усёабдымным стратэгічным партнёрстве паміж Паўночнай Карэяй і Расіяй, якое накіравана на ўмацаванне ўзаемнага ваеннага і эканамічнага супрацоўніцтва», — сказаў ён на брыфінгу ў прэзідэнцкай канцылярыі.
Чан Хо Джын дадаў, што любое супрацоўніцтва, якое прама ці ўскосна дапамагае паўночнакарэйскаму ваеннаму ўзмацненню, з'яўляецца парушэннем рэзалюцый Савета Бяспекі Арганізацыі Аб'яднаных Нацый і будзе падвяргацца міжнароднаму кантролю і санкцыям, і паабяцаў прыняць адпаведныя меры.
«Мы плануем перагледзець пытанне аб пастаўцы зброі Украіне», — таксама сказаў ён.
Раней Карэя аказвала гуманітарную дапамогу Украіне, пастаўляла вайсковыя прадметы несмяротнага характару, але не зброю. 9 мая прэзідэнт Рэспублікі Карэя Юн Сок Ёль заявіў, што яго краіна прытрымліваецца прынцыпу непаставак смяротнай зброі Украіне.
Паўднёвая Карэя валодае адным з самых вялікіх арсеналаў у свеце (больш за мільён снарадаў) і нарошчвае вытворчасць.
Цяпер чытаюць
На нарадзе ў Лукашэнкі публічна пасварыліся чыноўнікі. Ён не ведаў, каго падтрымаць6
Каментары